ISAIAH 45 - DAÜLANGPÜ LAIHING (BSI)

Shembüpa i Cyrus Jepü

¹ Shembüpai laophüi jehahpü Cyrus, üpalei lakdahphi kü büpa touei neütükhen, hatü ongthülei wong komtükhen, hatü shem shaden küppü aphen shomnya, büpa kü hapakei enyüke:

² Ngei nüng shekü daihen, hatü kahshangthü kahji leitükhen; Ngei laktetnyiami lingpü shadenthü, hatü nyiamlüngi bangpü kemei khih mü bentükhenpeikahen.

³ Ngei manghphangei nyupü nükhinyiam, hatü jopü shingei nyupü mopthü nüng kü shuohhen; Hahepak kü nüngi ngeiyü Shembüpa, nüng kü men homei nyükpü Israel Kahvang shei nyinghen.

⁴ Ngei chongphopü Jakob, hatü ngei jepü Israel amei men kü, nüngi ngei nenyingjao ngei nüng kü men homei nyükpeih.

⁵ Ngeiyü Shembüpa, hatü ngei keipü lebü neshiü; ngei mü lenei Kahvang neshiü. Nüngi ngei nenyingjao ngei nüng wong kohhühen;

⁶ shejüang heong kübü heshü thahshi ngei mü lenei lebü Kahvang neshiü shei hangkuthüi nyinghen. Ngeiyü Shembüpa, hatü lebü Kahvang neshiü.

⁷ Ngei vangnyak hatü vangngai nyiphen lingnyüpeih; Ngei shanghah hatü moihiman nyiphen shuohnyüpeih; Ngei, Shembüpai hathü dou peü düknyüpeih.

⁸ Oh vangsho shangpa, vang keipü daülangshemshepü shomtuh; Kahdoknyü ju aptuh, yemleipü koh-ei vamhütuh; hapa mü daülangshemshepü longhütuh; Ngei, Shembüpai hapa lingpeih.

Lingpü hatü Büshah kü Shembüpa

⁹ Laophülei Lingbü mü, hatü haümdüki dük shükbü mü depeyü onyükei! “Nüngi mehe lingnya?” shei ashemi dük shükbü kü eaokhen je? Nevaijü haümdüki dük shükbü kü nüngei lakdou nemeiang shei eaokhen je?

¹⁰ Üpai laophülei pa kü, “Nüngi mehe li tuhpa?” nevaijü laophülei nyü kü, “Nüngi mehe bühpa?” shei enya, onyükei!

¹¹ Shembüpa, Israel amei daülangpü Kahvang, hatü hapa Lingbüi hapakei enyüke: “Ngelei hapeüthü nangkü nüngi phehen je? nevaijü ngelei lakdou nangkü nüngi ngeükhüam shuohhen je?

¹² Kahdoknyü hatü halei nyupü hangku ngei lingpeih. Ngelei laki mon vangshothü paanei deishihpeih; hatü haleipü lithathü peü ngelei lakmongei tuhnyüpeih.

¹³ Ngei daülangshemshepü kü ngelei mükhong jiühühen, hatü douthü jiüshi linghen nangkü ngei Cyrus vamhüpeih. Ngei büpalei lemthü peü kangshangi linghen; büpai ngelei chingnyü Jerusalem ne-ei lingei leihen, hatü wüpküpei nyupü ngelei nanglakthü bümei leihühen. Üpaiyao büpai hapa dükhen nangkü lat neshuoh, nevaijü yawhdou neshuoh” shei Jeiyong Shembüpai enyüke.

¹⁴ Shembüpai hapakei enyüke: Ijip amei mophimo hatü Kush amei dounyünangbathü peü; hatü bümhishao meipü Sabea am amphong touei peikahen hatü ammei vaihen; Jom am phei mükahen; jom nyiamvüi shatü am kü aümei khümhen. Jomi am kü khümei, “Kahvangü am mü mon nyüke, lebü mü neshiü; büpa mü lenei lebü Kahvang neshiü” shei ehen.

¹⁵ Hingmei, nüngü laophü nyingi joshi nyupü Kahvang khih; Oh Israel Kahvang, Yemleipüba.

¹⁶ Lajei lingpüthü peü veü ponghen, hatü mongmanghen; jom chemi mongmangei daihen.

¹⁷ Shejao Israel amü nedohnetenpü yemleipübai yanglanghen; Nedohnetenpü thahshi amü mechemao veü neponghühen.

¹⁸ Shembüpai hapakei enyüke: Üpai vangshothü lingpa, büpayü Kahvang; Büpa, üpai kahdoknyü shükpa, hatü lingpa, büpai ha lingpeih; Büpai hapayü kong mü tuhhen nelingangpih, shejao halei hangkuli nyuhen nangkü lingpeih. “Ngeiyü Shembüpa, lebü Kahvang neshiü” shei büpai enyüke.

¹⁹ Shangmang kahdokei uotü ngei joshi shah ne-eangpih; “Angsha kü ngei yemtuh” shei ngei Israel hapeüthü kü ngei ne-eangpih. Ngei, Shembüpai shahhing enyüpeih; mehe jiüpa, ha ngei baongnyüpeih.

Kahdoknyülei Shembüpa hatü Babylon amei Lajei

²⁰ Am thaituh hatü chemi peikei, jatthü kübü yangei aopü nanglakthü! Püi lingpü lajei hatü yanghen neaokpü kahvangthü kü phoppüthüi ha nenyingnyu!

²¹ Shahphen shingei peiyei ammei nang etuh: jom chemi shahnying meipü yemtuh! Hapa vamkahen shei üpai shelei mebü teteivanpa? Peihdaipü hepak kübü-üng üpai hapa ehampa? Hapayü ngei, Shembüpai ephei nevaipü je? Ngei mü lenei daülangpü hatü lebü yemleipü Kahvang neshiüpih; Ngei mü lenei lebü üpaao neshiü.

²² Ngei touei mong lepei leikei, hatü yemleipü yahtuh kahdoknyü hangkuli peü! Mehenangkü ngei mon Kahvang, hatü lebü üpayao neshiüpih.

²³ Ngei laophü nyingi lahtepih, daülangshemshepü kü ngelei ju kübü shah hük nyokei neleihen mü daitepih: “Peüi lashüh-i shüngei khümhen, hatü jubenyeijaang peüi ngei lahhen.”

²⁴ Jomi ngei nang hapakei ehen: “Shembüpa kü monha daülangpü, hatü wong nyüpeih.” Üami büpa khüei yaongnya, büpa touei peiyei veü ponghen.

²⁵ Shembüpa kü Israel jat peüi aokpü danghen hatü müknyinshekhanghen.