ISAIAH 31 - DAÜLANGPÜ LAIHING (BSI)

Ijip am kü Monglempüthü Onyükei

¹ Üami Ijiplei sheühpü yemei yiünya, üami koyeithü kü mong nyangnya, üami koyei kharithü kü monglemnya, hatü koyei veshanthü khong kü monglemnya, shejao üami daülangpü Israel Kahvang kü neveinya, nevaijü SHEMBÜPAleipü sheühpü neyemnya, onyükei.

² Shejao büpayü kon kohpü, hatü büpai shanghah koei peinyüpeih; büpai etükpü shah nyokei neyahlangnyih, shejao nemeipü shahishem khüei, hatü nemeipü dükpü kü sheühpüthü khüei yaongnyeih.

³ Ijip amü shennyak, Kahvang nevai; jomei koyeithüyü phai, laangha nevai. Mechem Shembüpai büpalei lak nohenshang, sheühbüao huluh shuohhen, hatü sheühhahpüthüao dohen, hatü jom peü chemi mahhen.

⁴ Shembüpai ngei kü hapakei enyüke: “Mailangi het yemei vaüshingkü, mi yombüthüi chemi vaülangmao, jom vaüpai shei mailang nenyempükei, nevaijü nenyülüppükei, Jeiyong Shembüpai Zion Kahshang, hatü haleipü shangtaothü nangkü hokhen yiükahen.

⁵ Outhüi jep leipü chehathü yanghen shangei piteipükei, Shembüpai Jerusalem hunglanghen; büpai hapa Jerusalem hunglangtü yanghen.”

⁶ Oh Israel am, amphong longi nemei-i büpa khüei mang thahteke, shejao büpa touei mong lepei leituh.

⁷ Mehenangkü hapa nyih am peüi laophülei laki mang thah-ei ngin hatü honi linghahpü lajeithü yaktükhen.

⁸ “Hapa nyih Assyria am shennyaki nevai shejao yani mahkemhen; shennyaki nevai, shejao yani lühtükhen. Yan kü nyemei jom nyaihen, hatü jomi jomei nyahbaongthü kangei dou dükhühen.

⁹ Nyempai jomei penyüsha laamdaihen; vehok mangpü eeyei jomei veshan mübüthü tünghen.” Zionlei aw nyupeyü üpaleiang? Jerusalem leipü awbhaongü üpaleiang? shei SHEMBÜPAienyüke.