Biblia Todo Logo
Bìoball air-loidhne

- Sanasan -

ISAIAH 30 - DAÜLANGPÜ LAIHING (BSI)


Ngaaklepü Jatli

1 “Oh ven nedanpü hapeüthü onyükei,” “Üami ngelei küpjan nevaipü kü küpjan lingei dainya, ngei mongpü nevaipü kü üami mang kü mang üei mih mü uwmeilem lingnya;

2 Ngei leipü chudeih neyah-i üami Ijiplei yiünya, üami Pharaoh-i yangphahen shei sheühpü yemnya, hatü Ijip amei vangdhüm kü loihen yemnya, onyükei!

3 Shejao Pharaoh-i am yangpü kü am veühen, Ijip amei dhüm kü loipü kü am maanpü leihen.

4 Jomei lakchongbüthü Zoanei nyujao, hatü jomei lembü Hanez ngoijao,

5 jom kü nanglei neshuohpü nanglakthü homei peü veü danghen; hathüi sheühpü nevaijü nanglei nevai, shejao veü hatü mongmang koei peikahen” shei Shembüpai enyüke.

6 Negeb leipü yemhimakthü nangkü epü shah: Shangpong yakyingpü kahdok homei, mailang chebi chebaongthü, biünyü biütamthü homei jom kü nanglei neshuohhen nanglakthü touei, jomi gadu kü jomei mophimothü, hatü ut kü jomei hon hi nginthü shetnyüke.

7 Mehenangkü Ijip ami sheühpeyü yahlak neshiü. Hanangkü ngei jom kü, “Neheti uopü Rahab” shei nyüknyüpeih.


Ven Nedanpü Nanglak

8 Shaang daituh hatü ngoikahen nyihthü kü denshing denbü vaihen shingvaishi, jom nang yaongshung kü hatü laitap kü nyangtuh.

9 Mehenangkü jomü ven lepü nanglak, lupülempü hapeüthü, Shembüpalei nyuhpüvenpü neyahpü hapeüthü.

10 Jomi manghkhang eepüthü kü, “Hajük kü manghkhang te-ekei” hatü thibüthü kü, “Mehe jiü, hapa nang teteivanei te-ekei shei enyüke. Ham kü mongongbenüng mon eshih, mehe lekahen ha mon eshih;

11 Ham kü lem nüngshih, lem yamshih, ham kü hajük kü daülangpü Israel Kahvang nang tedanhü” shei enyüke.

12 Hanangkü daülangpü Israel Kahvangi hapakei enyüke: “Mehenangkü ammi hapa shah yaktükpü nangkü, hatü depülaopü kü, hatü lawlüppü kü mong shuohpü nangkü;

13 hapa mangü am shingvaishi longi shaopü bham bhaokei ngangahük kü laampükei nyukahen.

14 Hapayü haümdük bhaopükei khih mü nihdaihen; awdep leipü awtao shihhen, nevaijü yung shohen mü nedangi nihdaihen.”

15 Jeiyong Shembüpa, Israel Kahvangi, “Ngei touei mong lepei leikei; nenmü ngei kü hinglemtuh, shejüang ammi wong danghen” shei enyüke. Shejao hapa nedükhüi;

16 “Hami koyei kü uotü nyaihen” shei epü nangkü, ami hapakei-üng nyaihen! “Hami longi la shangshi mokpü koyei kü nyaihen hih” shei ammi epü nangkü am kü changpüthüao longi la shangshi nyukahen.

17 Hük kü nyemei haja nyaihen, hatü pa nga-i nyemshaopü kü am kahshang leipü khüamlung lüng keiha monha manglei thahshi nyaihen.

18 Hanangkü Shembüpai am kü phahjihen dannyüke, hatü büpai am kü shinshanghen yaongnyüke. Mehenangkü Shembüpayü shahhing Kahvang; Büpa kü omdanpü peü moihiman!


Kahvangi Laophülei Nanglak Moihimanhen

19 Oh Jerusalemei nyupü Zion nanglakthü, am hajük kü netheppih. Ammi vaüpü eepü ngeü danei büpai am kü phahjiei deihhen; mechem büpai ha danhen büpai jangphahen.

20 Shembüpai am kü mongmang bhaong üh-ei hanghi yung yingphüjao, ammei Nyuhbü hajük kü nejodaihen, shejao ammei müki lekei büpa eehen.

21 Mechem laknyong nevaijü lakdah lemei lephenshang, ammei dhaongi am pheikü shah hük, “Lemnyü-ü hapa hih, hapa kü kamtuh” shei eyei danhen.

22 Hahepak kü ammi hon hatü ngini shaokei lingpü lajeithü yah-ei ashakten keiha yaktüktuh.

23 Ammi kahdokei haipü sheili shingvaishi büpai vang shomphahen, hatü kahdok kübü vampü hahyingi am shemmei leiyei changshi nyuhen. Hapa nyih ammei mohohthüi koshoya kü phenhani changshi hahhen.

24 Han hokpü mohohbaong hatü gaduthüi meishi shüei shaptükpü het hahhen.

25 Hapa jüteipü nyih longpü kü shangdü kemei benei vüdaihen, hatü kahshang hatü shangtao shaopü peü kü yungyen keiha iy yenhen.

26 Mechem Shembüpai laophülei nanglakthülei makaw thünghen, hatü büpai ma yahhüpü makaw meihühen; hapa nyih lennyü vanghenyü kei khanghen, hatü vanghenyü-ü nyih nyet helushoei hepü keiha shing nyet nyahen.


Kahvangi Assyria am Hanghihühen

27 Veituh, Shembüpalei men tailu leipü peikünyüke, mongshih wong kemei phumnyak keiha awshit vamei; büpalei ju kü mongshih maei, hatü büpalei yei-ü awlom kei nyüke.

28 Büpalei ngü üng thahshi aongpü büng kei nyüke. Hapai jatthü peü maoei deiyei mahtüknyeih, hatü lemnyong kü daihen shingvaishi büpai ju kü nyiam maahünyeih.

29 Shejao Kahvangei nanglakthü amphongü mohitap kü yanüng kesho nyahhai-i mongongpükei nyuhen. Ammei mongü nanglakthüi Shembüpalei Kahshang, Israel amei Yaongnyü touei liping vüngei aongjü mongongpükei nyuhen.

30 Shembüpai büpalei müknyinshekhangpü ngeü peü kü danhühen, hatü büpalei lak mongshihpai awlom mü, phumnyak hatü klang vangteng, hatü shü vüpükei yiükünyüke.

31 Shembüpalei ngeüi Assyria am yantükhen; büpalei lenshuoh-i jom kü bheihen.

32 Shembüpai büpalei lenshuoh-i jom kü bhei shan ieyei phaam hatü harp ngeü mü vamhen. Kahvangi laophü lomei Assyria am mü hokhen.

33 Ongpa jakhen shing yeihshi-üng temei nyüpeih. Hapa awbhaongü chüshi, ba longshi pü shangshi shüngshi nyüpeih. Shembüpalei ngü awkaong meli kü bahpü awlom kei vamei hapa kü aw bahhen.

Phom Naga Bible - DAÜLANGPÜ LAIHING

Copyright © 2005 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan