ISAIAH 56 - DAÜLANGPÜ LAIHING (BSI)

Lebü Jatthü Shing Yemleipü

¹ Shembüpai hapakei enyüke: Shahhing noteituh, jiüpü düktuh; Lomi ngelei yemleipü peikahen, hatü ngelei daülangshemshepü shakei vamkahen.

² Üpa shennyaki hapa düknya, üpai hapa kü wongshongi shongnya, üpai Sabbath daülangi tuhnya, hatü mang nedüki nyunya, büpa moihimanpü.

³ Kung am üpai ngelei nanglakthü mü shepnya, büpai, “Hingmei Shembüpai büpalei nanglakthü toueipü ngei laktükhen khih” hatü ban tüktükpü shennyakthüi, “Ngeiyü li neshiüpü shennyak” shei te-ehah.

⁴ Ban tüktükpü shennyakthü üpai ngelei Sabbath jiüshi tuhnya; üpai ngei mongongbenüng dou dük, hatü ngelei vangpüshuwpü kü wongshongi nyunya, Shembüpai hapakei enyüke:

⁵ Ngei ngelei Phopshem hatü hapa pekon mongkü nebeyaong hük, hatü hapeüthü mao meipü men shuohhen; Mechemao nekatihen nedohnetenpü men ngei jomphong kü shuohhen.

⁶ Hatü kung am üami Shembüpalei nanglakthü mü shepnya, üami büpa chongpho, Shembüpalei men kü bamnya hatü büpalei chongphobü leinya, Üami Sabbath jiüshangi tuhnya, hatü ngelei vangpüshuwpü kü wongshongi shongnya;

⁷ Hathü peü ngelei daülangpü Zion Kahshangei anhen, hatü ngelei phoppü shemei jom kü mongong shuohhen. Ngelei moidülei jomi shuohpü moila peü ngei yahhen; Mehenangkü ngelei shemü hangkuli peü shingvaishi phoppü shem shei nyükhen.

⁸ Israel am wüpküp leipü müei leipü, “Thaiyei tuhpüthü mü lenei ngei shao thaihen” shei enyüke.

Israel am Mübüthü Nyonghüpü

⁹ Peikei, Oh amphong phaüyemthü, amphong phaümong leipü yemhathü, peikei hatü lühtüktuh!

¹⁰ Israel am yombüthü peü mük phüngdaiteke; jomphong kon neshiü; Jom peü nehungpü shi kei nyüke; jom peü shinei lemtü mangh manghnyüke; jomü shi mon shinyüke.

¹¹ Jomü mechemao moh nemeipü hahnempü shi khih. Jomphongü kon neshiüpü mi yombüthü; Jom peü laophülei lem kü mon lüdaikemnyüke, peüi laophü nanglei danghen lem mon yemnyüke.

¹² “Peikei, yiü yemei leishah! jen peüi yiü chokshi yingshah! Ngenyih-ü shinnyihpü kei-üng chongkahen, ha mao meipüba chongkahen” shei peüi enyüke.