HOSEA 4 - DAÜLANGPÜ LAIHING (BSI)

Shembüpa i Israel am Khünyüke

¹ Shembüpalei shah bangtuh, Oh Israel nanglakthü; Mehenangkü kahmük kü nyupüthü khüei Shembüpalei thaüvaü hük nyüke. Kahmük kü hinglempü nevaijü bamtei-aongteipü neshiü, hatü Kahvang nyingpü neshiü.

² Jomi lahtü mangtüknyüke, shahshem enyüke, jüteinyüke, gühnyüke, mükbongjuyung düknyüke. Iythüng anpü hük pheikü hük vamnyüke.

³ Hanangkü kahdok vandainyüke, hatü halei nyupüthü peü didainyüke. Yemhimakthü, shangouthü hatü yungching leipü nyahthü peü didainyüke.

⁴ Üpaiyao nanglak kü tethaüvaü nevaijü teloh; Mehenangkü ngei lohpeyü ngongpathü khüei nyüpeih.

⁵ Nyakhingai kemei kü am huluh shuohnyüke, hatü am mü chemi thibüthüiyao huluh shuohnyüke. Hanangkü ngei ammei nyü, Israel mahtükhen.

⁶ Kihikon taopü nangkü ngelei nanglakthü mahdainyüke; Mehenangkü ammi kihikon yaktükpü nangkü ngeiyao am ngelei ngongpa vaihen kübü yaktükpeih. Ammi ammei Kahvangei shahkung betükpü nangkü ngeiyao ammei hapeüthü betükhen.

⁷ Meshükpa ngongpathü nyeinya dahenshang, hajükpa ngei khüei nyeinya mang thahnyüke; Jomi jomei müknyinshekhang veüpong mü jeiteinyüke.

⁸ Jomi ngelei nanglakthü mang thahhütü shemmei leinyüke, hatü nyeinya mang nyemthah shei deihnyüke.

⁹ Nanglakthü kei-üng ngongpathüao aihük hanghi-i ngei jom hanghihühen, hatü jomei douthü kü ngei nyokei shuohhen.

¹⁰ Jomi hahhen, shejao nemohhen; jom mükbongjuyunghen shejao nedaneshehen;

¹¹ Jomi mükbongjuyung dükhen nangkü Shembüpa yakphongteke. Yiü hatü yiünaü-i ngelei nanglak kenhingmonghapü gühlangteke.

¹² Ngelei nanglakthüi pü lajei hük kü phenyüke, hatü pü lenshuoh-i jangshuohnyüke. Mükbongjuyung laangha hüki jom lemnyong kü mülangteke, hatü jomi mükbongjuyung dükei jomei Kahvang yakphongteke.

¹³ Jomi kahshang shaopülei jakpü moila shuohnyüke, hatü shangtaothü, longkhampü, poplar, hatü terebinth püthü phangkü püdhüm meishi eepü nangkü ayingshü jaknyüke. Hanangkü ammei yiükhathü büm yupü kü hatü lipeüthüi mükbongjuyungei lepdainyüke.

¹⁴ Jomi büm yuei lüdaijao, ngei ammei yiükhathü nehanghihüpih, nevaijü jom mükbongjuyung düklangmao, ngei ammei hapeülei nyüha kü hanghi neshuohpih; Mehenangkü bahathü jom nyingi mükbongjuyunglathü mü dainyüke, hatü büm yupüthü mü moila shuohnyüke; Ken nehingpü nanglakthü hapakei mahdainyeih.

¹⁵ Oh Israel, nüngi mükbongjuyung düklangmao, Judah amao pungpü teleihü. “Amphong Gilgalei nevaijü Beth-Avenlei aongei tekhüm, nevaijü vanyangyem Shembüpa men kü tevangteshuw.”

¹⁶ Israel nanglakthüyü mohoh cheha kei mong vaannyüke; shejema mekei etü Shembüpai mi chehathü kü kei shingkow kü het ühhenang?

¹⁷ Ephraim amü lajei khümpü kü omdaiteke, büpai mongpükei nyemlüdai.

¹⁸ Mechem yiü yingei kemhenshang, jomi mükbongjuyung düknyüke; Jomei vanglem lempüthüiyao veüpü lem kü kennyüke.

¹⁹ Jomü alüngleple-i maoei deilanghen, hatü jomei moila-i jom kü-üng veü koei peihen.