ISAIAH 24 - DAÜLANGPÜ LAIHING (BSI)

Shembüpa i Kahdoknyü Hanghihühen

¹ Veituh, Shembüpai hapa kahdok yakphonghen, hatü lavüngtoiyei tuhphonghen mon nyüke, hatü büpai kahdok shak mangtükhen, hatü haleipü shennyakthü yantükhen.

² Hapayü nanglakthü kü nopü keiha ngongpathü kao nohen, aa kü nopü keiha shembü kao nohen, aa lanyü kü nopü keiha shembülanyü kao nohen, shakpüthü kü nopü keiha yupüthü kao nohen, lushuohpü am kü nopü keiha luhahpü am kao nohen, hang shemhahhen nyupü am kü keiha hang shemhen nyupü am kao nohen.

³ Hapa kahdokü chemjalak kü lavüngtoiyei meheyao neshiüi tuhphonghen shei Shembüpai hapa shah eteke.

⁴ Kahdok vandaihen, hatü kaudaihen; kahdoknyü kemei üei vanei kahdok mü vangshothüao üdaihen.

⁵ Nanglakthüi ha kahdok sheihtükteke; jomphongi shahkungthü nebang, vanglemthü pungei nedohnetenpü vangpüshuwpü mangtükteke.

⁶ Hanangkü thaüvaüi hapa kahdok lühtüknyüke; hapa nanglakthüi jomei mang kohen. Hanangkü kahdoknyülei nyupüthüyü bhihdai maandainyüke, hatü maani mon aoei nyüke.

⁷ Yiüao vandai, nyalingngupaiyao üdai, mongongpü mongdang peü mongmangdaiteke.

⁸ Mongongpü phaam ngeüao dohdai, mongong ngeü anpeyao nendai, harp vüngpü ngeüao mahdaiteke.

⁹ Jomi hajük kü kesho lokyaki yiü neyingnyu; yingjao yiü-ü shahyaki leidai.

¹⁰ Mophicheü chingnyü-ü sheyü mangdai, üpaiyao nesheüh-aokhen mü shem peü küptük.

¹¹ Yiü nedangi chingyangshongei vaüpü eepai mateke; mongong kemei mongmang leidaikem, kahdok kübü mongong kemei lüdaiteke.

¹² Chingnyü-ü lavüngtoiyei yakshi nyüke, penyüshathü peü bendai.

¹³ Olive betjük lüngi bheiyei vaümlangpü keiha, nyalingngupai dhei thailangpü keiha, hapa kahdok hatü jatthü peü mahtükhen.

¹⁴ Jomi ngeüwong anei mongongpai kesho loknyüke; jomi heshüphi leipü Shembüpa longpü jung lennyüke.

¹⁵ Hanangkü heong philei Shembüpa kü müknyinshekhang shuohtuh; Shembüpa, Israel Kahvangei men yungching shübaongthüleiyao longtuh.

¹⁶ Kahdoknyü dohpü phileipü “Daülangpü Hük kü müknyinshekhangtuh” shei lokpü hami dannyüke. Shejao, “Ngeiyü jaangteke! ngeiyü jaangteke! Ngeiyü onyükei! Ühingnakaipüthüi ngei yuhahteke!” shei ngei eteke.

¹⁷ Nyempü, kahsha hatü taikam mon am shing nyüke, Oh kahdoknyü nanglakthü.

¹⁸ Nyem shaopü amei ngeü kü nyemei üami nyainya, kahshalei vühen, hatü üami kahsha leipü bakei aonghen, tai kü manhen. Mehenangkü vangsho shadenthü apei nyüke, hatü kahdoknyü chongnyiam shing kheünyüke.

¹⁹ Kahdoknyü chemjalak kü mangdaiteke, kahdoknyü bhaodaiteke, kahdoknyü nemei-i jennyüke.

²⁰ Kahdoknyü-ü yiüi chokpü am kei tüngtüngmüngi, hatü tapten kei yawteinyüke; hapalei mang hapa shangkü vihyaki nyüke, hatü dohen, hajük kü ne-yei nepao-aokhen.

²¹ Hapa nyih kü Shembüpai shangeipü vangsho nganthü, hatü kahdoknyü leipü ongthü kü hanghi shuohhen.

²² Jomü kahshalei khoklat kü küppü keiha thaihühen; jomü khoklat hük kü küphen, hatü nyih longi angpheikü hanghihühen.

²³ Hahepak kü lennyü manghdaihen, vanghenyü nenyahen; mehenangkü Jeiyong Shembüpai Zion Kahshang, hatü haleipü mübüthü shak kü müknyinshekhangshi vanglem lemhen.