ISAIAH 50 - DAÜLANGPÜ LAIHING (BSI)

¹ Shembüpai hapakei enyüke: “Ngei anyü leitükpü, pinnyü mü yanpü lai melei nyüpa? Nevaijü ngei üam mü bheishe hang nyupü kü yutükpa? Ammei mang nangkü ngei am yutükpeih; am pungpü nangkü anyü leitükpeih.

² Ngei leishingkü mehekei hükao nenyupa? Ngei nyükshingkü mehekei üpaiyao nejangpa? Am angei leihen ngelei lak shohdaipü je? Nevaijü am yanghen ngei wong neshiüpü je? Loh mon lohjü ngei yungchingao jeptüknyeih, ngei yungnyüthü bhih kahdok leitüknyeih; Haleipü nyahthü yung neshiüi, hatü yung lepai dinyüpeih.

³ Ngei phumshangao vangnyaki jümhünyeih, hatü dhoila ashaki jümhen lingnyüpeih.

Chongphobüi Ven Danpü

⁴ Jeiyong Shembüpai nyiupünangpüthü kü mehe eshuohhen ha ngei kü nyuhphopeih. Nepjeih büpai ngei thahümahünyeih, nyuhbüi nyuhpü kü banghen ngelei dhaong thahünyeih.

⁵ Jeiyong Shembüpai ngelei dhaong appeih, hatü ngei khüei neyaong, nevaijü ngei nyokei neleidai.

⁶ Ngei kü üppüthü kü ngei dok shaangshuohpeih, hatü ngelei jumum kü shüpüthü kü omdhaong meeshuohpeih; Ngei kü yu-op shaoei eelapüthü kübü ngelei dhenejolang.

⁷ Shembüpa Kahvangi ngei kü sheühnyeih, hanangkü ngei veü nepong. Hanangkü ngei ngelei dhe yaonglang kei leitükpeih, hatü ngei veü neponghühen shei nyingnyüpeih.

⁸ Büpa, üpai ngei dah shakhünya, ngei yopailei nyüpeih; Üpai ngei khüei yaongaokhen? Dhe dhe gongei pongshah! Ngelei vepa üpa shangkü ngei mü thep pongshah!

⁹ Shembüpa Kahvangü ngelei sheühbü, üpai ngei pungpeih shei ngei nyonghüaokhen? Jom peü ashak keiha chang leidaihen, dhaüpi hathü peü hahtükhen.

¹⁰ Am khongkü üpai Shembüpa kü nyemnya, hatü büpalei chongphobülei shah bangnya, üpai vangngai neshiüi vangnyak kü kamnya, shejao Shembüpalei men kü hinglemnya, hatü büpalei Kahvang kü hinglemnya?

¹¹ Shejao am peü aw jakpüthü, awjung hühteipüthü; Ammi jakhahpü awbhaong kü, hatü ammi jakpü awlom kü kamtuh. Ngelei lak leipü ammi hapa danghen, am hanghi kü lemshi nyuhen.”