ISAIAH 10 - DAÜLANGPÜ LAIHING (BSI)

¹ Shahhing ne-epü shahkung lingpüthü, ühinghen vanglem lingpüthü onyükei!

² Hapa keiha ammi taopathü kü jiüpü nedüknyu, hatü hanghipü ngelei nanglakthülei hean gühlangnyüke; hapa keiha vaümnyüthülei mophimo, hatü hashihhathülei douhinang gühlangkemnyüke.

³ Hanghi pongpü nyih ammi mehe linghen? Tailu leipü shanghah peipü nyih ammi mehe dükhen? Üpa touei sheühshih shei peijahen? ammei mop melei tuhphonghen?

⁴ Amphong wüpküpei deihen, nevaijü vehok kü mahkemhen. Hapaiyao büpa mongshihpü nemeinyu, shaang thahshi büpalei lak noshi nyüke.

Kahvangi Assyria am kü Shahphenpü

⁵ Ngei mongshihpü nyiamlüng, Assyria am onyükei! jomei lakei ngei mongshihpü lüng noshi nyüke!

⁶ Kahvang nenyingpü jat hük khüei ngei büpa shomnyeih, ngei mongshihpü nanglak khüei jomei mophimo aetei leihen, hatü chingshong leipü nyaühut kü kei nyeütükhen ngei büpa shomnyeih.

⁷ Shejao hapayü büpai deihshi nyupü nevai, nevaijü hapayü büpalei mongei nyupü nevai; shejao ongpalei mongei jatlithü longi mahtükhen deihshi nyüke.

⁸ “Ngelei veshan mübüthü peü ongthü hih” shei büpai enyüke.

⁹ Kalno amü Karkhemish am neleang je? Hamath amü Arpad am neleang je? Samaria amü Damaska am nelang je?

¹⁰ Jerusalem hatü Samarialei nyupü mao nyeishi lajei angpü ongchingthü kü, hatü lajei kü khümpü ongchingthü kü ngei hanghi neshuoh-angpü je?

¹¹ Samaria am hatü jomei lajeithü kü ngei dükpü keiha, ngei Jerusalem hatü jomei lajeithü kü nedükhen je?

¹² Mechem Shembüpai Zion Kahshang hatü Jerusalem khüei dou peü dükkemhenshang, büpai, “Changmeipü hatü awdapü Assyria ongpa kü shüveihen” shei enyüke.

¹³ Mehenangkü büpai enyüke: “Ngelei wongi ha dükpeih, ngei kü kon nyupü nangkü ngelei koni ha lingpeih. Ngei jatthülei viongthü bentükpeih, ngei jomei mophimothü aetlangpeih, mohohbaongi keiha ong uoshing kü uopüthü la-i nyeütükpeih.

¹⁴ Ati tuw kü laki thupükei ngelei laki jatthülei mop kü thutepih, hatü ati diyei yaüpü thaipükei, ngei kahdoknyü jatthü peü thaipeih. Hükiyao jomei yangi ngei kü neshatpha, nevaijü ju kübü ngeü ne-an.”

¹⁵ Ay-i shennyak meyü ngei longpeih shei eaokhen je? nevaijü püvet longkhoih-i shennyak meyü ngei-üng shongnyü shei eaokhen je? Nyiamlüngi hapa noteipü shennyak noei ne-annyih, nevaijü lenshuoh-i hapa noteipü shennyak noei ne-annyih.

¹⁶ Hanangkü Jeiyong Shembüpai büpalei veshanthü kü lomohhen din shomhen, hatü büpalei müknyinshekhangi aw bahpükei bah-ei vamhen.

¹⁷ Israel amei Vangngaiyü aw leidaihen, jomei Daülangpü Hükü awlom leidaihen; nyihcha kü hapa bah-ei büpalei hüh peü hahtükhen.

¹⁸ Veinyuhüpü jahpan hatü büpalei betjükpüthü Shembüpai mangtükhen, hatü hapayü dini tüngpü shennyak jütükpükei nyuhen.

¹⁹ Jomei jahpan kübü aopü püthü maanpü hashih hüki ieaokhen mü nyuhen.

Israel am Aopüthü

²⁰ Nyih hük Israel am aopüthü hatü Jakob am phang yangei nyupüthüi jom mahtükpüthü kü mong nenyanghen, shejao hingmei mü Shembüpa, Israel amei Daülangpü Hük kü mongnyanghen.

²¹ Jakob phang aopüthü Jeiyong Kahvang touei nyokei leihen.

²² Israel nanglakthü yungching bhihhiphang kei nyulangmao jom aopüthü mon nyokei leihen. Mahhenü hingmei mü khuodaipü; mehenangkü hayü shangpeih.

²³ Temtükpü keiha Shembüpa, Jeiyong Kahvangi kahdok kemei mahtükhen.

Shembüpa i Assyria am Hanghihühen

²⁴ Hanangkü Shembüpa Jeiyong Kahvangi, “Oh Zionlei nyupü ngelei nanglakthü, Ijip ami dükpü keiha Assyria ami jomei nyiamlüngi, hatü jomei lenshuoh-i am kü bheiphüshingkü ami jom kü tenyem.

²⁵ Mehenangkü hepak kanja pheikü ngelei mongshih dohdaihen, hatü jom mahtükhen shingvaishi ngelei mongshih jom philei lephen.

²⁶ Jeiyong Shembüpai Oreb yaongnyü touei Midian am kü bheipü keiha bheihen; büpalei lenshuoh-i yungching kü bheihen, hatü büpai Ijip am kü dükpükei dükhen.

²⁷ Hapa nyih ammei bhagchong leipü büpalei hanggovih bhühlanghen, hatü ammei bhagchong leipü büpalei kenh mangtükhen” shei enyüke.

Vepa Peipü

²⁸ Vepathü Aiathlei shüteke, jom Migron homei daiteke, jomi douhinang, hahying kemei Mikhmashlei yowei tuhteke.

²⁹ Jomi peihlem homei Gebalei heih-ei paümteke; Ramah am kheüteke, Saul ongpalei Gibeah jila leipü shennyakthü nyemei nyaidaiteke.

³⁰ Wongmü lentuh, Oh Gallim nelathü! Bangtuh, Oh Laishah am! Jangtuh, Oh Anathoth am!

³¹ Madmenah am nyaidaiteke; Gebim am yanglem yemei mokdaikemnyüke.

³² Shinnyih jom Nob chingei paümhen, jomi Zion nelalei kahshang kü, hatü Jerusalem kahshangei jomi laklok huhen.

³³ Veituh, Jeiyong Shembüpai büpalei ngani jom pükao louhpükei louhtükkemhen; shaopü püthü agtükpükei, yinghilong kowtükpükei büpai jom mahtükhen.

³⁴ Ay-i yinghilong agtükpükei, meipü Lebanon püthüao agtükkemhen.