ISAIAH 47 - DAÜLANGPÜ LAIHING (BSI)

Babylon am kü Shahphenpü

¹ Ong uoshing leipü shühtuh, Oh pai mü ngühpü nela Babylon; hatü kübhih kü uotuh. Hajük kü am kü inyainyempü hatü lahhinpü am shei nenyükhen.

² Maiyaong phukei aan ngümtuh; dhe kü jümpü ashak nyiuktüktuh, Ashakviha nyiuktüktuh labai yung homei daituh.

³ Ammei bümkong mih kü huhen, hatü veübenüng kemei heeyei yeemhen. Ngei am kü bhüh yemhen, hatü hükao yemmü netuhhen.

⁴ Daülangpü Israel Kahvangü jen Yemleibü; büpalei menü Jeiyong Shembüpa.

⁵ Nenmü uotuh, vangnyakei shütuh, Babylon nelanyü; Am kü hajük kü ongchingthülei onglanyü shei nenyükhen.

⁶ Ngei ngelei nanglakthü kü mongshih-ei nyupeih; Ngelei mükjüpao nevaipükei ngei jom yakphongpeih; Ngei ammei lak kü jom shuohpeih, shejao amphongi jom kü phahji nehu; Viünyü viüpa kao ammi hanggovih kohüpeih.

⁷ “Ngeiyü den kü onglanyü vaiyei nyuhen” shei deihpü nangkü ammei mongei ha nele, nevaijü mehe vamkahen ha deih-ei nedang.

⁸ Hanangkü shaang ha bangtuh, am mongongmongle bampüthü; lakbowlayangei uotü mongei, “Ngei mon, hatü ngei mü lenei lebü üpayao neshiü. Ngei mechemao vaümnyü leiyei, nevaijü hühiha lomohdaipeih” shei nenyupih shei enyüke.

⁹ Shejao shaang-üng nyihcha mong aa kü hapa dou nyiphen vamkahen; Amphongi thihivam kü pheyeiyuei phongyomjao hathü nekomi peikahen.

¹⁰ Ammei mang kü ammi mong yangei deihnyüke, hatü, “Üpaiyao ham ne-eeaokpih” shei deihnyüke. Ammei kihikon hatü nyingpühingpai am lemnyong kü mülang, hatü ammi ammei mongei, “Ham mon, ham mü lenei lebü neshiü” shei ehahnyüke.

¹¹ Amphongei thihivam doui nekatiaokhen mü vongshüh peikahen. Amphongi nekeütükaokhen mü shanghah peikahen, Amphongi nenyingpü kü ngangahük kü lomoh aühaü peikahen.

¹² Am hashih mebü dükteipü thihivam dou hatü am phongyomteipü lemphüli jungeilangei tuhhahtuh; Üpai nying, hapai am kü sheühphahen aokpeih, hatü ammei vepathü kü nyemshaohen aokpeih.

¹³ Ammi longi phongyomthiphepai am tengdaiteke; Üami vangsho lithathü kü veitü nih-ei khonya, hatü lenja kü veitü teteivanei enya, Jomi am touei mehe vongshüh peikünya, ha kübü nyemyangpha.

¹⁴ Veituh, jomphongü hahtang keiha, hatü awi jom laiyei hahtükhen. Hapa awlom wong kübü jomi jom nying neyangaokpih. Awsham kü uohen mü awtao neshiü, shaamluki uohen mü aw neshiü.

¹⁵ Jomi am kü dükphahenü ha mon: Am hashih mebü hapa notei dükteiyei heihpeih. Am tuhphongtü jom peü jomei lem kü lüdaiphahen, üpaiyao am neyangphahen.