ISAIAH 20 - DAÜLANGPÜ LAIHING (BSI)

Ijip hi Kush Khüei Tetpüvanpü

¹ Assyria am Sargon ongpai büpalei veshan mübü longpü hük shomei Philistia kü Ashdod chingnyü hah.

² Hahepak kü Shembüpai Amozlei cheha Isaiah homei, “Nüngei büm leipü dhoila ashak bhühtüktuh, hatü lathuh bhühtüktuh” shei e, hatü büpai hapakei bhühtükkemtü bümkong hatü labai kamteiyei nyu.

³ Hapheikü Shembüpai, “Ngelei chongphobü Isaiah-i Ijip hatü Kush am khüei mehe vamhen hapa nyangeihepü, hatü lappü hük vaishi bong jem thahshi bümkong hatü labai nyupü keiha,

⁴ Assyria am ongpai Ijip hatü Kush am hashih behe peü ngaüpdük eeshi Ijip am veühühen shingvaishi bümkong hatü labai wüpküpei deihen.

⁵ Üami Kush am kü mongnyangnya, hatü Ijip nangkü changmeiyei deihnya, nyemhen hatü hai danghühen.

⁶ Hapa nyih yungching yungkung kü nyupüthüi, ‘Veituh, Assyria ongpai yangphahen shei jeni monglempü, hatü sheühshih shei nyaiyei heihjahampü nanglakthüyü henüngang pongpü khih! Jenao hajük keyü mekei yemmü nyuaokhen?’ ” shei ehen.