ISAIAH 46 - DAÜLANGPÜ LAIHING (BSI)

Babylon amei Kahvangthü

¹ Bel kü aümei shatü, Nebo kü lashüh-i shüngei khümhamteke, shejao shaangü gadu hatü mohoh dok shangei haütü yemhimak kü hanggovih vaishi koshi nyüke.

² Jomei lajeithüi jom neyangaok; jomü yepei wüpküpei deilangnyüke.

³ Ngei epü bangtuh, Oh Jakob phang, hatü Israel am phang aopüthü. Am wom mongei nyushi mebü, hatü bühhinüng ngei am poh-ei jungei angpeih.

⁴ Ngei ammei Kahvang hatü am viüei shosho pungpü thahshi ngei am junghen. Ngei am lingpeih, hatü ngei am kü junghen; Ngei am kü sheühhen hatü yanghen.

⁵ Ngei mü hükkei leihühen amphongi ngei üpa mü sheteiphenhen? Hatü ngei mü shetteihen nangkü ngeiyü üpa kei khih shei ehen?

⁶ Shennyakthüi laophülei khoung leipü hon aokei ngainyüke; Jomi ngin dok kü doknyüke; Jomi hon shükbülei nang yemei Kahvang shüknyüke, hatü hapa kü aümei khümnyüke.

⁷ Jomi hapayü bhagchongei painyüke, jomi hapa shingnüngei haünyüke, hatü hapayü hatouei haüshi nyunyüke. Hanei ami hapa kü phopjü nejangnyu, nevaijü üpayao shanghah kübü neyangnyu.

⁸ Hapa deih-ei danghümao, hatü leyei peihümao, ammei mongei ha deihhümao, Oh mang shennyakthü.

⁹ Peihdaipü douthü deihhümao; Mehenangkü ngeiyü Kahvang, hatü lebü neshiü; Ngeiyü Kahvang, hatü ngei keiha lebü hükao neshiü.

¹⁰ Chongpangpülei-üng dohhen nang ngei etepih, mehe vamkahen ha aivang den mebü teteivanei etepih. “Ngelei küpjanthü peü jiükahen, hatü ngei mehe dükhen shei deih, ha peü dükhen” shei etepih.

¹¹ Heongphi leipü shennyak hük ngei nyüknyüpeih; Büpa alang keiha laongkahen; ngei mehe tem, ha jiükahen.

¹² Ngei epü bangtuh, am mongdang vaanpüthü, am daülangshemshepü kübü taishi yandaipüthü.

¹³ Ngei ngelei daülangshemshepü yopailei koei peikünyeih, hapa taishi neshiü; hatü ngelei yemleipü pheiyei nenyukahen. Ngelei yemleipü Zion am kü shuohhen, ngelei müknyinshekhang Israel am kü shuohhen.