HABAKKUK 2 - DAÜLANGPÜ LAIHING (BSI)

¹ Ngei shangdülei aongei nyuhen, hatü ngei nyingi shingnüngei uohen; Büpai ngei kü mehe ephahen eehen shangmü chiyei hatü ngei eelapü kü mehe shahnyok leiphahen om danhen.

Shembüpa i Jangpü

² Hahepak kü Shembüpai ngei kü jangei eteke: Mokyakiyao ieaokhen mü hapa manghkhang yaongba kü nyangtuh.

³ Mehenangkü ittükpü hepak shingvaishi shao-üng manghkhang hük nyüke; Hapayü dohpütenpü nang enyüke; hatü ha shahshem nevai. Hapayü pheidaijoong dantuh, hapa hingmei jiüshasha, nepheidaipih.

⁴ Changmeipüthü kü veihümao! Jomphongei laang nemeiang, shejao daülangpüthüyü jomphong hinglempai nyuhen.

⁵ Hingmei yiüi changmeipü shennyak hük luhahnyeih, hatü mahngchongi hajük shei ne-epükei nyüke. Jomi jatphü jom shing thailangnyüke, hatü nanglakthü peü yepei küplangnyüke.

⁶ Henüng keipü shennyakthü khüei peüi ne-ienelemi, vüshih-ei hapakei eela-ei ne-ehen je? “Gühdoui shem maei nyupüthü amphong Onyükei!” Meshükpa am aetpüshepü doui shemmei leiyei nyuaokhenang?

⁷ Ammi bheishe shepüthüi am khüei neyaongkahen je? hatü am kü nyemshaohen nevamkahen je? Hahepak kü am vepa lak kü lomohhen.

⁸ Mehenangkü ammi jatthü longi leipü aetei yahteke, aoei nyupü shennyakthüi am leipü aetei yahlangphahen. Mehenangkü ammi hangkunyü kü iy yenhüteke; Ammi kahmükthü, chingnyüthü hatü halei nyupüthü mahtükteke.

⁹ “Nyemhihan vongshüh kübü yanghen shingvaishi shahhing ne-epü mopi bükhishem jaan mü jaan mü vepüthü onyükei.”

¹⁰ Mih lomohhühen küpjan ten tempai laophülei shemongkü-üng veüpong leiteke, hatü nüngei laangha mang thahteke.

¹¹ Nüng khüei yaongpe kü shihpü yaongtaothüi lenkahen, hatü bükhishem kübü shemnyü ajungi yimjang jangkahen.

¹² Am üami iythüng anei jila agnya, hatü mangi chingnyü hük chongnyiam lingnya, Onyükei!

¹³ Veituh, hangkunyüi dükhahpü kemei aw kü shamtükhen; hatü jatthü nyiutüknangtükpü angkong vaitükhen hayü Shembüpa Kahvang leipü nevaipü je?

¹⁴ Shejao yungi yungching mapü keiha, kahdoknyü-ü Shembüpalei müknyinshekhang nyingpai maei nyuhen.

¹⁵ Laophülei küphü hük yiüi chokei bümkong nyuküpü kü veihen nangkü laophülei yiüdük kübü yiü yingei chokhüpüthü, Onyükei!

¹⁶ Amü müknyinshekhang nangjei veüpongi mahühen; am nyingi yinghen, hatü bümkong nyuhen. Shembüpalei lakdahphi leipü yungshong nüng shonei shakahen, hatü nüngei müknyinshekhang veüpongi jümlanghen.

¹⁷ Mehenangkü ammi Lebanon kü nemeipü dükpü nangkü am kao dükphahen; hatü ammi yemhimakthü jütükpü nangkü am nyemhühen. Mehenangkü ammi hangkunyü iy yenhüteke; ammi kahdoknyü mahtükteke; Chingnyüthü hatü halei nyupüthü jütükteke.

¹⁸ Yaongnaüya kü mehe nanglei nyüpa? Mehenangkü hayü lingbüi lingpü khih. Hayü lajei hük mon, shahshem nyuhbü mon nyüke. Mehenangkü hapa lingbüi büpai linghahpü dou kü hinglemnyüke, büpai shah ne-eaokpü yaongnaüya lingnyüke.

¹⁹ Am üami pü kü, “Paotuh” shei enya, nevaijü yangnyu neshiüpü yaong kü, “Yaongtuh” shei enya, Onyükei! Hapai lemhük dangkao ephaaokhen je? Veituh, hayü honhingini shaokpü mon, halei yangnyu ngü neshiü.

²⁰ Shejao Shembüpayü laophülei daülangpü khümshemei nyüke; kahdoknyü peüi büpa touei nenmü nyutuh!