ISAIAH 16 - DAÜLANGPÜ LAIHING (BSI)

Moab amei Laphen

¹ Sela chingnyü kübü bhih kahdok homei kahmük küvanglem lembü, Zion nela kahshang kü bom vaishi mi shomtuh.

² Jep leipü wowtükpü ouha keiha, Moab am nyühathüyü ai nedangi Arnon yungyen phungei longteinyüke.

³ “Ham kü shahnying meipü venshih; mehe dükhen ham kü eshih. Hebaongwong kü yanüng kei nüngei vangdhümi dhümshih. Hamphongü benhayaha, ham kü ne-ühingi ungshih.

⁴ Ham Moab am benhathü am mü loishi nyuküshah; Hamei vepathü touei nüngü hamei dhümloi vaikütuh.” Shüveidoideipüthü dohdaihen; mahpüchahpü nendaihen; Kahmük kübü shüveipüthü nyadaihen.

⁵ Bampai ong uoshing linghen, hinglempai shennyaki hapa kü uohen; David phang kübü hük shahphen shingkü shahhing yempü, hatü jiüshangpü shülangi dükpü hük uohen.

⁶ Moab am changmeipü jeni danteke, pinnyü awdapü hatü ühingnakaipü, shejao pinnyü changmeipeyü kong leidaihen.

⁷ Hanangkü Moab am peü theptuh, jom chemi Moab nangkü mahng thephen. Kir-Haresethlei nyushi hahhampü nyalingngupai aan deihtü thephen.

⁸ Chem hepak kü jatthü kü vanglem lempüthüi chokhampü nyalingngupai yiü, chemü Jazer chingnyü thahshi, hatü heongphi bhih kahdok thahshi, hatü heshüphi kü Dipü Yungching thahshi banei daihampü, Heshbon leipü kahthü leipü, hatü Sibmah leipü nyalingngupai mangtükhen.

⁹ Jazer nangkü theppü keiha ngei Sibmah leipü nyalingngupai nangkü thepnyeih. Oh Heshbon hatü Oh Elealeh, shennyakthü mongonghen mü meheyao hahying nevampü nangkü ngei thepnyeih.

¹⁰ Betjük jükteipü kah kübü mongongmongle yahlangteke, nyalingngupai kahlei üpaiyao kesho nelok hatü nelennyu; Betjük ngümshingei üpaiyao yiü nebhitnyu, mehenangkü mongongmongle ngeühinga ngei dohtükhüpeih.

¹¹ Harp vüngpü keiha ngei Moab nangkü, hatü Kir-Hareseth nangkü mahng thepnyeih.

¹² Moab ami kahshang leipü vaümchongei khümnüng aongpai nyiudaijao, hatü phopshemei phoppai tengdaijao hapai shei mehe nangleiyao neshiü.

¹³ Hapayü Moab am nangkü Shembüpai shelei mebü epü shahjangü ha nyupeih.

¹⁴ Shejao shaang Shembüpai enyüke: “Bong jem mong aa kü Moab amei müknyinshekhangpü mophimo mahdaihen; nanglak longi nyujao maani mon aoei nyuhen, hatü wong nekoh-i nyuhen.”