HEBREW 6 - DAÜLANGPÜ LAIHING (BSI)

Hinglempü Kübü Dodaipü Vongshüh

¹ Hanangkü jeni Khrista jung lapjai nyuhpüvenpü tuhphongtü behe leipü lemei daishah. Didaipü dou kübü mong lepei Kahvang kü hinglempü,

² baptükpü nang nyuhpü, laki shüngpü, dipü kübü yangei leipü, hatü nedohnetenpü shahphenpü jung jeni shao chongnyiam nelingshah.

³ Kahvangi mongjema jeni ha dükhen.

⁴ Chem üami Kahvangei vangngai kü nyuei vangsho amei thintho kü jepei veitü Laangha Daülangpü kü hean yahtü,

⁵ Kahvangei shah meipü kü hatü ngoikahen denhivan nganthü kü jepei veitü,

⁶ mang thah-ei vüdainya, jom nyipabü mong lepei leihenü neaokbenüng; mehenangkü jomi nyingshangi Kahvang Ha shao shophang kü aphünyüke, hatü büpa nyonghünyüke.

⁷ Düngei keipü vangyung yingpü kahdoki kahling am kü jomi napü hahying vamhüpai Kahvangei moihiman danghünyeih.

⁸ Shejao hüh hatü thüng mon vamhüpü kahdokü yahlak neshiüi thaüvaütükhen mon nyüke. Dohpülei hapayü aw kü jaktükhen.

⁹ Hami hapakei ejao, bampü küphüthü, hami am nangkü meipü douthü monglemnyeih, hayü yemleipü douthü.

¹⁰ Mehenangkü Kahvangü shahhing ne-epü nevai; ammi shaang thahshi dükpükei ammei dou hatü daülangpüthü chongphoei büpalei men kü bampü hupü kü büpai am hei-üng nebetükpih.

¹¹ Dohpü thahshi ammi monglempü jiühen shingvaishi am peüi aihük nyakpükenpü huhen hami nanyüpeih.

¹² Am nehetnewongi nyemtenyu shei hami deihnyeih, shejao hinglempü hatü munenpüthü homei lahtükpü mükjüp dangpü am kei nyuhen nanyüpeih.

Kahvangi Lahpü Lekpü

¹³ Mechem Kahvangi Abraham mü lahpü hük lingpa, büpai lahhen mü büpa dok kü longpü üpayao neshiüpü nangkü büpai laophü nyingi,

¹⁴ “Hingmei ngei nüng kü moihimanhen hatü nüngei hühiha dahühen” shei eteke,

¹⁵ hatü hapa keiha Abrahami munenei danpü nangkü hapa lahpü dangpeih.

¹⁶ Hangkuiyü laophü mü longpü hanei am touei lahnyeih, hatü hapa lahpai jomi mehe enya, ha jiüpeih shei hunyeih, hatü hapa lahpai dehilao peü dohhünyeih.

¹⁷ Hapa keiha mechem Kahvangi lahtükpü mükjüp danghenthü kü büpalei nejeilepü nyingnyoi mükhong nyeishi lekei huhüpa, büpai hayü lahpü hüki vangpeih.

¹⁸ Mechemao nejeileaokpü doulem nyi nyüke. Mechem Kahvangi lemhük ehen, büpai shahshem ne-enyih, hatü mechem büpai lahhen shahshemi nelahnyih. Hanangkü jen üami büpa touei dhümloi dang, jen touei temei nyupü monglem kü wongshongi shonghen shingvaishi hapai jen kü wong hatü nyiushemmei shuohnyeih.

¹⁹ Jen kü hapa monglem nyüpeih, hatü hapayü jenei laangha shing ailüng kei nyüke. Hapayü wong kohshi, lekhingshi hatü jen yangei tuhnyeih, hatü hapa monglemi haenpü ashak homei longi daülangpü shingei shünyüpeih.

²⁰ Halei jenei men kü jen shekü yeihshi Jisu shüteke, hatü Melkizedek aimü büpa den shing ngongchong leiteke.