ISAIAH 15 - DAÜLANGPÜ LAIHING (BSI)

Kahvangi Moab am Mahtükhen

¹ Moab am nangkü epü shah: Moab kahdok kübü Ar hatü Kir nyi yahük kü mahtükpeih; shejao Moab ami hapa kü meheyao nedükaok.

² Dibon ami phopshemei hatü vaümchongthülei thepei phophen aongteke; Moab ami Nebo hatü Medeba nangkü sho chaei kuptük, hatü jumum kuptüktü mahng thepnyüke.

³ Chingyangshongei jomi dhoila ashak ümnyüke; shem adok hatü banghthai lembaong kü lemeileyei mahng thepnyüke.

⁴ Heshbon hi Elealeh nanglakthüi vaüei eenyüke; jomei ngeü Jahaz thahshi dannyüke. Hanangkü Moab am veshanthü vaünyüke, hatü jomei mong maandainyüke.

⁵ Ngelei mong Moab nangkü thepnyeih; haleipü shennyakthü Zoar, hatü Eglath-Shelishiyah thahshi nyaidaiteke. Jomphong thepyaki Luhith lemei, hatü jom lomohpü nangkü mahng thepyaki, Horonaim lemei aongnyüke.

⁶ Nimrim yungao jepdai, hatü phenha peü kaudai; meheyao phenhavunglak neshiüi leidaiteke.

⁷ Hanangkü jomi yowhahpü mop kotü willow püying kahjilei yanglem yemei nyainyüke.

⁸ Jomi vaüpü eepü Moab kahdok peü lemei dainyüke. jomi theppüyoungpü Eglaim, hatü Beer-Elim thahshi dainyüke.

⁹ Mehenangkü Dibon yungyenü iy-i maei nyüke; shao nyeinya ngei Dibon am kü dükhen. Moab am nyaiyei daipüthü shingvaishi, hatü aopü nanglakthü shingvaishi mailang shomhen.