HEBREW 3 - DAÜLANGPÜ LAIHING (BSI)

Jisu-ü Mosa Mao Longpüba

¹ Hanangkü jeihinaü hatü nyahinaüthü, vangsho ami nyükpü kü daülangpü hean yahpüthü, jeni lahpü Jisu, phongshan hatü ngongchong deih-ei dangtuh.

² Mosaiyao Kahvangei shem am peü kü mong phenei shuohpükei büpai büpa jepüba kü mong phenei shuohteke.

³ Shem meyü shem vebü kü nyeinya dhüm kohpükei Mosa meyü Jisu kü-üng nyeinya dhüm kohpüba nyüke.

⁴ Mehenangkü shem peü hanei ami venyeih, shejao lemphü lingpeyü Kahvang hih.

⁵ Shaang Mosayü chongphobü hük keiha Kahvangei shem am peü touei pheilei denpü ehen douthü nang denpü shuohhen mong phenei shuohteke.

⁶ Shejao Khristayü hapeü hük keiha Kahvangei shem am kü mong phenei shuohpeih, hatü jeni ha mong kü pongpü kü hatü jeni monglempü kü mong hah-ei wongshongi shümjema jenü büpalei shem.

Hingnelempü Khüei Shahvüng

⁷ Hanangkü Laangha Daülangpai hei enyüke: “Shinnyih ammi büpalei ngeü bangjema,

⁸ jahpanei dokpü nyih kü ammi ammei mong vaanei khüei dükpükei tedük.

⁹ Jomi ngei bong pinyi thahshi dükpü douthü eejao halei ammei bühipathüi ngei kü shüvei hatü dokpeih.

¹⁰ Hanangkü ngei hapa hühihathü kü mongshihpeih, hatü ‘Jomei mongdang düngei lemnyong kü dainyüke, hatü jomi ngelei lemthü nenying’ shei ngei epeih.

¹¹ Hanangkü ngei mongshihpai vangei, ‘Jomi ngelei nyiushemmei kahdokei neshüaokpih’ shei epeih.”

¹² Jeihinaü hatü nyahinaüthü, am üpaiyao mang hatü hingnelempü mongdang jüktü vanyangyem Kahvang toueipü lepei nedaihen kenhingtuh.

¹³ Shejao mangi lueilempü kü ammei mong nevaanhen shingvaishi “Shinnyih” shei nyükpü thahshi nyihjeih am hüki hük mü mongnang thongteituh.

¹⁴ Jen kü shongei nyupü monglem kü dohpü ngoishi wongshongi shongjema jen Khristalei phaihan leinyüke.

¹⁵ Hapakei eyei nyüke: “Shinnyih ammi büpalei ngeü danjema, ammei bühipathüi khüei yaongpükei am mong vaanei tenyu.”

¹⁶ Kahvangei ngeü dantü khüei yaongpeyü üamang? Mosai Ijip leipü müei leipüthü nevaipü je?

¹⁷ Hatü üam kü büpai vangbong pinyi thahshi mongshihpa? Hathüyü mang thahtü jahpanei dipüthü nevaipü je?

¹⁸ Ven nedanpüthü kü epü nevaijema büpai lah-ei ngelei nyiushemmei kahdokei neshüaokpih shei üam kü epa?

¹⁹ Hanangkü jomi hingnelempü nangkü halei neshüaokpeih shei jeni eenyüke.