HOSEA 12 - DAÜLANGPÜ LAIHING (BSI)

¹ Ephraim ami dhom kübü nyak dhüshi dükpü lemphüli angsha dou, hatü douten düknyüke. Jomi shahshem hatü dehilao nyeinya dahünyüke; Jomi Assyria am mü chingmei lempongnyüke, hatü Ijip am kü olive mainga shomnyüke.

² Judah am khüei Shembüpalei lakei thaüvaü hük nyüke; Büpai Jakob kü büpalei nyuhichong aimü hanghihühen, hatü büpalei douten aimü nyokei shemhen.

³ Chenyüei vom mongei büpai chejei mü bhow, Shennyak hük vaishi tuhtü Kahvang mü bhow.

⁴ Büpai vangsho phongshan mü bhow, hatü neü. Büpai thepei moihiman yiü, büpai Bethelei phongshanpongteke, hatü halei büpa mü etei.

⁵ Hapayü Shembüpa, Jeiyong Kahvang, büpalei menü Shembüpa!

⁶ Hanangkü am Kahvang touei mong leptuh; bampü hatü shahhing kü shongtuh, hatü düngei ammei Kahvang om dantuh.

⁷ Bhei yupüthüi nejiüpü dok noteinyüke; büpai bhei shakpüthü kü lawlüpnyüke.

⁸ Ephraim ami changmeiyei, “Oh hamü shemmei, nükhinyiam longi nyüpeih. Hami shahhing ne-epü mophimo dangpeih; üpaiyao ham kü eelahen mang nedangpih” shei enyüke.

⁹ Ngeiyü Ijip leipü am müei leipü Shembüpa, ammei Kahvang; Ngei am jahpanei longtei hepak kü nyupükei ngei am ashakshem kü nyuhühen.

¹⁰ Ngei thibüthü kü etepih, ngei manghkhang longi shuohtepih, hatü thibüthü homei ngelei nanglakthü kü shahvüng shuohtepih.

¹¹ Gilgalei lajeithü khümnyüke; ha kü khümpüthü mahkemhen; Gilgalei jomi mohohbaong yah-ei ha kü jakpü moila shuohnyüke. Hanangkü jomei moidüyü koshoya kü yaong bhaongei tuhpükei mon nyukahen.

¹² Jakob Aram kahdokei paüei daiyei, halei Israeli nyüha hük yahhen tata kü chongphoei nyu, hatü nyüha hük nangkü mi yomei nyuteke.

¹³ Shembüpai thibü hük shomei Israel am Ijip leipü mülang, hatü jom jungei yomteke.

¹⁴ Shejao Ephraim ami Shembüpa shahyaki mongshihhüteke; Hanangkü jomei Shembüpai jom iy-aongmashateipü mang jom shak kü tuhphonghen, hatü jomi büpa kü ne-ienelempü nanglei nyokei danghen.