ISAIAH 41 - DAÜLANGPÜ LAIHING (BSI)

Kahvangi Israel am kü Sheühhen Epü

¹ Amphongi nenmü ngei epü kü bangtuh, Oh yungkungei nyupüthü! Jatthüi laophülei wong ja kohhütuh, jom chemi peiyei nyem-e; jen chemi shahphen shingei peishah.

² Üpai heongphi leipü hampa hük vamhütü laophülei dousho shing nyükpa? Büpai jatthü büpalei lak kü shuohnyeih, hatü ongthü büpalei la-i shouptüknyeih; Büpalei yanlui jomphongü bhihla leitüknyeih; büpalei lahhani hahbhang vanglüki deipükei deilangnyeih.

³ Büpai jomphong kü changei dainyeih, hatü kahdok kü la-ao meishi neshoupi longi shülangshi, shejao huluh püchong neheüi dainyüpeih.

⁴ Üpai hapa dükei heihpa? Üpai büshah tuhhen hannya? Ngei, Shembüpa chongpangpülei nyupeih, Ngei, Shembüpa dohpü thahshi nyukahen.

⁵ Yungkungei nyupüthüi ha eeteke, hatü nyemei kheüteke. Hanangkü jom peü thaitü peinyüke.

⁶ Hüki hük kü sheühteinyüke, hatü hüki hük kü, “Monglongtuh” shei eteinyüke.

⁷ Mistri hüki hon shükbü kü, hatü kaoklak noshi lajei nyülüki thüngpübai, kojal appü shennyak kü, “Nyiam happü baong longi meiangke yo?” shei eteinyüke, hatü nejenlenhen mü jomi ha kü kojali apnyüke.

⁸ Shejao nüng, Oh Israel, ngelei chongphobü, ngei jepü Jakob, ngelei mongjempa Abrahamei hühihathü,

⁹ ngei amphongü kahdok dohpü leipü müei leipeih; ngei tailu kahdok vaungjung leipü am nyükpeih, hatü ngei amphong kü, “Amphongü ngelei chongphobü; ngei amphong jepeih, hatü ngei amphong neyakphongpih” shei epeih.

¹⁰ Hanangkü amphong tenyem; mehenangkü ngei amphong mü nyüpeih; amphong tehan; mehenangkü ngeiyü ammei Kahvang; Ngei amphong wong kohhühen; ngei am kü sheühhen, ngelei aokpü laki ngei am shongei tuhhen.

¹¹ Üami am khüei yaongnya, hingmei mü veü ponghen, hatü lomohhen; Üami am khüei hoknya, mahhen hatü kong leidaihen.

¹² Amphongi ammei vepathü yemjao ammi jom nedanghen; Üami am khüei hoknya mahhen, hatü kong leidaihen.

¹³ Mehenangkü ngei, Shembüpa, ammei Kahvangi ammei lakdahphi kü khaaihen; hatü amphong kü, “Tenyem, ngei am kü sheühphahen” shei epeyü ngei hih.

¹⁴ Tenyem, Oh laonghayakha Jakob, Oh maanpü Israel! Ngei am kü sheühhen shei Shembüpa, ammei Yemleipüba, Daülangpü Israel Kahvangi enyüke.

¹⁵ Ngei amü hah hi aung ngümteipü kol ja nahshi hatü bha longi kohpükei leihühen hih. Amphongi kahshangthü ngümtükhen, hatü shangchingthü hahbhang kei leitükhen.

¹⁶ Amphongi hathü shaptükhen, hatü vanglüki hathü maoei deilanghen, hatü yinglükpalei-i hathü haitükkemhen.

¹⁷ Mechem taopa hatü ne-angpüthüi yung yemhen, hatü ha nedangi yung lepai jomei üng üdaihenshang, Ngei, Shembüpai jom kü janghen, Ngei, Israel Kahvangi jom netuhphongpih.

¹⁸ Kahngadok, shangchingthü kü ngei yungnyü vamhühen, hatü kahjithü kü ngei yunglok bhaohühen; Bhih kahdokao ngei yungkuk leihühen, hatü kahngadokü yunglok bhaoshing leihühen.

¹⁹ Bhih kahdok kü ngei cedar, akacia, myrtle hatü olive püthü kohhühen; Jahpandok kü cypress, fir, hatü awkaong püthü vamhühen;

²⁰ shejüang nanglakthü peüi hapayü Shembüpalei lak, Israel amei Daülangpü Kahvangi dükpü khih shei eehen, nyinghen, deihhen hatü danhen.

Lajeithü Mangtükhen Nang

²¹ Amphongei shah shahphenshingei deikeishei Shembüpai enyüke; Amphongao meshük thahshi shah kü dakteiaokhen deikei, shei Jakobei Ongpai enyüke.

²² Jomphongi lajeithü nyemdeikei, hatü mehe vamkahen teteivanei nyem-ekei. Hami hathü nyinghen hatü dohpülei mehe vamkahen ha nyinghen shangmü peihdaipü douthü jung nyem-epha; nevaijü ham kü ngoikahen douthü nang nyem-epha.

²³ Amphongü kahvangthü khih shei nyinghen shingvaishi hapheikü mehe vamkahen ha ham kü eshih; Ham nyemhen hatü hanhen shingvaishi ten hük nevaijü mei hük dükshih.

²⁴ Shejao amphongü kong, ammei douthü yahlak neshiü; amphong kü khümpüthüao jiühitnalaipüthü khih.

²⁵ Pehephi leipü hük ngei vamhüpeih, hatü büpa pei; büpayü heongphi leipü men homei nyükpeih. Büpai vanglem lembüthüyü shemshak kü shihtü shütükhen; dük shükbüi ashem kü nyeüpükei nyeütükhen.

²⁶ Chongpangpülei-üng jeni nyinghen shingvaishi, hatü shelei mebü-üng jeni, “Büpa jiüpü khih” shei ehen mü üpai hapa epa? Hapa jung epü, hapa baongpü nüngi shah epü danpü üpayao neshiü.

²⁷ Zion kü hapa jung shongei epü, hatü Jerusalem kü shahjangmei shuohpeyü ngei hih.

²⁸ Mechem kahvangthü khongkü ngei veihenshang, üpaiyao shah phahükao ne-enyu; ngei phepü shah kü üpaiyao nelahnyu.

²⁹ Hathü kahvangthü peü yahlak neshiü; jomei douthüao kong, jomei lajeithü wong neshiü hatü kong khih.