GALATIA 6 - DAÜLANGPÜ LAIHING (BSI)

Hüki Hükei Mongshang Koteituh

¹ Jeihinaüthü, hanei ami mang dükei yepjema, am üami Laangha yah-ei nyu, inyainyempü laanghai hapa keipü shennyak müei leituh. Am laophü nyingi nedokhahhen lituh.

² Hüki hükei hanggovih koteituh, hatü hapakei dükpai Khristalei shahkungnyü jiühünyüke.

³ Üami menüngao nevaipü kü lemhük vaipükei deihnya, laophü nyingi luhahnyüke.

⁴ Peüi laophüi dükpü dou dokhen vongbong; shejüang mih-i dükpü kü neshettei-i meipü vaijema, laophüi dükpü dou kü changmeiyei deihhen.

⁵ Mehenangkü peüi laophülei hanggo kohen vongbong.

⁶ Üami hathü shah nyuhhahnya, hathüi laophülei nyuhbü mü doumei peü hanteihen vongbong.

⁷ Am nyingi telutelemhah; üpaiyao Kahvang kü teyaü. Shennyak hüki mehe hai, ha-üng vetnyüpeih.

⁸ Ammi laophülei phai kü mon haijema, ammi phai kübü ten vethen, shejao ammi Laangha kü haijema, ammi Laangha kübü yangnyuyem vethen.

⁹ Hanangkü mei dükpü kü jen netengshah; mehenangkü jeni dhaümshi dükjema ha vetshingkü jeni vethen.

¹⁰ Hanangkü hepak mei dangpü nangkü jeni peü kü doumei dükshah; anyei vaishi vaipü shemongshathü kü.

Dohpü Nangthong Shah

¹¹ Ngei ngelei laki am kü nyangshingkü meshük laknyang kuk longpai nyangpa veituh!

¹² Üami shakdokei veihen meipü mon linghünya, hathüi am kü shuw japhen nyeannyu khih. Jomi ha dükpü shojungü Khristalei shophang shingvaishi shüveipü neponghüpü nangkü jomi ha düknyüke.

¹³ Japtükpüthüi dangkao shahkung nebangnyu, shejao jomi ammei phai nangkü changmeinüng shei ammao shuw japhühen deihnyüke.

¹⁴ Jenei Shembüpa Jisu Khristalei shophang mü lenei ngei nechangmeishah, ha shingvaishi kahdoknyüi ngei shophang kü appeih, hatü ngei kahdoknyü shophang kü appeih.

¹⁵ Japtükpü nevaijü nejappeyü meheyao nevai, shejao ja lingpü mon nadang.

¹⁶ Üami hapa shahkung kü mühen, hathü mü chingmei, phahji nyute hatü Kahvangei nanglakthü mü nyute.

¹⁷ Shaang mü leitü üpaiyao ngei kü shanghah teyahpha; mehenangkü ngei ngelei büm kü Jisulei kaw shashi nyüpeih.

¹⁸ Jeihinaü hatü nyahinaüthü, jenei Shembüpa Jisu Khristalei phahji ammei laangha mü nyute. Amen.