HOSEA 11 - DAÜLANGPÜ LAIHING (BSI)

Kahvangi Israel am kü Bampü

¹ Mechem Israel am hashih hük nyuhampa, ngei büpa kü bamteke, hatü Ijip leipü ngei ngelei hapeü nyüklangpeih.

² Shejao meshükpa ngei Israel kü nyükhen, hajükpa jom ngei toueipü yandainyüke. Jomi Baal kü jakpü moila shuohnyüke, hatü jomi lajeithü kü ayingshü jaknyüke.

³ Ephraim am kü lak kü düktü kamhen nyuhpeyü ngei hih; Shejao jomi ngei meihüpeih shei leyei nepeinyu.

⁴ Ngei hangku kü yahyang shinshangei bampü nangkü vü-i shentü mülangpeih, Ngei jomei bhagchong kübü püdü nolangpeih, hatü aümei shaei jom kü ühyingpeih.

⁵ Jom mong nelephüpü nangkü Ijiplei nyokei daihen, hatü Assyria amü jomei ong vaihen.

⁶ Jomei chingnyüthü kü yan vamhen, hatü jomei küpjanthü dohtükhen.

⁷ Ngelei nanglakthü ngei toueipü lüdaihen temnyüke. Jomi, “Jaipüba Jeiyong” shei nyüklangmao büpai jom nephoukhen.

⁸ “Ephraim, mekei etü ngei nüng tuhphongaokhen? Oh Israel, mekei etü ngei nüng yakphongaokhen? Ngei Admah am kü dükshuohpü keiha ngei mekei etü am kü dükhen? Zeboiim am kü nopükei mekei etü ngei am kü nohen? Ngelei mongi ha nedükhükahen, ngei am kü ahshi-üng bamnyüpeih.

⁹ Ngei ahshi mongshihpai ngei ne-yei Ephraim am nemahtükpih; Mehenangkü ngeiyü Kahvang, shennyak nevaipih. Ngeiyü am mü nyupü Daülangpü Kahvang hih. Ngei am touei mongshih-ei nepeiküpeih.

¹⁰ Jomphong Shembüpa phei mühen, büpai mailang keiha ngünghen. Mechem büpa ngünghenshang, büpalei hapeüthü heshüphi kübü kheüei peikahen.

¹¹ Jomü Ijip leipü outhü keiha, Assyria leipü athubathü kei kheüei thaikemkahen; hatü ngei jom ngamshing kahdokei chingchinghühen shei Shembüpai enyüke.

Israel amei Mang

¹² Ephraim ami shahshemi, Israel phangi lueilemei ngei kü shonteke, shejao Judah am shaang thahshi Kahvang mü kamnyüke, hatü Daülangpü Kahvang kü hinglemnyüke.”