ISAIAH 27 - DAÜLANGPÜ LAIHING (BSI)

Israel am Yanghen Nang Epü

¹ Hapa nyih kü Shembüpai laophülei wong kohpü hatü dihen leü kohpü yanlu yah-ei kaokei nyokei kamteipü Leviathan biü hanghihühen; büpai yungching mongei nyupü hapa biü jütükhen.

² Hapa nyih kü Shembüpalei nyalingngupai kah nangkü hapakei ehen. “Betjük jükpü nyalingngupai kah nangkü hapa kesho loktuh:

³ Ngei, Shembüpai hapa yomnyüpeih; ngei hapa kü nedoh-i yung ünyeih. Üpaiyao hapa nemangtükhen shingvaishi ngei nyihjeih yajeih hapa yomnyüpeih.

⁴ Ngei mongneshihnyih. Hühhihangi ngei kü lem bangei vamküjema, ngei hathü khüei vehokei daihen, hatü ngei hathü peü aw kü jaktükhen.

⁵ Hei nevaijema jomi ngei touei loihen peihütuh; jomi ngei mü chingmei nyemling. Hih, jomi ngei mü chingmei nyemlinghah.

⁶ Ngoikahen nyihthü kü Jakob am tünglang yiühen, hatü jomi nien neenei bong punghen, hatü kahdoknyü peü kü betjüki mahen.

⁷ Israel am kü bheipüthü kü bheipü keiha, Shembüpai Israel am kü bheiphei hiang? Nevaijü jom jüpüthü jüpü keiha jom jüei nyüpü hiang?

⁸ Shembüpai laophülei nanglakthü wüpküpei deishihpai hanghihüteke. Büpai jom mangpü heongphi leipü yinglükleisho touei changei deishih.

⁹ Hanangkü Jakobei mang tüktükhen, hatü hapayü jomei mang kemei tüktükpü betjük vaihen. Mechem yaongdhon khih mü ngümpü keiha büpai moidü yaongthü peü linghenshang, nyüha kahvang Asherahlei lajeithü, nevaijü hapalei moidüthü hükao yaongshi nechongkahen.

¹⁰ Penyü showtükpü chingnyü-ü lavüngtoiyei chongkahen, hangku nyushingü yingnyü keiha vüngmaki leidaihen. Halei mohohthüi het hah-ei lemeileyei, haleipü phenha vunglak peü meeklanghen.

¹¹ Mechem hapalei kaohilak dihen, hathüyü bhaglanghen; nyühathü peiyei hathü yah-ei aw kü jaktükhen. Mehenangkü hapa nanglakthü kü danaokpü neshiü. Hanangkü jomei Lingbüi jom kü nephahji hatü neshinshang.”

¹² Hapa nyih kü Shembüpai Euphrates yungyen kübü Ijip viong thahshi am Israel am hük pheikü hük thailanghen,

¹³ hatü hapa nyih amit longpü vünghen. Üamphong Assyria kahdokei mahei nyu, hatü üam Ijiplei wüpküpei nyu, hathüi Shembüpa kü khümhen shingvaishi daülangpü Jerusalem Kahshangei nyokei leikemhen.