HEBREW 13 - DAÜLANGPÜ LAIHING (BSI)

Kahvang Mongonghüpü Dousho

¹ Nedoh-i hüki hük mü bamteipü nyutuh.

² Yenpa kü bampü huhen tebetük; mehenangkü hapakei dükpai hanei ami nenyingi vangsho phongshanthü kü ühyingpeih.

³ Nüngao khoklatei jom mü nyunyu keiha khoklatei nyupüthü deih-ei dangtuh; nüng kü shüveiphünyu keiha shüveipü ponghahpüthü deih-ei dangtuh.

⁴ Peüi bükhishem yempü kü dhüm shuohtuh, hatü shem yempü amei shinshing nesheih-i angtuh; mehenangkü Kahvangi iyjeiphailei hatü mükbongjuyung nyiphen shahphenhen.

⁵ Nüngei yangnyu lop bampü kübü yangei nyutuh, hatü mehe ang, ha kü mong hüshemei nyutuh; mehenangkü büpai, “Ngei nüng netuhphongpih nevaijü neyakphongpih” shei eteke.

⁶ Hanangkü jenphongao monglemei hapakei eaokhen: “Shembüpayü ngelei sheühbü; Ngei nenyemhen. Üpai ngei kü mehe dükphaaokhen?”

⁷ Am kü Kahvangei shah ephopü ammei mübüthü deih-ei dangtuh; jomei yangnyu nyuhichong kübü vampü deih-ei dangtuh hatü jom hinglempü kapituh.

⁸ Jisu Khristayü menyih, shinnyih hatü düngei hükkei khan.

⁹ Baong nedangpü nyuhpüvenpü lemphü homei am nyongei temühü; mehenangkü Kahvang phahji-i wong kohhühenü mongdang shingvaishi meipeih, hatü hapayü hahying nangkü shahkung bangpai nevai; hathü shahkung bangpai meheyao nanglei nedangpih.

¹⁰ Ashakshemei chongphopü ngongpathüi hahying hahhen jiüpü neshiüpü moidü hük nyüpeih.

¹¹ Ngongchongi yemhimakei iy Longi Daülangpü Shingei mang moila shuohhen deilangnyeih, shejao hapa yemhimakei bümü baümtap haolei jaktüknyeih.

¹² Hanangkü Jisuao büpalei iy homei nanglakthü daühühen shingvaishi chingnyü haolei shangpongpeih.

¹³ Shejema jenao baümtap haolei daishah hatü büpai nenpü shangpong koshah.

¹⁴ Mehenangkü hatouei den den kü nyuhen jenei chingnyü neshiü, shejao jenü peikahen nyupü chingnyü veinyüpeih.

¹⁵ Shejema, büpa homei jeni nedoh-i Kahvang kü menvih shuohpü moila, lappai, büpalei men kü lahpü jubenyeijang betjük shuohshah.

¹⁶ Mei dükhen, hatü nüngi angpü hanteihen tebetük; mehenangkü hapa keipü moilathüyü Kahvang mongongbenüng hih.

¹⁷ Ammei mübüthülei ven bangtuh, hatü jom phangkü shütuh; mehenangkü jomi ammei laangha kü veishi nyunyeih, hatü am nang jomi shah-om shuohhen. Jomi epü ammi bangjema, jomi mongongpai jomei dou dükkahen, hei nevaijema jomi mongmangpai dükkahen, hatü hapayü am shing nanglei nevaikahen.

¹⁸ Ham shing phopshih. Ham kü mongdeih daülangi nyupü hami nyingei nyüpeih; mehenangkü lemphü kü dhüm kohshi jiüpü dükei nyuhünyeih.

¹⁹ Ngei am touei lomi nyokei leiaokhen ngei shing hayaoha ammi phopshih.

Dohpü Phoppü

²⁰ Shaang chingmei Kahvang üpai jenei Jisu Khrista, Mi yombü longpü, nedohnetenpü vangpüshuwpü iy homei dipü kübü yangei leishih,

²¹ büpai am mei lemphü kü büpai mongpü dükhen changhüshahühen, shejüang Jisu Khrista homei büpai mong hahbenüng büpai jen homei dükhen, büpa kü den den kü müknyinshekhang vaituh. Amen.

²² Jeihinaü hatü nyahinaüthü, ngelei nangthong shah nenei bangtuh; mehenangkü ngei am kü hapa lai shohloh-i nyangnyeih.

²³ Jenei jeihinaü Timoti khoklat leipü veteke, hatü büpa hepak jiüshi peiküjema, ngei am mü ponghen peijü büpaao ngei mü peikahen.

²⁴ Ammei mübüthü hatü Kahvangei nanglakthü peü kü selam ete. Italy leipüthüi am kü selamja.

²⁵ Am peü mü phahji nyute.