ISAIAH 32 - DAÜLANGPÜ LAIHING (BSI)

Daülangpü Ongching Hük

¹ Veituh, ong hüki daülangshemshepai, hatü vanglem lembüthüi shahhingi vanglem lemkahen.

² Jom peüi vanglük kü joshing keiha, hatü yinglükpalei kü sho joshing keiha, kahngadok kü yung shapü keiha, hatü kahvan kahdok kü yaongnyü dhüm keiha nyukahen.

³ Hahepak kü üamei müki eenya, jomei mük nengühhen, hatü üamei dhaongi dannya, bangei nyuhen.

⁴ Dou ten dükpüthüi hapa nyingei danaokhen, hatü shah ükpüthüi shah lekei eaokhen.

⁵ Hajük kü ngapathü kü pamei shei nenyükhen, hatü shahhing ne-epüthü kü dhüm neshuohhen.

⁶ Mehenangkü ngapa hüki ngashah enyeih, büpalei mongü ten mü nekongi nyunyeih. Büpai Kahvangi nelümpü dou düknyeih, hatü Shembüpa khüei ten enyeih; aeipüthü kü hahhen neshuohnyih, hatü yung lepüthü kü yung neshuohnyih.

⁷ Shahhing ne-epü amei lemü ten mon nyüpeih. Nehahneyingpüthüi jiüpü kü yülangmao, shahshem eyei jomi yüpü mangtükhen shingvaishi jomi küpjan nemeipü yemnyeih.

⁸ Shejao pamei shennyaki pamei küpjan lingnyeih, hatü pamei dou kü büpa yaongnyeih.

Jerusalem Nyühathü

⁹ Laophü kü monglempü nyühathü, yaongtuh, hatü ngei epü bangtuh. Mong lemshi nyupü nelathü ngei mehe enya, ha kü bangtuh.

¹⁰ Bong hük mü maani angpheikü, am mongyangei nyupüthü nyemei kheühen; nyalingngupai kah ngadaihen hatü betjük nejükhen.

¹¹ Kheütuh, laophü kü monglemtü nyupüthü; nentuh, am mongnyangshi nyupü nelathü. Ashakviha nyiuktüktuh, hatü dhoila ashaki ngeihtuh.

¹² Nyalingngupai kah kü betjük nejükpü nangkü jaaba kü daüptuh;

¹³ hatü ngelei nanglakthülei kahdok kü hühhihang longdaipü shingvaishi shem kü mongongpai maei, hatü chingnyü kü mongmeipai maei nyupü deih-ei theptuh.

¹⁴ Mehenangkü ongshem yakphonghen, ngetnahcheüi nyupü chingnyü vüngmaki tuhphonghen; shangching hatü shangdü peü yakphonghen, hatü hapayü gaduthü ngaleshing, hatü mithü het yemhah shing leidaihen.

¹⁵ Shejao shangphi leipü laangha ham kü khüpphahen, hatü bhih kahdok kemei kahcheü kohpü kahdok leihen, hatü hapayü yinghilong kei nyuhen.

¹⁶ Yinghilong mongkü shahhing nyuhen, hatü betjük jükpü kah kü daülangshemshepü nyuhen.

¹⁷ Daülangpülei betjükü chingmei, hatü hapa homei vampü nangleiyü chingmei hatü den kü monglemteipü nyuhen.

¹⁸ Ngelei nanglakthüyü chingmei vangmei nyupü shing kü, nyiushemmei shemthü kü nebaokneshaanpü nyiumei shingthü kü nyuhen.

¹⁹ Phaü kemei shü vüei mangtükjao, hatü chingnyü bentükjao,

²⁰ yungkung kü sheili sheipü hatü mohoh hatü gadu kü het ühshing changshi dangpü am meshük moihimanpüang.