ISAIAH 33 - DAÜLANGPÜ LAIHING (BSI)

Sheühpü Yüei Phoppü

¹ Üamiyao am leipü negühgüh-i, üamiyao am kü nelunelemlemi güh-ei lueilempüthü! Mechem ammi gühpü dohhenshang, am leipü gühlanghen, mechem ammi mih kü lueilempü dohhenshang am kü lueilemhen.

² Oh Shembüpa, nüngi ham kü phahjishih; hami nüng omdannyeih. Nüngü nepjeih hamei wong, shanghah hepak kü ham yangbü vaikei.

³ Vangmuk keipü nüngei ngeüi shennyakthü nyaidainyüke; mechem nüng yaonghenshang jatthü yandainyüke.

⁴ Ammi mophimo thaiyei shüngnyüke, hatü shoukhanbaong yow keiha shennyakthüi laongei shetei lüdainyüke.

⁵ Shembüpayü meshük longpüang! büpa shangei nyüke; büpai Zion shahhingi, hatü daülangshemshepai mahüteke.

⁶ Ammei nyih kü büpai am shingnüng chongkhenhühen; Büpai yemleipü, kihikon, hatü nyingpühingpü shuohhen; Shembüpa kü nyempeyü Zion amei mop longpü vaihen.

⁷ Veituh, jomei mong longpü shennyakthü chingshongei vaüei eenyüke; chingmei kopüthü shahyaki thepnyüke.

⁸ Longteipüthü neshiüi lemnyüshong vüngmaki leidaiteke. Shahkungnyü mangtük, lahteipü peü bentük, üpaiyao hapa kü dhüm neshuoh.

⁹ Kahdok vandai, hatü lavüngtoiyei leidai, Lebanonü veüshi vandaiteke. Sharonü bhih kahdok leidai, Bashan hatü Karmel Kahshang kübü phenlakvungpha peü kaongdaiteke.

Vepathü kü Shembüpa lei Shahvüng

¹⁰ Shembüpai, “Shaang ngei yaonghen” “Shaang ngei longei aonghen” “Shaang ngei shangei aonghen” shei enyüke.

¹¹ Ammi aungjaangao nejükhen küpjan temnyüke; ammi angsha dou düknyüke. Ammei ngüyü am hahtükhen aw khih.

¹² Dhon leihühen yaong aw kü jakpükei am jaktükhen, hüh jempaan jakpükei jaktükhen.

¹³ Tailuei nyupüthü, ngei mehe dük, ha bangtuh, yopailei nyupüthüi ngelei wong hi ngan nyingtuh.

¹⁴ Zion leipü mang shennyakthüi nyemnyüke, Kahvang nenyingpüthü kü nyempüvüngpü peiteke. “Jenphong khongkü üpai laiyeilungei hahpü aw kü nyuaokhen? Nedoh-i bahshi nyupü aw kü jenphong khongkü üpanyuaokhen?”

¹⁵ Üami kangshangi kamnya, hatü jiüpü enya, aetpüshepü homei nanglei dangpü üami yaktüknya, hatü yawhdou neyah-i laophülei lak yeplangnya, jüteishangteihen tempü küpjan kü dhaong neshaangnya, hatü nemeipü kü nevei-i laophülei mük ngühdainya,

¹⁶ jomphongü yangei shaopü shingei nyuhen, jomei nyushingü yaong penyüsha nyuhen. Jom kü hahying changshi shuohhen, hatü yung netao-i bhashahshi danghen.

Ngoikahen Müknyinshekhang

¹⁷ Ong hüki nethe meipü kü vanglem lempü, hatü kahdok bahiyang daei daipü ammei müki eehen.

¹⁸ Ammei mongkü, “Hapa lakchongbü longpü melei daipa? kahdok lat thaiteipü melei daipa? Shangdüthü kü khei vaipü shennyak melei daipa?” shei shelei nyemtükpü leyei peikahen.

¹⁹ Ammi hajük kü hapa changmeipü shennyakthü; ammi nedanaokbenüng shah epüthü, hatü yepei neaokbenüng shah ükei epüthü ne-eehen.

²⁰ Moeitapei nyupü Zion chingnyü kü veituh; Chingmeivangmei shinghiphei, mechemao bhiyei nedaihen Jerusalem ashakshem ammei müki eehen; haleipü shemha hükao leüh-ei nedaihen, nevaijü haleipü vü hükao nephenhen.

²¹ Halei wong kohpü Shembüpayü jenei vaihen; hapayü ba longpü yungnyü keiha nyukahen. Halei li yaatei nekamteihen, nevaijü jahas longpü nelongteihen.

²² Mehenangkü Shembüpayü jenei shahphenbü; Shembüpayü jenei shahkung shuohbü; Shembüpayü jenei ongpa, büpai jen yangphahen.

²³ Jahas kü shenpü nyiamvü peü laidaihen, haleipü nyiamlüng juwdaihen, ailüng neyaat-aoki leidaihen. Jeni vepathülei mophimo kemei hanlanghen; hahepak kü lakhopaiyao büpalei phaihan koei leihen.

²⁴ Zionlei nyupü üpaiyao, “Ngei tüngei hih” shei ne-ehen. Halei nyupü shennyakthü kü jomei mang tüktükhen.