ISAIAH 34 - DAÜLANGPÜ LAIHING (BSI)

Kahvangi Vepathü Shahphenhen

¹ Yopailei peikei, Oh jatthü, hatü bangtuh; Oh shennyakthü kenhingtuh! Kahdoknyü hatü halei nyupüthü peü, kahdoknyü hatü haleipü vampüthü peüi bangtuh.

² Mehenangkü Shembüpai jatthü peü kü mongshih-ei nyüke; büpalei mongpuk jomei veshanthü mü nyüke. Büpai jom peü mahtükhen, büpai jom jühen lanei shuohtükhen.

³ Jomei mahng kemei yaktükhen, jomei mahng shie bühen; kahshangthü kü jomei iy yenhen.

⁴ Vangsho lithathü, lennyü vanghe kemei mahdaihen, phumshangthü peü phaishuw kei düdaihen. Lithathü kemei nyalingngupai lak vanei, bhukjükpülei bhukjük vanei vüpükei vüdaikemhen.

⁵ Shembüpai büpalei yanlu vangsholei temteke; veituh, hapayü Edom am büpai mahtükhen shei tempü shennyakthü touei yüshihhen.

⁶ Shembüpalei yanlu-ü moila shuohpü mi, hatü yum iy, milei she kübü cheü keiha, jomei iy-i haiyei hatü cheüi jümshi nyüke. Mehenangkü Shembüpai Bozrahlei moila shuohhennyüke, hatü Edomei jühen longi nyüke.

⁷ Jomü mangpü mohohbaong dopü keiha, hatü mohoh baongha jüpükei jükemhen. Jomei kahdokü iy yenpai bhümlanghen, hatü cheüi bhihla-ao jümlanghen.

⁸ Mehenangkü Shembüpai bhüh yemhen nyih hük nyüke; Zion med kü dah shakhühen bong hük nyüke.

⁹ Edom amei shohinga kemei kahmongei ngamdaihen, hatü kahdok cheü kemei awkaong meli kei leidaihen; jomei kahdokü aw jakteipü kahsha kei leidaihen.

¹⁰ Nyakhingai thüngei hapa aw nemethen; haleipü awshit düngei nedoh-i vamhen. Hüdenhalenshi hapayü vüngmaki tuhhen; den den kü üpaiyao hapa homei nelongteihen.

¹¹ Shejao asha alang nyuishing, ashühlaongkaong hatü asha paümshing leidaihen. Büpai Edom am viong mü shükei bukpüshaanpü nepongpaüpü shuohhen.

¹² Jomei longhiongi halei ongching nyüpeih shei ehen mü meheyao nenyuhen, haleipü longli ongli peü mahdaihen.

¹³ Ongshem peü hüh longei lümlanghen, hatü penyüsha kemei hühhihangi jümlanghen. Hapa shingü shuwthü hatü Ostrikh outhülei chephijaan leidaihen.

¹⁴ Phaüyemthü halei longteihen, kahshih shepe hüki hük mü nyükteihen. Vangnyak kü longteipü nyüha kahshih halei nyushing danghen.

¹⁵ Halei ashühlaongkaongi jep lingtü ati tiyei cheha sheiyei longhen; Halei langdathü bihibaong thaikemhen.

¹⁶ Shembüpalei laitap kü veituh hatü ietuh: Halei hathü yemhimakthü hükao neshiüi nenyuhen; hükao chebi nevaijü chebaong neshiüi nenyuhen. Mehenangkü Shembüpalei jui ngeükhüam shuohteke, hatü büpalei laanghai hathü chemi thailanghen.

¹⁷ Büpai hathülei phaihan shuoh-ei nyüke. Büpalei laki hathü kü shetei shuoh-ei nyüke. Jomi hathü den den shing yahhen hatü halei nyuhen.