ISAIAH 36 - DAÜLANGPÜ LAIHING (BSI)

Sennakeribi Jerusalem kü Nyemshaopü

¹ Hezekiah ong vaipü bong anpüalipabü kü Assyria am Sennakerib ongpa peiyei penyü showtükpü Judah chingnyüthü hah.

² Assyria ongpai Lakhish leipü Jerusalemei nyupü Hezekiah ongpa touei veshan mübü hük veshan khong longi mütü shom. Büpai ashak dhopüthülei kahlei shapü lemei Dokpa Yungkuk touei yaong,

³ hatü ongshem veibü Hilkiahlei cheha Eliakim, hatü laknyangbü Shebna, hatü Asaphei cheha Joah, nyangbü büpa mü pongteihen vamteke.

⁴ Hapa veshan mübüi jomphong kü Hezekiah kü hapakei etuh shei e. “Longpü ongpa, Assyria ongpai hapakei enyüke: Nüng mehe kü mongnyangtü nyunya?

⁵ Nüngi shah mon epai hokhen düklingyangyeüei hatü wong nyüpeih shei deihnyu je? Ngei mü khüei yaonghen mü nüng üpa kü mongnyangnya?

⁶ Veituh, nüngiyü tetdaipü lenshuoh nopü shennyak lak kü hühhahpü nevaijü aokhahpükei shepü Ijip am kü mongnyangnyu khihma. Ijip amei Pharaoh ongpa kü mongnyangpü peü kü büpai hei mon düknyüpeih.

⁷ Shejao nüngi ngei kü, ‘Hami Shembüpa, hamei Kahvang kü mongnyangnyeih’ shei ejema, Hezekiah-i vaümchong hatü moidü kemei bentüktü Judah hatü Jerusalem am kü, ‘Ammi moidü hük touei mon khümtuh’ shei epeyü ha Shembüpa nevaipü je?”

⁸ “Teü, shaang nüngi ngelei shembü Assyria ongpa touei maanpü leituh. Nüngi hathü koyei kü uohen shennyak dangülashang kü ngei koyei haja nyi yahphahen hih.

⁹ Ijip ami nüng kü koyei khari hatü koyei veshan yahphahen hih shei ejao nüngi ngelei shembü ongpalei peü mü maanpü lakchongbü mü dangkao mekei etü hokaokhen?

¹⁰ Nyeinya vaishi ngeiyü SHEMBÜPABÜPA neomi hapa kahdok mahtükhen peiküpeih shei deihnyu je? Shembüpai ngei kü hapa kahdok khüei yaonghen hatü mahtükhen ephopeih”

¹¹ Hahepak kü Eliakim, Shebna hatü Joah hathüi veshan mübü kü, “Hami Aramaic shah danyaki hapa shah mü eshih; bham touei nyupü nanglakthüi danshi hamphong kü Hebrew shah mü te-ekei” shei e.

¹² Shejao veshan mübüi, “Ammei ongpa hatü amphong shingvaishi mon hapa shah ehen ngelei shembü ongpai shompeih shei deihnyu je? Bham touei uoshi nyupü shennyakthüao amphongi kei-üng laophülei ih hahhen hatü shien yinghen hih shei nedeihnyu je?” shei e.

¹³ Hapheikü veshan mübüi yaongtü wong mü lenei Hebrew shah mü, “Longpü ongpa, Assyria ongpalei shah bangtuh!

¹⁴ Ongpai hapakei enyüke: Hezekiah ongpai am kü telutelemhah; mehenangkü büpai amphong neyangaokpih.

¹⁵ Shembüpa kü hinglemtuh shei Hezekiah-i am kü yawhpü kü tevü. ‘Shembüpai jen yangphahen, büpai hapa chingnyü Assyria ongpalei lak kü neshuohtükpih’ shei enyüke.

¹⁶ Hezekiah-i epü kü tebang. Assyria ongpai hapakei enyüke: Ngei mü chingmei lingtuh, hatü ngei touei peikei, shejüang peüi laophülei nyalingngupai kah leipü nyalingngupai, hatü adhajük hahhen, hatü laophülei yungkuk leipü yung yingaokhen.

¹⁷ Ngei peiyei ammei kahdok keiha hahying hatü yiü, aan hatü nyalingngupai kah nyupü kahdokei shetei mangdeilangi ngei touei shakei vamdaikei.

¹⁸ ‘Shembüpai jen yangphahen’ shei eshi Hezekiah-i müpü lemnyong kü am tekam. Assyria ongpalei lakmong leipü mepa jatei kahvangi laophülei kahmük yangei nyüpa?

¹⁹ Hamath hatü Arpad amei kahvang melei nyüpa? Sepharvaim amei kahvang melei nyüpa? Jomi ngelei lakmong leipü Samaria am yangaokla?

²⁰ Hathü jatthülei mepa kahvangi ngelei lakmong leipü laophülei kahmük yangei nyüpa? Shejemü mekei etü Shembüpai ngelei lakmong leipü Jerusalem yangaokhenang?” shei e.

²¹ Jomphong kü ongpai, “Meheyao shah teleitei” shei eshuohpü nangkü jomi meheyao shahnyok neleitei-i nenmü nyu.

²² Hapheikü ongshem veibü Eliakim, Hilkiahlei cheha, laknyangbü Shebna, hatü Asaphei cheha Joah nyangbü hathüi mongmangei jomei ashakviha shaaktüktü Hezekiah touei leiyei veshan mübüi mehe eshuoh, ha büpa kü eshuohteke.