HOSEA 1 - DAÜLANGPÜ LAIHING (BSI)

¹ Judah amei ongthü, Uzziah, Jotham, Ahaz, hatü Hezekiah hepak kü, hatü Joashlei cheha Jeroboami Israel kü ong vaipü nyih kü Beerilei cheha Hosea touei Shembüpalei shah peiteke:

Hosealei Chenyüha hatü Hapeüthü

² Mechem Shembüpai shongei Hosea homei Israel am kü epa, büpai Hosea kü, “Daituh, nüngi laophü shing mükbongjuyungla hük yahtuh, hatü mükbongjuyung hapeüthü bühtuh; mehenangkü nanglakthüi ngei yakphongtü daiyei mükbongjuyung longi düknyüke” shei e.

³ Hanangkü Hosea daiyei Diblaimei yiükha Gomer mü shem yem, hatü pinnyü büm nekongi lei, hatü yeshang hük büh.

⁴ Shembüpai Hosea kü, “Hapa naü kü Jezreel shei mentuh; mehenangkü meshük ne-angi ngei Jezreelei jüpü nangkü ngei Jehu am shem mahtükhen, hatü Israel ongching ngei dohtükhen.

⁵ Ha nyih, ngei Jezreel kahjilei Israel amei wong kohpü veshanthü mahtükhen” shei e.

⁶ Gomer shao büm nekongi lei, hatü yiükha hük büh. Shembüpai Hosea kü, “Pinnyü kü Lo Ruhamah shei mentuh; mehenangkü ngei hajük kü Israel nanglakthü kü nebampih, hatü jom kü mang netükpih.

⁷ Shejao Judah nanglakthü kü ngei bampü huhen, hatü ngei jom yanghen, hatü hayü lah-i, yani, vehoki, koyeithüi nevaijü koyei veshanthüi nevai, shejao Shembüpa, jomei Kahvangi yanghen” shei e.

⁸ Gomer-i Lo-Ruhamah büh-ei paümei longpheikü shao pinnyü büm nekongi lei, hatü yeshang hük büh.

⁹ Shembüpai Hosea kü, “Büpa kü Lo-Ammi shei mentuh; mehenangkü Israel amü ngelei nanglak nevai, hatü ngei jomei Kahvang nevai” shei e.

Israel am Ja Lingei Leihen

¹⁰ Israel amü ienüng neaok, shethen neaoki yungching bhihhiphang kei daei leihen. “Amphong ngelei nanglak nevai” shei jom kü epü nangjei, “Amphongü vanyangyem Kahvangei hapeüthü” shei nyükhen.

¹¹ Judah nanglakthü hatü Israel nanglakthü mongjemhen, hatü jomi jom shing mübü hük jehen, hatü jomi hapa kahmük yahhen hatü dapüshepü nyuhen; mehenangkü hapa Jezreel nyih-ü longpü nyih vaikahen.