HOSEA 9 - DAÜLANGPÜ LAIHING (BSI)

Israel am Shingvaishi Hang

¹ Mongteong, Oh Israel nanglak, mih jatli kei mo-eitapei mongteongtei. Mehenangkü am büpa toueipü yanei hingnelemi nyuteke. Büm yutü ha kü lat danghen, hatü hahying lemphü danghen kü kennyüke.

² Hah hatü olive mainga changshi nedanghen, hatü yiünaü nedanghen.

³ Shembüpalei kahdok kü jom nenyuaokhen; Ephraim am Ijip kahdokei nyokei daihen, hatü Assyrialei nedaüpü hahying hahhen.

⁴ Jomi Shembüpa kü yiü moila neshuohhen, nevaijü moila koei nepeiaokhen. Hakeipü moilayü jom shingvaishi mangh kü jeetükpü hahying kei nyuhen; Hapa hahpüthü peü nedaü-i leihen. Hapa hahyingü jom shingvaishi mon chongkahen, hapa Shembüpalei phopshemei noei nepeikahen.

⁵ Ammei vanyang mohitap nyih, hatü Shembüpalei mo nyih kü ammi mehe dükhen?

⁶ Mahhen kübü jom yangjao, Ijip ami jom thaihühen; Jom Memphislei mahng vühen. Jomei douvang ngin hühhihangi lümlanghen, hatü hühyingi jomei shemthü jümlanghen.

⁷ Hanghihen nyihthü ngoikünyüke; Dükpü shangshi hanghihen nyihthü yopailei nyüke; Israel ami ha nyingtuh. Mehenangkü ammei mang ahshi-üng longdaipü nangkü; hatü nejiünepaipü ahdaipü nangkü thibüthü kü ngapa, hatü laangha shennyakthü kü yoipa khih shei deihnyüke.

⁸ Thibüyü ngelei Kahvang leimao Ephraim am yombü nyüke, shejao büpalei lem peü kü aethitai haenshi nyüke, hatü Kahvangei phopshemei vepa nyüke.

⁹ Gibeahlei nyupü nyih kü kei, ten lem kü jom hingdaiteke; Kahvangi jomei mang deihhen, hatü jomei mang nangkü jom hanghihühen.

Israel amei Mang Kübü Vampü Douten

¹⁰ Shongei ngei mechem Israel am dangpa, jomü bhih kahdok kübü nyalingngupai kei shepeih; Shejao ngei mechem ambü ampa eepa, amü adhapü kü shongpü betjük eepükei shepeih. Shejao mechem jom Peor Kahshangei peiyei Baal kü khümpa, lomi jomi bampü kahvang kei jiühitshi leidaipeih.

¹¹ Ephraim amei müknyinshekhangü ou hük kei piyei lüdaihen; Naü uoshing kü naü nekohhen, hatü moi nepaihen.

¹² Jomi hapeüthü bühlangmao, ngei jom hashih shihphonghen. Mechem ngei jom yakphonghen, jomü onyükei shei ponghen.

¹³ Chem Ephraim amü shingmei kü sheipü pü keieepeih, shejao shaang Ephraim ami jomei hapeüthü jühen müei daihen.

¹⁴ Nüngi mehe shuohhen jom kü yah-eishuoh, Oh Shembüpa! Hapeü nenyupü nyülan leihütuh, hatü amma ne-aongi vantüktuh.

Israel am kü Shembüpa i Shahphenpü

¹⁵ Jomei mang dou lemphüli Gilgalei chongpangpeih, halei ngei jom kü jiühitei deihpeih. Jomi mang dou dükpü nangkü ngei jom ngelei shem kübü changtükhen. Ngei hajük kü jom kü nebampih, jomei mübüthü peü ngei khüei yaongteke.

¹⁶ Ephraimü kaodaiteke, jomei tünglang vandai, jom betjük nejükhen. Jomi hapeüthü bühjao jomi vaüpü moihiyangthü ngei jütükhen.

¹⁷ Ngelei Kahvangei ven nedanpü nangkü büpai jom yaktükhen; Jomü jatthü khongkü chingnyaipü am leihühen.