ISAIAH 26 - DAÜLANGPÜ LAIHING (BSI)Menvih Kesho 1 Hapa nyih Judah kahdokei hapa kesho lokhen: Jenei chingnyü wong kohshi nyüke; Kahvangi aokpü dangpeyü bham shaungpükei, hatü kahdok shaopülei lingei nyüke. 2 Hinglempü nyupü daülangpü jatthü shühen shingvaishi shaden apshih. 3 Üami mongdangi nüng kü hinglemnya, nüngi jom den ngoipü chingmei kü tuhnyeih; mehenangkü jomi nüng kü hinglemnyüke. 4 Den kü Shembüpa kü hinglemtuh; mehenangkü Shembüpa, Jeiyong Kahvangü nedohnetenpü loishing Yaongnyü. 5 Büpai shaopülei nyupüthüao maanpü leitüknyeih; büpai kahshang kübü chingnyüao kahdok kü jeetshi chongei shüei shannyüpeih, hatü kübhih kü dungtüknyeih. 6 Hanghiyei nyupüthüi hatü taopathülei la-i hapa kü shouptüknyeih. 7 Daülangpüthülei lemü lemnyeü meishi, hatü hingshangpüthülei lemü nyülüki nyüke. 8 Oh Shembüpa, nüngei shahkungnyü lem kü kamei hami nüng omdannyeih; nüngei men hatü nüngei menmeiyü hamei laanghaiyahhüpü. 9 Ngelei mong kü yanüng nüng young leyei peikünyeih; nepnüng ngelei laanghai nüng ongyangei deihkünyeih. Mechem nüngei shahphenpü kahdoknyülei peiyei nyunya, kahdoknyülei nyupüthüi shahhing ehen nyingnyüke. 10 Nemeipüthü kü phahji hushuohjao jomi jiüpü dükhen nenyingnyu; daülangpüthü nyupü kahdokei dangkao jomi ten düknyüke, hatü Shembüpalei nganhilong kü ne-ienelemnyu. 11 Oh Shembüpa, nüngei lak haongjao, jomi ha ne-eenyu. Nüngi laophülei nanglak kü nyakpükenpü jomi nyem-ee, hatü hai danghütuh. Nüngi laophülei vepathü shing yaongei tuhpü awi jom hahtükhütuh. 12 Oh Shembüpa, nüngi ham kü chingmeivangmei lingshih; hami dükaokpü peü kemei nüngi dükpü douthü mon. 13 Oh Shembüpa, hamei Kahvang, nüng mü lenei lebü shembüthüi ham kü vanglem lemteke, shejao nüngei men kü mon hami dhüm shuohnyeih. 14 Hathüyü shaangü didai, hatü yemmü nenyu; didaipü hapa laanghathü yangei neleinyu. Nüngi hathü kü hanghi shuoh, hatü lomohhü; hathü deih-ei nedanghen mü nüngi jomei mongdeihthittük. 15 Nüngi jat longhü, Oh Shembüpa; nüngi jat dahü. Nüngi laophü shing müknyinshekhang dangteke; nüngi kahdok kübü viong dahüteke. 16 Oh Shembüpa, shanghahpü nangkü jomi nüng yemteke; mechem nüngi jom kü lohshuohpa, jomi nümei dangkao phopnyüke. 17 Nyüha hüki büm nekongi naü bühhen hepak kü tüngpü nangkü vaüpü eepü keiha, hamao nüng touei hapakei nyupeih, Oh Shembüpa. 18 Hamü büm nekongi nyupeih, tüngpai vaüei nyupeih, shejao hami vanglükang bühpeih. Hami kahdoknyülei vehok neneü; hami meheyao aokei dhangei nenyu. 19 Shejao nüngei nanglakthü didaipü yem leikahen, jomei büm yangei leikahen. Oh mahngchongei shishi nyupüthü, paotuh hatü mongongpai kesho loktuh. Nyieni nepnüng dhom mü kahdoknyü thahümahüpü keiha, Shembüpai shelei didaipüthüao yem leihühen. Shahphenpü hatü Lingei Leipü 20 Ngelei nanglakthü, sha küpei ammi laophülei dungei shüdaituh; Kahvang mongshihpü mangpeih thahshi am kanja jodaituh. 21 Kahdoknyülei nyupüthü kü jomei mang nangkü hanghi shuohhen shingvaishi Shembüpai büpa nyushing leipü vamei daikünyüke. Kahdoknyüi pinnyü shak kü iy yenpü küpei neaokhen; pinnyüi mahpüchahpüthü joei neaokhen. |
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
Bible Society of India