ISAIAH 40 - DAÜLANGPÜ LAIHING (BSI)

Nyiushemmei Monglempü Shah

¹ Nyiushem meituh ngelei nanglakthü nyiushem meituh shei ammei Kahvangi enyüke.

² Jerusalem nanglakthü kü yawh-eiyangei etuh, hatü pinnyü kü, “Hepak luangi shanghahpü dohdaiteke, pinnyülei mang tükteke, jomei mang shingvaishi SHEMBÜPAleipü jomi shingnyi dangteke shei baongeishuoh.

³ Hüki nyükpü ngeü: ‘Amphongi jahpandok kü Shembüpalei lem temtuh; Jenei Kahvang shingvaishi jahpandok kü lemnyüshong hük kangshangi lingtuh.

⁴ Kahji peü longei anshihhen; Kahshang hatü shangtao peü kahji leihühen; Khappükhungpü kahdok peü ai jiüei leihen, hatü vakhivien kemei shingmeiji leidaihen.

⁵ Hahepak kü Shembüpalei müknyinshekhang shakei vamkahen, hatü hangkuli peüi hapa eehen; mehenangkü Shembüpalei ju kübü ha vamei eteke.’ ”

⁶ Ngeü hüki, “Lentuh!” shei enyüke. “Ngei mehe lenhenang?” shei pheteke. “Hangkuli peü phenhavunglak leangke, hatü jomei müknyinshekhangü kahdoknyü chübongale leangke.

⁷ Phenhavunglak kaudainyüpeih, hatü chübongalethü laaidainyüpeih; mehenangkü Shembüpalei ngüi hathü kü dunyüpeih; Hingmei hangkuliyü phenhavunglak khih.

⁸ Phenhavunglak kaudainyüpeih, hatü chübongthü laaidainyüpeih, shejao jenei Kahvangei shah denden kü nyuhen” shei baongtuh shei ephüteke.

⁹ Kahshang shaopülei aongtuh, Oh Zion, shahjang meipü baongeishuoh; Wongmü ngeüwong antuh, Oh Jerusalem, shahjang meipü yaneishuoh. Nyempü neshiüi etuh; Judah jilathü kü, “Ammei Kahvang peikünyüke” shei eyeishuoh.

¹⁰ Veituh, Shembüpa Kahvangü ngan mü peikünyüke, hatü büpalei laki vanglem lemnyüke; Veituh, büpai thintho kotü laophülei nanglakthü mü peikünyüke.

¹¹ Mi yombü hük keiha büpai laophülei mi haümnyeih; büpai mi chehathü laophülei laki mongdang kukei deiyei paümnyeih; Büpai mi chenyüthü youngmü atei leinyüpeih.

Neshetnephenaokpü Kahvang

¹² Üpai laophülei lakei yungching notü shet-aoknya? nevaijü laophülei lakkhami vangshothü shetaoknya? Üpai mühdow kü shihtü kahdoknyü noei aoknya? nevaijü kahshang hatü shangtaothü dok kü shihtü dokaoknya?

¹³ Shembüpai mehe dükhen hanei ami eshuoh-aokhen hiang? nevaijü nyuhbü hük keiha büpa kü nyuhaokhen hiang?

¹⁴ Deih-ei lehen shingvaishi Shembüpai üpa kü pheyeiyupa? hatü üpai büpa kü jiüpü lem nyuhshuohpa? Büpa kü nyingpühingpü hatü danaokpü kon üpai hushuohpa?

¹⁵ Hingmei, Shembüpa shingvaishi jatthüyü yungdükei yung jük hük shühpü keiha; jomphongü dok kü bhihla hük keiha; büpai shübaongthü kü bhihla hük kü kei deihnyüke.

¹⁶ Lebanon püthü kemei agjao moidülei jakhen nechangpih, nevaijü haleipü phaüyemthü peü thaijao Shembüpa kü jakpü moila shuohhen nechangpih.

¹⁷ Büpa touei jatthü kemei neshiüpü keiha; büpai hathü keyü neshiüpü kong shei deihnyüke.

¹⁸ Nüngi Kahvangü üpa mü shetteiaokhen? nevaijü büpayü mepa mü sheteiphenaokhen?

¹⁹ Lajei hük je? hapayü lingbü hüki lingpü khih; hapa kü hon shükbüi honi shaoktü ha kü nyiamvüi shentü lingpü khih.

²⁰ Hon hi ngini nelingaokpü taopa hüki nemagbenüng pü yah-ei nelaamdaihen mü lajei linghen dou manpü lingbüi hapa shuohnyüke.

²¹ Nüngi nenyingangpü je? nüngi nedanangpü je? Chongpangpülei-üng nüng kü hapa ne-ephaangpü je? Kahdoknyü chongpanghinüng nüngi ha nedanangpü je?

²² Büpai kahdoknyü toilangpü shangkü ong uoshing kü uoshi nyüke, hatü haleipü shennyakthüyü shoukha melaü kei nyüke. Ashak paanpü keiha büpai vangshothü paanhüpeih, hatü nyuhen shingvaishi ashakshem paanei vepü keiha büpai hathü paanhüpeih.

²³ Büpai longhiongthü kong leitüknyeih, hatü kahdoknyü vanglem lembüthü neshiüi leitüknyeih.

²⁴ Jomphongü shaang shompü nevaijü haiphongpü sheili kahdokei tünglang yiüei pangpü keiha nyüke. Mechem Shembüpai vanglük shomhen, jom kaudainyüke, hatü hahbhang keiha alüngleple-i jom maoei lüdainyüke.

²⁵ Amphongi ngei üpa mü sheteiphenhen? nevaijü ngei mü hükkeipü üpa nyüpa? shei Daülangpü Hüki enyüke.

²⁶ Vangsho philei ngangei veituh: Üpai hathü lingpa? Büpai lithathü hük hük ieyei kü men menei nyüke. Büpalei ngan hatü wong longpü homei hathü hükao nemahtüki nyüke.

²⁷ “Shembüpa toueipü ngelei lem jolangteke, hatü ngelei Kahvangi ngei kü jiüpü nedükphünyu” shei mehekei langmaannya, Oh Jakob; mehekei eelanya, Oh Israel?

²⁸ Shembüpayü nedohnetenpü Kahvang, kahdok dohpü junghijang peü Lingbü shei ammi nenyingpü je hatü nedanangpü je?

²⁹ Büpai nyiupünangpüthü kü wong, hatü wong nekohpüthü wong kohhünyeih.

³⁰ Thehilathü dangkao nyiueinangei wong nekoh-i nyunyüpeih, hatü nethethüi huluh shuohtü donyüpeih;

³¹ Shejao üami Shembüpa kü omdannya, jomi wong ja danghen. Jomi alangthü kei shangei piyei aonghen; jomi mokhen, shejao nenyiuhen, jom kamhen, shejao la nemeihen.