HOSEA 7 - DAÜLANGPÜ LAIHING (BSI)

¹ Mechem ngei Israel nanglakthü meitükhüei deihnya, Ephraim amei mang hatü Samaria amei douten nyeinya shakei vamnyüke; Mehenangkü jomi lawlüpnyüke; shem apei shüei gühnyüke; Jomi chingyangshongei shennyakthü leipü aetnyüke;

² Shejao jomei douten kemei ngei deihshi nyüpeih shei jom kü leyei nepeinyu. Jomei mangi jom kü mük neshai-i veinyüpeih.

Ong Uoshing Lueilemtükpü

³ Jomei mangi jomei ongpa, hatü jomei shahshemi jomei lakchongbüthü mongmeihünyüke.

⁴ Jom peüi mükbongjuyung düknyüke; Aan oukbüi aanthüng nyetpü kübü aan mangouk thahshi awdep kü aw jakei angpükei nyüke.

⁵ Ongpalei mo nyih kü jomi jomei ongthü, hatü lakchongbüthü yiüi chokei ngahünyüke; Büpai eelapüthü mü büpalei lak khaainyüke.

⁶ Jomei mongei ten tempai awdep kei shaamei nyunyüke, vangnyak jomi mongshih-ei nyunyüke; Nepnüng awlom keiha bah-ei vamnyüke.

⁷ Jom peü awdep kei shaampai jomi jomei ongthü jütüknyüke. Jomei ongthü hük pheikü hük jütüknyüke, shejao üpaiyao ngei kü sheühpü yiüei nephopnyu.

Israel hatü Jatthü

⁸ Shembüpai enyüke, “Ephraim am mih jatthü mü vukdaiteke, hatü neleplükpü nangkü nelangpü aan kei nyüke.

⁹ Mih jati jomei wong lühtükteke, shejao jomi ha nenyingaok, Shosho pungdailangmao hapa neyaoaoknyu.

¹⁰ Israel am changmeipai jom khüei denpü nyüke, shejao jomi jomei Shembüpa, Kahvang touei mong nelep, nevaijü büpa yemei nelei.

¹¹ Ephraim amü ken nehingpü, sholi nekohpü athuba leangke; Jomi Ijip am kü sheühpü yünyüke, shao Assyria am philei lepnyüke.

¹² Jom daishingkü ngei shang haentü ouhathü kei yephen, jom khongi dükpü mang nangkü ngei jom kü lohhen.

¹³ Jomi ngei toueipü lemnyongei lüdaipü nangkü onyükei! Jomi ngei khüei yaongpü nangkü jom mahtükhen! Ngei jom yanghüjao, jomi ngei khüei shahshem enyüke.

¹⁴ Jomei mong kempai ngei kü nephop, shejao yangtü jomi thepnyüke; Mechem jomi nükhiyiü yüei phophenshang, jomi ngei khüei yaongnyüke.

¹⁵ Jom kü nyuhpüvenpü, hatü wong kohhüpeyü ngei hih, shejao jomi ngei khüei nemeipü dükhen temnyüke.

¹⁶ Jomi nanglei neshiüpü lemei lepdainyüke; Jomü mangdaipü lah keiha nyüke; jom changmei shah epü nangkü jomei mübüthü yani mahhen, Ha eeyei Ijip ami nyiteihen.”