ISAIAH 21 - DAÜLANGPÜ LAIHING (BSI)

Babylon Dohen Nang Epü

¹ Hapayü Babylon nangkü epü shah: Alüngleple-i yingtetlongshaipü keiha, nyempühanpü kahdok leipü shanghah vongshüh peikahen.

² Vongshüh peihen manghkhang hük ngei kü huteke, hapayü lueilemhen hatü mangtükhen nang nyuteke. Elam veshanthü, ching hahtuh! Media veshanthü, ching shümtuh! Babylon ami shuohpü hanghi ngei dohtükhühen.

³ Mehe ngei manghkhang kü ee, hatü dan, hapai ngei nyempai hatü tüngpai mahü, nyühai hapeü anghen tüngpükei tüngteke.

⁴ Ngelei shangjing shinnyüke, nyempai ngei kheünyüke; Om dhükahen shei ngei ongyangei nyujü hapai ngei kü nyempühanpü koei peiteke.

⁵ Jomi nükdülei hahying temnyüke; jomi yenpathü uohen ashak nyemnyüke; jom hahnyüke, yingnyüke! Yaongtuh, veshan mübüthü! “Inyüshung temtuh” shei enyüke.

⁶ Shembüpai ngei kü, “Daituh, veyombüthü yomei tuhtuh, hatü büpai mehe ee, ha ngei kü shahjang nyem-epha.

⁷ Büpai mechem koyei kharithü, koyeithü hatü utthü kü shennyak nyi nyi uotü eehenshang, büpai hathü kü kenhingei nyemvei” shei eteke.

⁸ Veyombüi nyüknyüke: Oh Shembüpa, nyihnüng yanüng shei ngei veyomdülei, hatü ngei kü hanpü shingei ngei yomei nyunyeih.

⁹ Veituh, shennyakthü koyei khari kü uotü, koyei kü shennyak nyi nyi uotü peikünyüke, hatü büpai jangei, “Doteke, Babylon doteke! hatü jomei kahvang lajeithü kemei kahdokei bhaoei yaüshi nyüke” shei e.

¹⁰ Oh hahten shingei shuoppükei, Oh ngelei nanglak Israel kü shuoptükteke. Shejao Jeiyong Shembüpa, Israel Kahvang leipü mehe shahjangmei danpa, ngei ha am kü ephünyeih.

Edom am Khüei Tetpüvanpü

¹¹ Edom am nangkü epü shah: Hanei ami Seir leipü ngei kü nyüknyüke, “Yombü, mechem-üng vangnyak peihdaiphahen? yombü, mechem-üng vangnyak peihdaiphahen?”

¹² Yombüi jangei enyüke: “Nepnüng dhom peikünyüke, shejao vangnyakao peikünyüke. Nüngi phehüjema shao nyokei leiyei phetuh.”

Arabia am Khüei Tetpüvanpü

¹³ Arabia am nangkü epü shah: Arabia bhih kahdok koshoya kü baümtap vepü Dedan am ut kü uoei daipüthü;

¹⁴ Yung lepüthü kü yung deikei; paüeiyonpüthü kü hahying shuohtuh, Oh Tema kahdokei nyupüthü.

¹⁵ Mehenangkü jomü yani mahhen, hatü mih-ei lahhilaong kübü, hatü mangpü thepju kübü nyaiyei peikünyu khih.

¹⁶ Shembüpai ngei kü hapakei enyüke: “Bong hük mong aa kü Kedar amei müknyinshekhang peü mahdaihen;

¹⁷ Kedar amei pülah nopü vehokbüthü maani mon aohen” shei Shembüpa, Israel Kahvangi eteke.