ISAIAH 19 - DAÜLANGPÜ LAIHING (BSI)

Kahvangi Ijip am Hanghihühen

¹ Ijip am nangkü epü shah: “Veituh, Shembüpai phum shangkü uotü shülangi Ijip lemei peikünyüke. Ijip amei lajeithü büpa touei kheühen, hatü Ijip amei mong mahdaihen.

² Ngei Ijip ami Ijip am khüei yaonghühen, hatü jom hüki hük khüei hokhühen; chingyowi chingyow, chingnyüi chingnyü homei, hatü ongchingi ongching khüei hokhühen.

³ Ijip amei mong mahtükhühen, hatü jomei küpjan kong leitükhen. Jomi lajei hatü yimpi laangthü kü pheyuhen, laangthü hatü phongyompüthü kü pheyuhen.

⁴ Ngei Ijip amü nemeipü ong hükei lak kü shuohtükhen, hatü longi mangpü ong hüki jom shak kü ong vaihühen” shei Shembüpa, Jeiyong Kahvangi enyüke.

⁵ Nile yungyen leipü yung jepdaihen, hatü yungyenü üei vandaihen;

⁶ Ijip amei Nile yungyen vanei yunglemao shie bühen; haleipü pingu hatü yeih kemei kaudaihen.

⁷ Nile yungkung kü sheipü sheili kemei vandaihen, hatü maoei deilangtü meheyao nenyuhen.

⁸ Nyah yeppü am thephen, Nile kü nyiamphaak shükteipüthü younghen, hatü shang shepteipüthü mongshanghen.

⁹ Nyemin vi lingteipüthü vaükahen, hatü nyemin ashak dakpüthü monglemshing neshiüi leidaihen.

¹⁰ Ashak dakteipüthü peü mongmanghen, hatü halei nanglat shateipüthü mong kü tünghen.

¹¹ Zoan am mübüthüyü ngapathü mon, Pharaoh kü shahnying eteipüthü kemei ngashah mon enyüke. Mekei etü ammi Pharaoh kü, “Ngeiyü nyingpühingpü hük, longli ongli shei eaokhen?”

¹² Nüngei nahpülangpü shennyakthü melei nyüpa? Jomi nüng kü Jeiyong Shembüpai Ijip am khüei mehe dükhen tem, ha nyem-epha, hatü nyemnyinghüpha.

¹³ Zoan am mübüthüyü ngapa leidaikemteke; Memphis am longhiongthüyü mongnyong kohdaiteke, Jat kü shongkaong vaipüthüi Ijip am lemnyong kü mülangteke.

¹⁴ Shembüpai jom kü nepongpaüpü laangha shihshuohteke; hanangkü jomi Ijip ami dükpü nejiüi leitükteke, hatü yiü chokpü shennyaki laophüi bhaipü shangkü dopükei nyüke.

¹⁵ Shemmei nevaijü taopa, shongnyü shennyak nevaijü nenyingnehingpü üpaiyao meheyao Ijiplei nedükaokpih.

Ijip ami Shembüpa kü Khümhen

¹⁶ Hapa nyih kü Jeiyong Shembüpai Ijip am khüei lak noshingkü jomphongü nyüha kei nyempai kheühen,

¹⁷ hatü Judah kahdokü jom shingvaishi nyembenüng leidaihen; Jeiyong Shembüpai jom khüei dükhen küpjan nyupü nangkü, Judah am jung shei-üng hanei kü ejajü nyemdaihen.

¹⁸ Hapa nyih kü Ijip kahdokei Hebrew shah epü hatü Shembüpa kü hinglemhen shei vangpüshuwpü chingnyü nga nyuhen. Hathü khongkü hük keyü, “Vanghenyü Chingnyü” shei nyükhen.

¹⁹ Hapa nyih kü Ijip kahdok jiam kü Shembüpalei moidü nyuhen, hatü yaong haongshi nyuhen.

²⁰ Hathüyü Ijip kahdok kü Jeiyong Shembüpalei nyangeihepü hük hatü denpü nyuhen. Mechem jomei vepathüi shüveipü nangkü jomi Shembüpa kü nyükhen, büpai jom khüambakbü, jom yangbü hük shomhen, hatü büpai jom yanglanghen.

²¹ Hanangkü Shembüpa laophü nyingi Ijip am kü nyinghühen, hatü Ijip ami hapa nyih Shembüpa nyinghen, hatü jomi büpa kü jakpü moila, lebü moila shuoh-ei Shembüpa kü vangeishuwei hathü dükei büpa kü khümhen.

²² Shembüpai Ijip am kü cham peihüei tok shuohhen; büpai jom kü tok shuohhen hatü meitükhühen. Jomi Shembüpa touei lepei leihen, hatü jomi phoppü büpai danhen hatü jom meihühen.

²³ Hapa nyih Ijip kübü Assyria thahshi lemnyüshong nyuhen, hatü Assyria ami Ijiplei hatü Ijip ami Assyrialei lüteihen, hatü Ijip ami Assyria am mü khümhen.

²⁴ Hapa nyih Israel amü Ijip hatü Assyria am mü aihük laphen kü nyuhen, hatü hapa jat jemü kahdoknyü peü shingvaishi moihiman vaihen.

²⁵ Jeiyong Shembüpai jom kü moihimanhen hatü, “Ngei nüng kü moihimanhen, ngelei nanglak Ijip; ngei lingpü Assyria am; hatü Israel am, ngelei mükjüp jathili” shei ehen.