ISAIAH 11 - DAÜLANGPÜ LAIHING (BSI)

Jesselei Püchong Kübü Pünien Hük

¹ Jesse pütüng kübü pünien hük vamkahen, hatü büpalei tünglang kübü Pükao hük vamei betjük jükkahen.

² Shembüpalei laangha büpa kü nyuhen, kihikon hatü danaokpü laangha, shahnying venpü hatü ngan laangha, nyingpühingpü hatü Shembüpalei laangha büpa kü nyuhen.

³ Büpalei mongongü Shembüpa kü nyempü nyuhen. Büpai büpalei müki eepü kü, nevaijü büpalei dhaongi danpü kü shah nephenhen;

⁴ shejao taopathü kü daülangshemshepai, hatü kahdoknyü kü nehahneyingpüthü kü shahhingi shahphenhen. Büpai büpalei ju kübü nyiamlüngi kahdoknyü kü bheihen, hatü büpalei ju kübü ngüi nemeipüthü jütükhen.

⁵ Daülangshemshepeyü büpalei shüngshep, hatü shahhingü büpalei shünglok vaihen.

⁶ Mi cheha mü shuw nyuhen, yum mü shahnyüao chemi lemshi nyuhen; mohoh cheha hi mailang nyi chemi het hahhen, hatü maanpü naü hüki hathü müteihen.

⁷ Mohoh hi sheptao nyi chemi hahyinghen, jomei chehathü chemi lemshi nyuhen, hatü mailangi mohoh-i keiha hahtang hahhen.

⁸ Amma naüi biütam sha touei ngalehen, hatü aküngnaühai biühuw jep kü laki thuhen.

⁹ Ngelei daülangpü kahshangei, jomi ten nedükhen nevaijü nejüteihen; mehenangkü yungching kü yungi maei nyupükei, kahdoknyü-ü Shembüpa nyingpai maei nyuhen.

Wüpküp Leipü Nanglakthü Leihen

¹⁰ Hapa nyih Jesselei tünglangü nanglakthülei khüamlung hük leshi yaonghen; jatthü büpa touei thaihen, hatü büpa nyushingü müknyinshekhangshi nyuhen.

¹¹ Hapa nyih kü Shembüpai büpalei lak shao chem laihen, hatü laophülei nanglak aopüthü Assyria leipü, Ijip leipü, Pathros leipü, Kush leipü, Elam leipü, Babylonia leipü, Hamath hatü yungching yungkung kübü jatthülei lakmong kübü yangei leilanghen.

¹² Büpai jatthü kü khüamlung hük huhen, hatü wüpküpei nyupü Israel am thailanghen, hatü Judah am kahmük vaungjung ali kü haidaipü peü leilanghen.

¹³ Ephraim amei mükhüh mongyung mahdaihen, hatü Judah amei meimongnyahmong dohdaihen; Ephraim ami sheyü Judah am kü mük nehühhen, nevaijü Judah ami Ephraim am mü de nesheüteihen.

¹⁴ Jiji yoteitü heshü philei Philistia am kü laongei shükhen; jiji chemi heongphi leipü shennyakthülei mophimo aetlanghen. Jijinyi-i Edom hatü Moab am kü lak shihhen, hatü Ammon ami jijilei shah banghen.

¹⁵ Shembüpai Ijip ammei yungching jeptükhen, hatü büpalei laki nyahpü shaampü vanglük shomei Euphrates yungyenao ütükhen; hatü shennyaki la mü homaokhen mü shoha nyet vaishi antü hantükhen.

¹⁶ Israel am Ijip leipü leishingkü lemnyüshong nyupü keiha, Israel am Assyria leipü aoei leipüthü shingvaishi lemnyüshong vamkahen.