ISAIAH 43 - DAÜLANGPÜ LAIHING (BSI)

Shembüpa i Israel am Yanghen Lahpü

¹ Shejao shaang Shembüpa, üpai am lingpa, Oh Jakob, üpai am vamhüpa, Oh Israel, büpai hapakei enyüke: Am tenyem; mehenangkü ngei am angei leitepih; Ngelei men kü am nyükei leipeih, amphongü ngelei lompü.

² Mechem am yung homei daihen, ngei am mü nyuhen; hatü mechem am yungdang homei daihen, yungi am bhongei neshanlanghen. Mechem am awbhaong kü kamei daihen, awi am kü nekethen; awlomi am kü nelihen.

³ Mehenangkü ngeiyü Shembüpa, ammei Kahvang; am Yemleibü, Israel amei Daülangpü Kahvang. Am yanghen nangkü ngei Ijip am lomohhühen; am nangjei Kush hatü Seba am yakphonghen.

⁴ Mehenangkü amü ngei touei douvang hatü dhüm, hatü ngei am kü bampü nangkü, am nangjeiyei shennyakthü, hatü am shojei jatthü shuohhen.

⁵ Am tenyem; mehenangkü ngei am mü nyüpeih; Ngei ammei hühihathü heong leipü leilanghen, hatü heshüphi leipü thailanghen.

⁶ Ngei pehe leipü am kü, “Jom leishihtuh” hatü apshaphi leipü am kü, “Jom shongei tetuh” shei ehen. Ngelei yeshangthü tailu kahdok leipü, hatü ngelei yiükhathü kahdok dohpü leipü,

⁷ ngelei müknyinshekhang shingvaishi ngei lingpü, ngei shükpüthü, üam ngelei men kü nyük, hathü leishihtuh shei ehen.

Israel amü Shembüpa lei Denbü

⁸ Nanglakthü üam mük nyu, shejao mük phüngdai, üam kü dhaong nyu, shejao aangdai hathü leituh.

⁹ Jatthü peü chemi thaituh, hatü shennyakthü peü chemi thaituh. Jomei kahvangthü mepai ngoikahen nang tetei epa? Peihdaipü douthü üpai yeihshi tetei epa? Jom dah shakhen shingvaishi jomei denbüthü müei deikei, hatü jomphongi bangtü, “Hapayü jiüteke” shei nyem-e.

¹⁰ Amü ngelei denbüthü, ammi ngei nyinghen, hatü hinglemhen, hatü ngeiyü Kahvang shei nyinghen shingvaishi ngeijepü ngelei chongphobüthü shei Shembüpai enyüke. Ngei mü lenei üpa kahvangao nenyuham, nevaijü ngei mü üpa kahvangao nechongkahen.

¹¹ Ngei, ngeiyü Shembüpa, hatü ngei mü lenei lebü yemleibü neshiü.

¹² Mehe vamhen ngei ha am kü tetei e, hatü am kü sheühpeih. Ngei mü lenei lebü kahvang am mü nenyuangpih. “Amphongü ngelei denbüthü” shei Shembüpai enyüke.

¹³ Ngeiyü Kahvang, hatü aivang den mebü nedoh-i “Ngeiyü Büpa” nyukahen. Ngelei lakmong leipü üpayao yanghen neaok; ngei mehe dük, ha üpaiyao yeiyanüng neaok.

Kahvang Phahji

¹⁴ Shembüpa, am Yemleibü, Daülangpü Israel Kahvangi hapakei enyüke: “Amphongei men kü ngei Babylonei veshanthü shomei jomei penyüshathü bentükhen, hatü jom nyipüwapü peü theppü youngpü leitükhen.

¹⁵ Ngeiyü Shembüpa, ammei Daülangpü Kahvang, Ngeiyü Israel am Lingbü, ammei Ongpa.”

¹⁶ Shembüpa, üpai yungching shangkü lem lingpa, hatü wong kohpü yung shangkü lem lingpa,

¹⁷ üpai koyei khari hatü koyeithü, veshanthü hatü hampathü müei peiyei nepao-aokhen mü jom lemtük, hatü awdük kübü aw mettükpükei lingnya, büpai enyüke:

¹⁸ Peihdaipü douthü betüktuh, nevaijü den chang kü kei tenyu.

¹⁹ Ngei douja hük düknyüpeih; shaang hapa vamkünyüke, ammi ha ne-eenyu je? Ngei bhih kahdok kü lemnyü hük lingkahen, hatü halei yungyenthü vamhühen.

²⁰ Ngei jepü ngelei nanglakthü kü jomi yinghen shingvaishi bhih kahdokei yung hatü yungyenthü vamhüpü nangkü, Phaüyemthüi ngei kü, shuwthüi hatü ostrikh oui ngei kü dhüm shuohhen.

²¹ Hathü nanglakthüyü ngei laophü shingvaishi linghahpeih; Hanangkü jomi ngei kü menvih loknyüpeih.

Israel amei Mang

²² Shejao amphongi ngei kü nenyük, Oh Jakob; Ammi ngei kü tengei nyupeih, Oh Israel!

²³ Ammi ammei mithü müei peiyei ngei kü jakpü moila neshuoh, nevaijü moila shuoh-ei ngei kü dhüm neshuoh. Ngei am kü hahying moila nevaijü ayingshü jakei moila yahshih shei am kü hanggovih neshuoh.

²⁴ Ammi ngei kü vong meipü meli neshakpha, nevaijü ammei yemhimak cheüi ngei mongneonghü. Shejao ammei mangi ngei kü hanggovih shuohpeih; am pungpüshaipai ngei nyiuhünanghüpeih.

²⁵ Ngelei men kü ammei mang thitei yaktükpeyü Ngei, hapayü, Büpa hih, hatü ngei ammei mang hajük kü deih-ei nelepih.

²⁶ Jenphong shahphenshingei heihshah; am jiüpeih shei dah shakhühen ammei shah etuh.

²⁷ Ammei shongpü pa-i mang thah, hatü ammei mübüthüi ngei khüei yaongpeih.

²⁸ Hanangkü ngei phopshem leipü pameithü veühüpeih; Jakob chemjalak kü mangtükhen, hatü Israel am mih-i shahlong ehahhen hanpeih.