ISAIAH 54 - DAÜLANGPÜ LAIHING (BSI)

Israel am kü Shembüpa lei Bampü

¹ “Loktuh, Oh nyülan, hapeü chemao mangpohpü; Kesho loktuh, mongongpai lentuh, am aokvomi chemao mangtüngpüthü; Baha nyupü nyühathülei hapeüthü meyü, yaktükpü nyühathülei hapeüthü nyeishi nyuhen” shei Shembüpai enyüke.

² Ammei ashakshem shing dahütuh, hatü am nyushing kübü haenpü ashakthü kangei shentuh; Hapa shoungei tetuh; ammei vü luhütuh, hatü hanhaung wong kohshi aptuh.

³ Mehenangkü am laknyong lakdah kü yaüei daihen, ammei hühihathüi jatthü kaamlanghen, hatü lavüngtoiyei yakphongpü chingnyüthü kü nyuhen.

⁴ Tenyem, mehenangkü am veü nepongpih; mongteshang, amphong hangnehipih; Mehenangkü am thehila hepak kü veütükpü betükhen, hatü am vaümnyü vaiyei tuhphongpü deih-ei nedanghen.

⁵ Mehenangkü am Lingbüyü ammei baha, Jeiyong Shembüpayü büpalei men; Daülangpü Israel Kahvangü am Yemleibü; Büpa kü kahdoknyü peüi Kahvang shei nyüknyüpeih.

⁶ Yakphongpü nyüha hük, tuhphongpü shemshü nyü hük mongshangpü kei nyupü, Shembüpai am nyükei leipeih shei Shembüpai enyüke.

⁷ Shohük shingvaishi ngei am tuhphongpeih, shejao phahji yahyang longpai ngei am müei leihen.

⁸ Ahshi mongshihpü nangkü kansho hük shing ngei ngelei dhe am toueipü jodaipeih, shejao nedohnetenpü bampai ngei am kü shinshanghen shei am yangpü Shembüpai enyüke.

⁹ Noahlei nyih kü ngei kahdoknyü kü hajük kü bünghiyang nelenhüpih shei lahpeih. Hapakei shaang ngei am mü hajük kü mongneshihpih shei lahnyeih. Ngei am kü ne-e-i hanghi neshuohpih.

¹⁰ Kahshangthü jenjao, shangchingthü yandailangmao, ngei am kü bampü nejenlenhen, nevaijü ngelei chingmeivangmei vangpüshuwpü neyandaihen shei am kü bampü Kahvangi enyüke.

¹¹ Oh shangpongpü chingnyü, yinglükleisho-i mangtükpü nyiushem nemeipü am; Ngei amü douvang yaongthü leiyei linghen hih.

¹² Ngei ammei shangdüthü douvang yaongi; ammei penyüsha nyangnyangpü yüknyüi, hatü ammei chingnyü bhamthü douvang yaongthüi linghen.

¹³ Ammei hapeüthü peü kü Shembüpai nyuhhen, hatü chingmeivangmei longpü ammei hapeüthü mü nyuhen.

¹⁴ Daülangshemshepü kü am chonglingei nyuhen; shüveidoidei am toueipü taishi lüdaihen, am nenyemhen, nehanhen, mehenangkü hapayü am yopailei nepeikahen.

¹⁵ Hanei-i ammei ching hahjema, hapayü ngei dükpü nevaikahen; Üami ammei ching hahnya, jom-üng am touei dohen.

¹⁶ Veituh, yan shükbüi lingpü, kahnyak kü aw bahhüei vanglük yüphüpü, hatü hapa nadang kü lahhilaong jiüshi linghüpeyü ngei hih. Jühen nangkü lahhilaong noteipü veshanthüao ngei lingpeih.

¹⁷ Am kü nemeihen shei lingpü lahhilaong mepayao nenahnelanghen, hatü am kü thaüvaüei epü shahthü peü katitükaokhen. Shembüpa chongphopüthülei mükjüp, hatü jom dah shakhüpeyü ngei leipü shei Shembüpai enyüke.