ISAIAH 48 - DAÜLANGPÜ LAIHING (BSI)

Kahvangü Lingbü hatü Yangbü

¹ Israel shei menpü Judah amphang kübü peipü Jakob am phang hapa bangtuh. Ammi Shembüpalei men kü vangeishuwnyüke, hatü Israel Kahvang kü khümnyüke, shejao shahhing hatü jiüpü kü nenyunyu.

² Am nyingi daülangpü chingnyü kübü bümeiyangma hih shei, hatü Israel Kahvang, Jeiyong Shembüpa kü mongnyangshi nyunyeih shei ehahnyüke.

³ Shelei mebü-üng peihdaipü douthü jung ngei teteivanei eteke, Ngelei ju kübü ha vamei e, hatü hathü nyinghü; hatü ngangahük kü ngei hapa jiüei vamhü.

⁴ Am meshük mong vaanshi nyu, hatü nyiam keiha ngaümchong haüshi, hatü melangnyiam keiha ammei shangba vaanshi nyupa, ha ngei nyinghampeih.

⁵ “Hamei lajeithüi hathü dükpeih, hatü hami lingpü yaongnaüya-i hathü vamhüpeih” shei ne-ehen shangmü, shelei mebü-üng ngei am kü ha epeih, hatü hathü vamshekü ngei hathü nyinghüpeih.

⁶ Ammi danei heihteke, shaang ha peü eenyüke; ammi ha kü vaiteke shei ne-ehen je? Shaang mü leitü ngei am kü douja, ammi mangnyingpü doujothü ephahen.

⁷ Hanangkü ammi, “Hami shelei mebü dantepih” shei ne-ehen shangmü, hathüyü ngei shaang vamhünyeih, she-angei ammi hathü nedanham.

⁸ Ammi chemao mangdan, nevaijü mangnying, shelei mebü ammei dhaong kü ha neshü. Am meshük lueilemnya, ha ngei meishi nyingei nyüpeih; Hanangkü am keyü bühhinüng khüei yaongpüam shei nyüknyeih.

⁹ Mehenangkü ngelei men kü ngei mongshihpü pheinyüpeih, ngelei men vihhen nangkü ngei ha yepei tuhnyüpeih; Hanangkü am nemahtüki tuhnyüpeih.

¹⁰ Hon aw kü jakei daühüpü keiha, ngei am kü shanghah homei doktepih, shejao amphong yahlak neshiü.

¹¹ Ngei ngelei men kü ha düknyüpeih, mehekei ngelei men tentükhen? Ngelei müknyinshekhang ngei lebü kü neshuohhen.

Cyrus-ü Shembüpa i Jepü Mübü

¹² Ngei nyüklangpü, Oh Jakob, hatü Israel, ngei epü bangtuh: Ngeiyü Kahvang; Ngeiyü chongpangpü hatü dohpü.

¹³ Ngelei laki kahdoknyü chongnyiam yaong sheipeih, ngelei lakdah-i vangshothü paanei deishihpeih; Mechem ngei hathü kü nyükhen, jom peü chemi yaongnyüpeih.

¹⁴ Am peü chemi thaituh, hatü bangtuh! Ngei jepü shennyaki Babylon hahhen shei mepa kahvangi tetei ehampa? Shembüpai jepü shennyaki Babylon khüei büpalei küpjan koei daihen; büpai Babylon am khüei lak nohen.

¹⁵ Ha epeyü ngei hih, ngeiyü büpa hih. Ngei büpa müei leipeih, hatü büpa daipü dousho kü aokpü danghühen.

¹⁶ Ngei yopailei heih-ei ha bangtuh! chongpangpülei-üng ngei joshi ne-eangpih; hapa vampü hepak kao ngei hamü nyuhampeih. Hatü shaang Jeiyong Shembüpai ngei büpalei laangha mü ngei shompeih.

Laophülei Nanglak Shing Shembüpa lei Küpjan

¹⁷ Am Yangbü, daülangpü Israel Kahvangi hapakei enyüke: “Ngeiyü am shing peü mü meipü, hatü am daihen lem hupü Shembüpa, ammei Kahvang.

¹⁸ Ngelei shahkungthü kü ammi mong shuohlangmeyü, moihiman, nyiushemmei yungyen keiha yenkeihah shepeih, hatü am aokpü dangpeyü yungnyü lahao kei peikühah shepeih.

¹⁹ Ammei hühihathü molo bhihhiphang kei; ammei hapeüthü ienüng neaokpü shokuk melaü kei nyuhah shepeih; Jomei men nekatihen nevaijü jom ngei toueipü nemahtükhen vaipeih.”

²⁰ Babylon leipü leidaituh, haleipü nyaidaituh! Mongongpai hapa shahjang leneishuoh; peü lemei ha baongtuh. Kahdok dohpü ngoishi ha shomtuh; “Shembüpai büpalei chongphobü Jakob yangteke” shei etuh.

²¹ Mechem bhih kahdok homei Shembüpai laophülei nanglakthü müpa, yung nele; Büpai jom shing yaong leipü yung yenhü; büpai yaong bhaohütü yung bhaoei vamhü.

²² “Nemeipüthü shingvaishi chingmei neshiü” shei Shembüpai enyüke.