ISAIAH 13 - DAÜLANGPÜ LAIHING (BSI)

Babylon am Khüei Kahvangi Epü

¹ Babylon am nangkü Amozlei cheha Isaiah-i eepü manghkhang shah:

² Meheyao neshiüpü shangtao hük kü khüamlung haongtuh; changmeipü longhiong nyupü penyüsha homei chinghah shühen baongeishuoh.

³ Ngei mongshihpü show laihen ngei ngelei daülangpüthü kü etepih, ngelei vehokbüthü hatü monglongpü veshanthü kü nyüktepih.

⁴ Khongnyü longpülei ngeü keiha, kahshang leipü ngeü kü banghümao! Ongchingthü hatü jatthü thaipü ngeü kü banghümao, Jeiyong Shembüpai vehok hokhen veshanthü longi temnyüke.

⁵ Jom tailu kahmük leipü peikünyüke; vangsho jung dohpü leipü peikünyüke. Hapayü kahdoknyü kemei mahtükhen Shembüpai büpalei mongshih vehok phunglang ow ownyüke.

⁶ Theptuh, mehenangkü Shembüpalei nyih yopailei nyüke; hapayü Shembüpai mahpüchahpü koei peipü nyih vaihen.

⁷ Hanangkü peüei lak ngadaihen, hangku peüei mong mahdaihen, hatü jom peü mong laaidaihen.

⁸ Nyempai jomphong yeplanghen, thenshang mongtüngpai jom shümlanghen; nyühai moi paishingkü kei jom mongshanghen. Jom hüki hük mü nyemei veiteihen, veüpai dheyao awlom kei hakdaihen.

⁹ Veituh, Shembüpalei nyih peikünyüke; mongshihpü hatü longi mongmangpü, mangpü nyih peikünyüke; Hapai kahdok lavüngtoiyei leitükhen, hatü haleipü mang shennyakthü mahtükhen.

¹⁰ Mehenangkü vangsho lithathüi jomei vangngai nekhangphahen; aongpü vanghenyüao manghdaihen; lennyüi laophülei vangngai neshuohhen.

¹¹ Ngei kahdoknyü kü hapalei mang nangkü, nemeipüthü kü jomei mang nangkü hanghi shuohhen. Ngei changmeipüthülei changmeipü dohtükhen, hatü nebahnevaipüthüi awdapü bhih-ei maantükhen.

¹² Daülangpü hon meyü shennyakang kompüba, Ophir hon meyü hangkuang maanpüba leitükhen.

¹³ Hanangkü Jeiyong Shembüpai mongshihpü nyih, hatü aw keiha mongshih bahpü nyih ngei vangshothü kheühühen, hatü kahdoknyüao hapa shing leipü jenhühen.

¹⁴ Kaw sheütükpü mei keiha, müei leihen shembü neshiüpü mi keiha, peüi laophülei nanglak yemei, hatü laophülei kahmük yemei leidaikemhen.

¹⁵ Üami mih-ei laki yephahhenshang phungi hümhahhen, üami yephahhenshang, yani mahhen.

¹⁶ Jomei müki eeshi jomei naüthü khih mü nihtükhen, jomei shemdouthü kemei paangei shetlanghen, jomei nyühathü shüei yahlanghen.

¹⁷ Veituh, ngei jom khüei hon kü hon shei nedeihpü, ngin kü ne-ienelempü Medes am vamhühen.

¹⁸ Jomei lahhani nethethü jütükhen, jomi kahmong nyemha kü phahjiei nedeihhen, jomi hashihthü kü shinshangei neveihen.

¹⁹ Kahvangi noei yaktük shingkü ongchingthü khongkü müknyinshekhangshi nyupü Babylon ami changmeiyei deihpü Babylon chingnyü-ü Sodom hatü Gomorrah kei leidaihen.

²⁰ Den dok kü den pinnyü kü hangkuli chingchingei nenyuhen; Arab am üpaiyao halei ashakshem vetü nenyuhen; mi yombü üpaiyao laophülei mi halei lemlemleyei netuhhen.

²¹ Shejao phaüyemthü mon halei nyuhen, hatü haleipü shemthü kemei kü mahuthü maei nyuhen; Halei Ostrikh ou nyuhen; hatü meishiythü phaukteihen.

²² Haleipü shem adokei shuwthüi, hatü ongshemthülei mahuthüi changtei changteitü vaühen. Babylon mahhen nyih ngoiteke; pinnyü nyih lushi nenyuhen.