ISAIAH 49 - DAÜLANGPÜ LAIHING (BSI)

Shembüpa lei Chongphobü

¹ Ngei epü bangtuh, am yungkungei nyupüthü, hapa bangtuh, tailu kahdok leipü shennyakthü! Ngei büh shekü Shembüpai ngei nyükpeih, onyülei vom mongei nyushi büpai ngei jepeih.

² Büpai ngelei ju yannah keiha lingpeih, büpalei lakmongei ngei jolangpeih; büpai ngei nyülükpü lahhan kei leihüpeih, büpalei lahhan tuw mongei ngei jolangpeih.

³ Büpai ngei kü, “Nüngü ngelei chongphobü Israel, nüng homei ngei müknyinshekhanghen” shei ephopeih.

⁴ Shejao, “Ngei angsha kü dou dükpü khih; Kong hatü angsha kü ngei ngelei wong tükpü khih” shei eshuohpeih. Shejao ngei nang ephahenü Shembüpalei lakmongei, hatü ngelei lakleiyü ngelei Kahvangei nyüpeih.

⁵ Shaang Shembüpa, üpai ngei vom mongei nyushi büpa chongphohen, büpa touei Jakob am phang müei leihen, hatü Israel am thailanghen jepa, büpai enyüke. Mehenangkü Shembüpalei müki eeshi ngei kü dhüm shuoh, hatü ngelei Kahvangü ngelei wong nyüpeih.

⁶ Ngelei Jakob jatthü thaihühen, hatü Israel am müei leihen nangkü nüng ngelei chongphobü vaihenü ahshimaanpü douha hih. Nüng homei ngelei yemleipü kahdoknyü dohpü ngoishi deishihhen shingvaishi ngei nüngü kung am shingvaishi vangngai hük leihühen shei büpai enyüke.

⁷ Yemleipü Shembüpa, daülangpü Israel Kahvangi jatthüi jiühitei yaktükpü vanglem lembüthülei chongphobü kü hapakei enyüke: “Ongthüi nüng eeyei yaongkahen, longthüi nüng eeyei aümei khümhen; Mehenangkü monglemaokpü Shembüpa, daülangpü Israel Kahvangi nüng jepeih.”

Jerusalem Lingei Leihen Epü

⁸ Shembüpai hapakei enyüke: Mechem ngelei phahji hepak ngoihenshang ngei ammi phoppü kü janghen, hatü yemleihen nyih kü ngei am kü sheühhen. Ngei amphong yomhen, hatü nanglakthü shingvaishi amü vangpüshuwpü leihühen, Kahdok nyokei leihen, hatü tükei nyupü mükjüp demei hanhen.

⁹ Khoklatei nyupüthü kü, “Vamdaikei” hatü vangnyak kü nyupüthü kü, “Vangngailei vamdaikei” shei ehen. Jomü lemhaoei hahying yemhahhen, hatü phaükong kü phenhavunglak hahhen danghen.

¹⁰ Jom aeiyei leyei nenyuhen, nevaijü bhih kahdok shaampü, hatü vanghenyü nyahpai jom kü nekethen. Büpa üpai jom kü bamnya, büpai jom mühen, hatü yunglok meipü touei mülanghen.

¹¹ Ngei kahshangthü kemei lemnyüshong linghen, hatü jom kamteihen lemnyü temhen.

¹² Veituh, jomü tailu leipü hanei apsha, hanei pehephi kübü, hatü hanei Aswan kahdok leipü peikahen.

¹³ Mongongpai kesho loktuh, Oh vangshothü mongongtuh, Oh kahdoknyü, kesho lokei bhaotuh, Oh kahshangthü! Mehenangkü Shembüpai laophülei nanglakthü nyiushem meihüteke, hatü büpalei hanghipü nanglakthü kü phahji yahyang huhen.

¹⁴ Shejao Zioni, “Shembüpai ngei yakphongteke, Shembüpai ngei betükteke” shei eteke.

¹⁵ Hümlungnyüi laophülei amma kü jüppü naü be-aokhen je? hatü laophüi bühhahpü hapeü kü nebamhen je? Nyüi laophülei hapeü bebenüng paoh vailangmao ngei nüng nebetükpih.

¹⁶ Veituh, ngei amü ngelei lakbha mongei yangei nyüpeih; ammei chingnyü bhamthü ngelei müksho kü lenyüpeih.

¹⁷ Am ja leiyei linghenthü peikünyüke, am lavüngtoiyei leitükpüthü am tuhtü lüdainyüke.

¹⁸ Ammei mük vamei am shineileyei veituh; ammei nanglakthü peü chemi thaitü am touei peikünyüke. Ngeiyü vanyangyem Kahvang, ammi hathü kemei ownyülangha kei, doidainyüi ow owpükei hathü owhen.

¹⁹ Am nyaidaitü chingkong nyulangmao, hatü ammei kahdok lavüngtoiyei yakphongjao, halei nyuhen leipüthü shingvaishi kahdok maandaitü ponghen, hatü am lomohhüpüthü am toueipü taishi lüdaiphahen.

²⁰ Am wüpküpei nyushi büh-ei paümpü hühihathüi ammi danshi, “Hapa kahdokü jen nyuhen ahshi maanteke, nyuhen shing nyeinya nahen khih” shei ekahen.

²¹ Hahepak kü ammi ammei mongei, “Ham kü naüthü hajükjük üpai bühphopa? Ngeiyü naüthü mahdaitü kong mü nyuhampeih; Ngeiyü wüpküpei daiyei yaktükpü kei nyuhampeih. Hathüyü üpai bühpa? Ngei monha nyupeihhathü hashihthü meleipü peiküpa”? shei ehen.

²² Jeiyong Shembüpai hapakei enyüke: “Veituh, ngei lomi jatthü kü ngelei lak nohen, hatü shennyakthü kü ngelei shahvüng shuohhen; Jomi ammei yeshangthü lakei paümtü, hatü ammei yiükhathü bhagchongei pohtü leikahen.

²³ Ongthüyü ammei pa kei nyukahen, hatü onglanyüthüyü ammei hümlungnyü kei nyukahen. Jomei dhe kahdokei aümei shatü ammei la leipü lamak lailangphahen. Shejüang ammi ngeiyü Shembüpa shei nyinghen; Üami ngei kü omdannya, mechemao veü neponghen.”

²⁴ Hampa hükei lak leipü dounyü aetei aoküla? nevaijü ongpa hüki khoklat kü küptükpü kübü ngaiaoküla?

²⁵ Shejao Shembüpai hapa enyüke: “Hih, hampalei lakmong leipü khoklatei küppüthü ngailanghen aokhen, hatü ongpa hükei lak leipü dounyüao aetei aokhen. Am mü depüthü mü ngei dehen, hatü ammei hapeüthü ngei yanghen.

²⁶ Am kü shüveipüthü kü jomei phai-üng hahhen hanhen, hatü yiüi keiha jomei iy-i jom chokhen. Shejüang shennyakthü peüi ngeiyü Shembüpa, am Yemleibü, Wong kohpü Jakob Kahvang shei nyinghen.”