ISAIAH 29 - DAÜLANGPÜ LAIHING (BSI)

David Chingnyülei Laphen

¹ Ariel, Ariel, David nyupü chingnyü onyükei! Bong hük nevaijü nyi hapakei moeitapei nyuei daituh.

² Ngei Ariel kü shangpong yakying koei peihen, halei theppü, hatü youngpü mon nyuhen, hatü Jerusalemü moidülei iy yenei mapükei nyuhen.

³ Ngei nüng khüei baümtap shinei vehen; Ngei nüng shonei shangdü linghen hatü nüng shümlanghen.

⁴ Hahepak kü nüngi kahmong leipü ehen; kübhih mongeipü nüngei ngeü vamhen. Nüngei ngeü-ü kahmong leipü laanghalei ngeü kei vamhen; kübhih mongeipü nüngei ngeü nümei vamhen.

⁵ Shejao nüngei vepathü longi nyujao bhihla keiha leidaihen, hatü hahbhang kei pilanghen. Ngangahük kü nedeihpü hepak kü,

⁶ Jeiyong Shembüpai vangmuk vangteng mü pedi vükei ngeü longpü mü, hatü alüngleple, yinglükpalei, hatü laiyeilungei hahpü awlom keiha am thümhen.

⁷ Hahepak kü Ariel khüei hokpü jatthü, pinnyü khüei penyüsha mangei pinnyü mü hokpüthü peü yanüng mangh mü,

⁸ aeipü shennyaki nük hah-ei manghtü nepnüng paojajü aeipü lakshing nyupü keiha, nevaijü yung lepü shennyaki mangh mü yung yingei manghtü paojajü yungle nemei-i nyupükei, Zion Kahshang khüei hokpü jatthü nyuhen.

Ne-ienelempü Shahvüng

⁹ Am nyingi ngaei yoiei nyutuh, am nyingi mükphüngdaituh, hatü ne-ee-i nyutuh! Yiü neyingpü kü chokei nyutuh, hatü tüngtüngmüngi kamteituh!

¹⁰ Mehenangkü Shembüpai amphong kü shükshi shihen laangha shuohteke; Thibüthüi büpai ammei mük kü shaktükteke, hatü manghkhang eepüthüi ammei shangjing kü jümtükteke.

¹¹ Am shingvaishi hapa manghkhangü küptükpü laitap hük leshi leidaiteke. Ammi hapa laitap ieaokpü shennyak kü, “Hapa ieshih” shei eshuohjü jomi, “Hapayü küptükpü nangkü ne-ieaokükhih” shei ephahen.

¹² Nevaijü ammi ne-ieaokpüthü kü, “Hapa ieshih” shei shuohjü jomi, “Hami ne-ieaok-ükhih” shei ephahen.

¹³ Shembüpai enyüke: “Hathü shennyakthüyü jomei jui mon ngei yopailei peinyüke, hatü jubenyeijaangi mon ngei kü dhüm shuohnyüke, shejao jomei mong ngei toueipü longi taishi lüdaiteke. Jomi ngei kü khümpeyü shennyaki nyuhshuohpü vanglem kü mon khümnyüke.

¹⁴ Hanangkü shao chem hapa shennyakthü kü hanbenüng, yashanbenüng dou dükhen; nahpüthülei kihikon mahtükhen, hatü yao-aokpüthülei kon nyatükhen.”

Ngoikahen Monglem

¹⁵ Am üami Shembüpa kü ammei küpjan chüloh-i jonya, hatü ammei dou vangnyakei jonya, hatü, “Üpai ham eehen? Üpai ham nyinghen?” shei epüthü onyükei!

¹⁶ Ammi douthü kemei shakhimong leitüknyüke! Dük shükbü kü haüm kahdok kü kei noteihen je? Lingpü doui lingbü kü, “Nüngi ngei nelingangpih” shei eaokhen je? Nevaijü dük hüki dük shükbü kü, “Nüngi meheyao nenyingnyu” shei eaokhen je?

¹⁷ Kansho hük mong aa kü Lebanonü kahcheü kohpü kah leipeih, hatü kahcheü kohpü kah-ü phaü neleihen je?

¹⁸ Hapa nyih kü aangpüthüi hapa laitap leipü shah danhen, hatü manghphang kü vangnyak kao mükphüngpüthüi eehen.

¹⁹ Nentei-aokpüthüi Shembüpa kü mongonghen; nehahneyingpüthüi Israel amei Daülangpü Kahvangkü mongmeihen.

²⁰ Shüveidoideipüthü mahdaihen, mih kü ne-ienelempüthü nyadaihen, hatü üami ten kü veinya, mahtükkemhen.

²¹ Mih kü ühingpüthü, nemeipüthü kü hanghi shuohjü ha kü khüambakpüthü, hatü jiüpü shennyak meheyao ten neshiüpü kü nyongtükpüthü mahkemhen.

²² Hanangkü Jakob phang nangkü Abraham angei leipü Shembüpai hapakei enyüke: “Hajük kü Jakob veü nepongpih, hajük kü jomei dhe nehaipih.

²³ Mechem jomi ngelei lakdou, jomei hapeüthü eehenshang, jomi ngelei men daülangi tuhhen; jomi daülangpü Jakob Kahvang eehen, hatü Israel Kahvang kü nyemei yaonghen.

²⁴ Üami laangha kü lemhaoei daiyei nyu, hathüi danaokpü kon danghen, hatü üami nümnümnya, jomi nyuhpüvenpü yahhen.”