HEBREW 4 - DAÜLANGPÜ LAIHING (BSI)

Kahvangi Lahpü Nyiushemmei

¹ Hanangkü büpalei nyiushemmei touei shühen lahpü shaang thahshi nyupü nangkü am üpaiyao hapa nethah-i nenyuhen shingvaishi jen kenhingshah.

² Mehenangkü shahjangmeiyü jom touei kei-üng jen toueiyao peiteke, shejao jomi danpü shahjangmei homei jom nanglei nedang; mehenangkü jomi ha danpü yah-ei hinglempü mü nejemhü.

³ Kahvangi epü keiha jen üami hinglem, ha nyiushemmei kü shühen, “Jomi ngelei nyiushemmei kahdokei neshüaokpih, shei ngei mongshihpai lahtükpeih.” Büpai kahdoknyü lingpü hepak kü büpalei dou temtükjao büpai ha epeih.

⁴ “Kahvangi büpalei dou lemphü kübü nyih nyetpabü kü nyiumeipeih” shei Laihing kü shing hükei nyih nyetpabü nang enyüke.

⁵ Hapa aihük shao, “Jomi ngelei nyiushemmei kahdokei neshüaokpih” shei eyei nyüke.

⁶ Hanangkü hanei am shingü halei shühen shingvaishi sha apshi nyüke, hatü shelei üami shahjangmei yahtü ven nedanpü homei neshüaok,

⁷ shao büpai nyih hük, “Shinnyih” shei tetei nyüke. Büpai hapayü bong longi pheikü David homei Laihingei hapakei enyüke: “Shinnyih ammi büpalei ngeü bangjema, am mong vaanei tenyu.”

⁸ Mehenangkü Joshua-i jom kü nyiushemmei shuohphei vailangmeyü Kahvangi pheilei lebü nyih jung ne-ehah shepeih.

⁹ Halangmeyü Kahvangei nanglakthü shing sabbath thempeyü shaangao nyuhah shepeih.

¹⁰ Mehenangkü Kahvangi laophülei dou kübü nyiumeipü keiha üami Kahvangei nyiushemmei kü shüaok jomao laophülei dou kübü nyiumeihen.

¹¹ Hanangkü jomi keiha ven nedanpü homei üpayao nedo-i hapa nyiushemmei kü shühen shingvaishi jeni kenshah.

¹² Kahvangei shah-ü yem hatü dou düknyüke, nah nyi kohpü yanlu mao nahpüba, yembüm hatü laangha, vangbaong hatü vangni baong hanei peiyei shüaokpü; mongdangei deihpü hatü lepü shahphenaokpü nyüke.

¹³ Hatü büpa touei lingpü dou mepayao joei neshiü, shejao büpalei mük touei lemphü bümbai hatü heeyei yeemshi nyüke, hatü jeni dükpü peü büpa kü ehen.

Jisu-ü Longpü Ngongchong

¹⁴ Hanangkü vangshothülei aongdaipü longpü ngongchong jenei Jisu, Kahvang Ha nyüpeih; jeni lahtükpü hinglempü kü wongshongi shongshah.

¹⁵ Jen wong nekohpü kü phahjiyei neaokhen mü jenei ngongchong neshiüpih, shejao jenphong kü keiha shejao mang neshiüi lemphü kü dokpü pongtükpü ngongchong hük nyüpeih.

¹⁶ Hanangkü jen nashingkü yahyang shinshang hatü phahji danghen shingvaishi hapa phahji ong uoshing touei monglongei peishah.