HAGGAI 2 - DAÜLANGPÜ LAIHING (BSI)

Shem Ja Meipü Nang

¹ Lenyang nyet mü nyih hapühükpabü kü Shembüpalei shah Haggai thibü homei peiyei e.

² Shieltielei cheha Zerubbabel, Judah amei governor, Jehozadakei cheha Joshua ngongchong hatü aopü nanglakthü kü hei etuh.

³ “Amphong khongkü hapa shem shongpü müknyinshekhang kü eepü üpa hatouei nyüpa? Shaang ammi mekei eenyüke? Shaang amphongi ha mekei veihahnya?

⁴ Shejao shaang wong kohtuh, Oh Zerubbabel, monglongtuh Jehozadakei cheha Joshua ngongchong; kahmük kü nyupü nanglakthü peü monglongtuh” shei Shembüpai enyüke. “Dou düktuh;

⁵ mehenangkü mechem am Ijip leipü vamei daipa, hahepak kü ngei am kü lahpükei ngei am mü düngei nyüpeih” shei Jeiyong Shembüpai enyüke. “Ngei düngei am mü nyüpeih; am mepa kao tenyem!”

⁶ Jeiyong Shembüpai ha enyüke: Maani angtü ngei shao chem vangsho hatü kahdok, yungching hatü kahngadok jenhühen.

⁷ Jatthülei mophimo peü peihen shingvaishi ngei jatthü peü jenhühen, hatü ngei hapa shem müknyinshekhangi mahühen shei Jeiyong Shembüpai enyüke.

⁸ “Hon hatü ngin ngelei” shei Jeiyong Shembüpai enyüke.

⁹ Shembüpai, “Phopshem chang meyü ja-üng meipüba nyuhen, hatü hapa shing kü ngei nanglakthü kü dapüshepü, chingmeivangmei shuohhen” shei enyüke.

Daülangpü hatü Nedaünelangpü

¹⁰ Darius ong vaipü bong nyi, lenyang shü mü nyih hapüalipabü kü Shembüpalei shah Haggai thibü touei peiyei e:

¹¹ “Jeiyong Shembüpai ha enyüke: Shahkungnyüi mehe enya, ha ngongpathü kü phehümao:

¹² Nyüngshah-i shennyak hanei-i moilahen daütükpü hahying hanei laophülei ashak kü dungei daishingkü ashakjungi aan, nük, yiü, olive mainga nevaijü lebü hahying kü hongjema, hapa hahying daülangi leinyu hiang?” Ngongpathüi jangteke, “Nevai.”

¹³ Hahepak kü Haggai-i pheteke, “Shennyak hük mahng kü hongtü hathü khongkü hük kü dangkao hongjema, ha nedaünelangpü leinyu hiang?” “Hih, ha nedaünelangpü leidainyeih” shei ngongpathüi jang.

¹⁴ Hahepak kü Haggai-i eteke, “Hapakei ha nanglakthü hatü ha jat ngei touei nyüke shei Shembüpai enyüke. Mehe mehe jomi düknya, hatü mehe mehe jomi shuohnya, peü nedaüpü nyüke.”

Shembüpa i Moihimanhen Lahpü

¹⁵ Shembüpalei shem chongnyiam yaong hük shangkü hük haüshekü am kü mehe vampa, shinnyih mü leitü meishi deihei dangtuh.

¹⁶ Mechem hanei-i hahdam kho nyi vethen monglemei nyupa, hahtam kho hük mon vethamteke. Ammi yiüdük kübü yiüshong kho hük bhithen shei deihteke, pinyi mon nyuhamteke.

¹⁷ Ngei ammi sheipülipü peü vanglük shami hatü shüyaongi mangtükpeih, shejoong am mong neleppeih.

¹⁸ Shinnyih, lenyang shü mü nyih hapüalipabü kü Shembüpalei chongnyiam yaong haüpheikü meishi deihhümao:

¹⁹ Puongmongei meheyao lihila aoei nyüla? Nyalingngupai, adhapü, haangpao, hatü olive püi meheyao betjük nejükangpü je? Shinnyih mü pangei ngei am moihimanphahen.

Shembüpa i Zerubbabel kü Lahpü

²⁰ Hapa len nyih hapüalipabü kü Shembüpalei shah Haggai touei nyipabü peiteke:

²¹ Judah amei governor Zerubbabel kü, “Ngei vangsho hatü kahdok jenhühen,

²² hatü ongchingthü khaptükhen, hatü jatthülei ongching wong ngei mahtükhen; ngei koyei kharithü hatü ha müpüthü, koyeithü hatü ha kü uopüthü jomei yannah kü-üng mahkemhen” shei etuh.

²³ Shembüpai enyüke: “Hapa nyih kü ngei nüng yahhen, Oh Zerubbabel, ngei chongphobü Shieltielei cheha, shei Shembüpai enyüke, hatü ngei nüngü ngelei anguti hük keiha leihühen; mehenangkü ngei nüng jetepih shei Jeiyong Kahvangi enyüke.”