ISAIAH 35 - DAÜLANGPÜ LAIHING (BSI)

Yangei Nyupüthü Mongong

¹ Bhih kahdok mongonghen, hatü yingnyü yingchongei chübong punghen;

² Kolap chü keiha hapa punghen; hapa longi mongonghen hatü mongongpai lenhen. Lebanon amei müknyinshekhang, Karmel hatü Sharon nethe meipü hapa kü shuohhen. Jomi Shembüpalei müknyinshekhang, hatü jenei Kahvang nethe meipü eehen.

³ Wong nekohpü lak wong kohhütuh, juwdaipü lashüh wong kohhütuh;

⁴ Nyempüvüngpai mapü mongdangthü kü, “Wong kohtuh, tenyem, ammei Kahvang peikahen, nyemshi bhüh yemhen büpa yiükahen, büpai am yanghen yiükahen” shei etuh.

⁵ Hahepak kü mükphüngpüthü mük aphen, hatü dhaong aangdaipüthüi danhen.

⁶ Hahepak kü la khodaipüthü meishiy keiha phaukteihen, hatü shah ne-eaokpüthüi mongongpai lenhen. Yingnyü yingchong leipü yung bhaoei vamkahen, hatü bhih kahdok leipü shoha bhaoei yenkahen.

⁷ Bhihshamü yungkuk leidaihen, kahvan bhaoei yunglok vamkahen. Chem hepak shahhishuw nyupü shing kü pingu hatü yeih kohhen,

⁸ hatü halei lemnyüshong hük nyuhen; ha kü, “Daülangpü Lem” shei nyükhen. Nedaünelangpüthü hapa lem kü nekamhen, shejao hapayü Kahvangei shennyakthü shing mon nyuhen. Nemeipü, ngapathü hapa lem kü nekamhen.

⁹ Halei mailang nechongkahen, nevaijü mepa meishih nyahmangao nepeikahen; Hathü halei ne-eehen shejao yemleipüthü mon halei kamteihen.

¹⁰ Hatü Shembüpai angei leipüthü halei nyokei leihen, hatü Zionlei kesho lokyaki leikahen, Nedohnetenpü mongong jomei shangjing kü thenshi nyuhen, jomi mongong monglepü mon danghen, mongmang mongyim thenshang mongtüng peü jom toueipü nyaidaihen.