HEBREW 12 - DAÜLANGPÜ LAIHING (BSI)

Jisulei Yangnyu Lappü

¹ Hanangkü jen shinei denbüthü khong longpü nyupü nangkü jen kü lem bangpü lemphü hatü jen kü yeppü mang peü yaktükshah, hatü jen sheshalei mokhen nyupü lemshong kü mong shuoh-ei mokshah.

² Jeni Jisu kü mük neshai-i veishah. Büpayü jen hinglempü kü shongpü hatü changpüshapüba. Büpa shekü temei nyupü mongong men kü shophang veüpong munenei Kahvangei ong uoshing kü lakdah philei uoteke.

³ Am nenyiuhen hatü mong nemahhen shingvaishi laophü khüei mangthü leipü ten peü nenaokpüba deih-ei dangtuh.

⁴ Ammi mang khüei hokshingkü ammei iy yenhen mü ammi khüei manghokpih,

⁵ hatü am kü hapeüthü shei epü ammi betükteke: “Ngelei hapeü, Shembüpai ungei-aeipü kü nyüshulük kü tedeih, nevaijü büpai nüng kü lohpü kü mong temah;

⁶ mehenangkü Shembüpai büpai bampüthü kü yeanpü shuohnyeih, hatü hapeü shei büpai yahpüthü kü hanghi shuohnyeih.”

⁷ Ungei-aeipü men kü tok nentuh; Kahvangi am kü hapeüthü kü kei nonyüke; mehenangkü nyühipathüi nevenpü üpa hapeü nyüpa?

⁸ Hashihthü keiha ammi hapa ungei-aeipü kü nenyujema, amphongü shounghathü hatü büpalei hapeüthü nevai.

⁹ Anyei vaishi jen kü ungei-aeihen jenü hangku nyühipa nyüpeih, hatü jeni jom kü dhüm shuohnyeih. Shejema jeni laanghathülei Pa kü nyeinya dhüm shuoh-ei nenyuhen je?

¹⁰ Jenei pathüi jom kü meipeih shei deihpü aimü jen kü kansho hük shing ungei-aeinyeih, shejao Kahvangi jen büpalei daülangshemshepü kü hean yahhühen shingvaishi jen kü ungei-aeinyeih.

¹¹ Shaang ungei-aeipeyü mongong nevai, hanghi kei nyüke. Shejao pheilei üami hapa phangkü nyuh-eivenei long, daülangshemshepü hatü chingmei betjük jükkahen.

Venpü hatü Shahvüng

¹² Hanangkü juwdaipü lak hatü wong nekohpü la wong kohhütuh.

¹³ Ammei lemthü pha jiüei lingtuh, shejüang lakhopüthü neaoknethangi nenyuhen, shejao meidaihen.

¹⁴ Shennyak peü mü chingmei kü hatü daülangi nyuhen kentuh; daülangi nenyuphei kü üpaiyao Shembüpa ne-eehen.

¹⁵ Üpaiyao Kahvang phahji nedangi nenyuhen, hatü shanghah vamhen mü hatü longi nesheihhen mü shahyakpü tünglang nevamhühen yomtuh.

¹⁶ Üpaiyao Esau kei nük omhük kü laophülei behepa hean yutükpü mükbongjuyung hatü Kahvang nenyingpü shennyak neleihen kentuh.

¹⁷ Hapheikü mechem büpai moihiman mükjüp yahhüpa, büpa kü ha neshuoh shei ammi nying. Büpai mükphi yenei moihiman yemjao chepalei mong yeiyahühen lem nedang.

¹⁸ Amphongü laki honghen aokpü aw bahpü, shangmang, mongmang hatü vanglükpalei nyupü kahshangei nepei;

¹⁹ amit vüngpü nevaijü shah epü ngeü danpüthüi jomphong kü hapa keipü shah hajük kü te-epha shei ehen mü nyupü shingei nepei;

²⁰ mehenangkü jomi hapa shahkung nebangaok: “Yemhimaki dangkao ha kahshang kü hongjema yaongi shükei jütükhen.”

²¹ Hapa veihenü nyemshi nyupü nangkü Mosai, “Ngei nyempai kheünyeih” shei eteke.

²² Shejao amphongü Zion Kahshang, vangsho amei Jerusalem, vanyangyem Kahvangei chingnyülei peiteke. Amphongü vangsho phongshan haja haja mongongei thaipü touei,

²³ hatü vangsholei men nyanglangpü hashongthü thaipü, hatü peüei shahphenpü Kahvang, hatü daülangpüthülei laanghathü changhüshahüpü touei,

²⁴ hatü vangpüshuwpü ja kü lembü Jisu, hatü Abelei iy mao meipüba shah epü Jisulei iy yenpü touei peiteke.

²⁵ Nüng kü shah epüba kü nebangi nenyuhen kentuh. Kahdoknyülei jom kü shahvüng shuohpübalei shah nebangpai jom neyangjema, vangsho leipü jen kü shahvüng shuohpüba toueipü yanei lüdaijema, jen meshük maanpü leihenang?

²⁶ Hahepak kü büpalei ngeüi kahdoknyü jenhü, shejao shaang büpai, “Shao chem ngei kahdoknyü mon nevai, vangshothüao jenhühen” shei lahteke.

²⁷ Hapa shah, “Shao chem” shei epai jenaokbenüng lappai, lingpü douthü mangtükhen, shejüang mepa nejenaok ha lakshing nyuhen.

²⁸ Hanangkü jenphongü nejenbenüng ongching hük dangnyu vütei-i jeni menvih shuohshah, hatü dhüm shuoh-ei nyempai yah-aokbenüng mü Kahvang kü khümshah;

²⁹ mehenangkü jenei Kahvangü laiyeilungei hahpü aw.