ISAIAH 42 - DAÜLANGPÜ LAIHING (BSI)

Shembüpa lei Chongphobü

¹ Ngei wong kohhüpü ngelei chongphobü hamü nyüke, Ngei monghahpü ngei jepü hük; Ngei ngelei laangha büpa kü shihpeih, hatü büpai jatthü peü kü shahhing koei peikahen.

² Büpai chingyangshongei vaüei-eeyei, leneiwongei nevaijü shahwong eyei nenyukahen.

³ Büpai laamei shapü pingu netettükhen, hatü metdainüng shei nyupü awdük büpai nemettükhen; Büpai hingshangi shahhing koei peikahen.

⁴ Büpai kahdoknyülei shahhing mangling thahshi büpai mongmah-ei, nevaijü mong maanei nenyukahen.

⁵ Shembüpa Kahvang, üpai vangshothü ling, hatü hathü paanei deishih, üpai kahdoknyü paanei deishih, hatü halei lemphü vamhünya, üpai nanglakthü kü ngü shuohnya, hatü halei kamteipüthü kü yangnyu shuohnya, büpai hapakei enyüke:

⁶ Ngei, Shembüpai amphongü daülangshemshepü kü nyükpeih; Ngei ammei lak kü khaaihen. Ngei amphongü nanglakthü shing vangpüshuwpü hük, hatü kung am shing vangngai hük leihühen.

⁷ Amphongi mükphüngpüthülei mük aphühen, hatü vangnyak kü khoklatei uoshi nyupüthü ngailanghen.

⁸ Ngeiyü Shembüpa, hapayü ngelei men; Ngei ngelei müknyinshekhang üpa kao neshuohhen, nevaijü ngelei menvih lajeithü kü neshuohhen.

⁹ Veituh, sheleipü douthü peü dhaümei peiteke, hatü shaang ngei doujathü enyeih; hathü vamshe kü-üng ngei am kü hathü nang enyeih.

Menvihpü Kesho

¹⁰ Shembüpa kü kesho ja hük lokeishuoh, kahdoknyü dohpü jung ngoishi büpa menvihpü loktuh! Yungchingi ngeü antuh, hatü haleipü yemhamakhathüi, yungkung kahdokthüi hatü halei nyupüthüi menvih kesho loktuh.

¹¹ Bhih kahdok hatü haleipü jilathüi; hatü Kedar am nyupü chingthüi Kahvang men vihtuh. Sela chingnyülei nyupüthüi mongong kesho loktuh; jomi kahshang shaopülei aongei lentuh.

¹² Jomi Shembüpa kü müknyinshekhang shuohhütuh, hatü yungkung kahdokthü kü büpalei menvih baonghütuh.

¹³ Shembüpayü hampa hük kei dainyüke, veshan hük keiha büpai hokhen temnyüke; Büpai lenei thep nyüknyüke; Büpai laophülei vepathü kü laophülei wong hunyüke.

Kahvangi Büpalei Nanglak kü Sheühhen Lahpü

¹⁴ Hepak luangi ngei nenmü nyudaipeih, ngelei nanglakthü kü nejangi ngei nenmü nyudaipeih. Shejao shaangü ngei nyü hüki hapeü bühshingkü vaüpü keiha vaühen.

¹⁵ Ngei kahshang hatü shangtaothü lavüngtoiyei tuhphonghen, hatü jomei jahpan vantükhen; Ngei yungnyüthü peü shübaongthü leitükkemhen hatü yungkukthü ütükhen.

¹⁶ Ngei mükphüngpüthü jomi chemao nekampü lem kü mühen; Ngei jom touei vangnyakü vangngai leitükhen, hatü nemeipü lemthü lemnyeü meishi lingtükhen. Ngei dükhen dou-ü hathü, hatü ngei jom netuhphongpih.

¹⁷ Shejao üami lajeithü kü hinglemnya, hatü üami hathü kü, “Nüngü hamei kahvang” shei enya, veü ponghen.

Israel am Ven Nedanpü

¹⁸ Bangtuh, aangdaipü nanglakthü, Veituh, mükphüngpüthü!

¹⁹ Ngei shompü ngelei nanglak keiha mükphüngdaipü nevaijü aangdaipü üpa nyüpa? Ngei kü lanei shuohtükpü keiha, nevaijü Shembüpalei chongphobü keiha mükphüngdaipü üpa nyüpa?

²⁰ Amphongi douthü longi eeteke, shejao ha nyingei neyahnyu; danhen dhaong kohshi nyüke, shejao meheyao nedannyu.

²¹ Büpa daülangshemshepü men kü Shembüpai laophülei shahkungnyü longhühen, Hatü müknyinshekhanghühen mongongpeih.

²² Shejao hapa nanglakthüyü dou peü gühtüktü lak kong, jom peü kahshalei küpshi hatü khoklatei nyüke. Jomei dou peü gühtüktü üpaiyao jom yanghen neshiüi nyüke; “Jom yangtuh” shei ehen üpayao neshiüi jomei dou kemei aettüktü nyüke.

²³ Amphong khongkü üpai hapa kü kenhingei banghen, üpai hapa kü mong shuoh-ei ngoikahen nyihthü kü banghen?

²⁴ Üpai Jakob aetpüshepüthü kü, hatü Israel am gühpathü kü shuohtükpa? Jeni büpa khüei mang thahpü nangkü, büpalei lemthü kü nekampü, hatü büpalei shahkungthü nebangpü nangkü Shembüpai shuohtükpü nevaipü je?

²⁵ Hanangkü büpa mongshihpü jom kü khüppeih, hatü vehok mangpü heüpeih. Awlomi jom jümlangjao, jomi hapa nenyingaok; awi jom jangtükjao, jomi hapa mongdangei neyah.