HOSEA 5 - DAÜLANGPÜ LAIHING (BSI)

¹ “Hapa bangtuh, Oh ngongpathü! Mong shuohtuh, Oh Israel am! Bangtuh, Oh longhiong phang! hapa shahphenpü am khüei nyüke; Amphongü Mizpahlei tai hük kei nyuhamteke, hatü Tabor Kahshangei shang hük haenteke,

² hatü Shittimlei banghsha hük chüloh-i shoteke; Ngei am peü hanghihühen.

³ Ngei Ephraim am nyingnyüpeih, hatü Israel am ngei tou kü nejoaokpih; Oh Ephraim, am mükbongjuyung philei lepdaiteke, Israel am sheihdaiteke.”

Lajei Khümpü Khüei Shahvüng

⁴ Jomei doui jom Shembüpa touei lephen bangnyüke. Mehenangkü mükbongjuyung laangha jomei mong kü nyüke, hatü jomi Shembüpa nenyingnyu.

⁵ Israel am changmeipü jom khüei denpü nyüke; Ephraim ami laophü pungpü kü huluh shuohnyüke; Judah amao jom mü chemi huluh shuohnyüke.

⁶ Mechem jomi mi hatü mohohthü müei Shembüpa kü moilahen dainya, jomi büpa nedangnyu; Mehenangkü büpa jom toueipü lüdaiteke.

⁷ Jomi Shembüpa kü hingnelem; jomi shonghathü longi bühnyüke, Shaang jomei lenja mo homei jom mü jomei kahthüao omshi mahtükhen.

⁸ Gibeahlei vehok amit vüngtuh, Ramahlei veshemm kaongtuh. Beth-Avenlei men dhüngtuh, thepju kü heihtuh, Oh Benjamin.

⁹ Hanghi nyih kü Ephraim amü Israel am khongkü lavüngtoiyei leidaihen, Mehe jiüshangi peikahen ha ngei ephünyeih.

¹⁰ Judah amei mübüthüyü viong yaong chaiteipüthü kei nyüke, Yungnyü büng keiha ngelei mongshih jom kü bhümhen.

¹¹ Ephraim amü tok vainyüke, shahphenpai nyonghüteke; Mehenangkü jom angkong kü sheühpü yemei longteiteke.

¹² Hanangkü ngei Ephraim am tou kü laongmang leshi, hatü Judah am tou kü shiehinem keiha nyüpeih.

¹³ Mechem Ephraim ami büpa tüngpü eepa, hatü Judah-i büpalei makaw eepa, hahepak kü Ephraim ami ongpa longpü kü sheühpü yiüei Assyrialei heihteke, Shejao büpai jom tüngpü, hatü jomei makaw nemeihüaok.

¹⁴ Mehenangkü ngeiyü Ephraim am tou kü mailang hük keiha, hatü Judah am touei mailang longpü kei nyuhen. Ngei jom khih mü shaaktüktü lüdaihen, Mechem ngei jom shüei daihen, üpaiyao jom neyangaokhen.

¹⁵ Jomei mang shangshi jom mangponghah thahshi, hatü jomi ngelei dhe mangyem thahshi, ngei ngelei nanglakthü yakphonghen. Jom shangpongpai jomi ngei yemhen.