HOSEA 13 - DAÜLANGPÜ LAIHING (BSI)

Israel am kü Dohpü Shahphenpü

¹ Ephraim ami mechem shah ehen, lebü Israel jatthüi kheühampeih, Israel ami jom kü ngangei veihampeih; Shejao jomi Baal kü khümei mang thahtü didaipeih.

² Shaang jomi nyeinya mang thahnyüke; Jomi jom shing nyiam hatü ngin yah-ei jomei sholi kü peipükei jomei laki lajei lingnyüke. Hathü nanglakthüi, “Üami jakpü moila shuohnya, mohoh chehalei ju kü jüptuh” shei enyüke.

³ Hanangkü jomü nepnüng nyaü, nevaijü dhom hepak nyien kei lomi nyadaihen, Hah tenshing kübü hahbhang pidaipükei, nevaijü shaden kü awshit daipükei lüdaikemhen.

⁴ Shejao ngeiyü Ijip kahdok leipü am mülangpü Shembüpa, ammei Kahvang. Ngei nevaipheikü lebü Kahvang ammi tetuh, hatü ngei mü lenei lebü yemleipüba neshiü.

⁵ Ühivanpü kahdok kü, hatü jahpanei ühyingei jungpeyü ngei hih.

⁶ Mechem ngei jom kü ühyingpa, jom mohteke, mechem mohpa, jom changmei, hatü ngei betük.

⁷ Hanangkü ngei jom touei mailang hük kei leihen, hatü shahnyüi kei ngei jomei lem tapei danhen.

⁸ Sheptao-i cheha yahlangshuohjü laongpükei ngei jom kü laonghen, hatü khih mü shaaktükhen. Mailangi kei ngei jom lühtükhen; Phaüyemi keiha ngei jom khih mü shaaktükhen.

⁹ Ngei am mahtükhen, Oh Israel; Üpai am kü sheüh-aokhen?

¹⁰ Shaang am yangphahen ong melei nyüpa? “Ham kü ong hatü vanglem lembü yahshih” shei ehampü ammei chingnyüthü kübü chinglingbüthü melei nyüpa?

¹¹ Hanangkü ngei mongmangei am kü ong hük shuoh, hatü ngei mongshihpü nangkü büpa yah-ei lüdaipeih.

¹² Ephraim amei mang jaoshi nyüpeih, büpalei mangü nyangei jaoshi nyüpeih.

¹³ Nyü hüki hapeü bühshingkü tüngpükei büpa kao peiteke, shejao büpa neliha vaipü nangkü bühhen hepak ngoijajao büpa vangngailei nevamhünyu.

¹⁴ Ngei jomphong Sheol nganhiwong kübü yangaokhen je? Ngei jomphong Dipü kübü angei leiaokhen je? Oh Dipü, nüngei cham leü melei nyüpa? Oh mahngchong, nüngi mangtükhen ngan melei nyüpa? Ngei henüng nanglakthü kü hajük kü nephahjipih.

¹⁵ Büpa jeihinaüthü khongkü longi dalangmao ngei bhih kahdok kübü heong vanglük shomhen, hatü jomei yunglok ütükhen; hatü yungkuk jeptükhen. Büpalei hahpuong hatü thushong douvang peü aetlanghen.

¹⁶ Samaria ami jomei mang kohen; Mehenangkü jomi Kahvang khüteke; jom yani mahkemhen, jomei hapeüthü khih mü shaaktükhen, hatü büm nekongpü nyühathülei vom shaaktükhen.