GALATIA 5 - DAÜLANGPÜ LAIHING (BSI)

Bümei Hean

¹ Mehenangkü bümei shingvaishi Khristai jen bümei leihüpeih. Hanangkü wong kohshi yaongtuh, hatü aalei pang kü shao tepaai.

² Bangtuh, ngei Pauli ha am kü enyeih, ammi shuw japhen hanjema, am shing Khristayü nanglei nechongkahen.

³ Shao ngei shennyak peü kü denpü shuoh-ei enyeih, üpai shuw japhen hannya, büpai shahkung kemei dükhen shashi nyüke.

⁴ Am üami shahkung homei dahshakhü, am nyingi Khrista kübü yandaiteke; am phahji toueipü dodaiteke.

⁵ Mehenangkü Laangha homei hinglempai jeni daülangshemshepü monglem omdanei nyunyeih.

⁶ Mehenangkü Khrista Jisu kü japtükpü hatü nejaptükpü kü meheyao nanglei neshiü; iehen dou hükü bampü homei hinglempai dou dükpü ha mon nyüke.

⁷ Amphongü mokpü meipü hük mokei nyuteke. Shahhing ven danhen kübü üpai am kü lem bangphopa?

⁸ Henüng keipü yawhpüyangpeyü am kü nyükpüba leipü nepeiangpih.

⁹ Maanpü dawi nyetpü aan kemei puohünyeih.

¹⁰ Ammi lemhük kei deihshi nenyu-aipih shei ngei Shembüpa kü monglempü nyüpeih. Shejao üpa vaihen vaijao, am jü-ühüpübai hang shemhen.

¹¹ Shejao ngelei jeihinaüthü, ngei japtükpü jung chongvenjao mehekei shaang thahshi ngei kü shüveinya? Ha nang keyü shophang kü huluh shuohpeyü tüktükteke.

¹² Am kü mongshang shuohpüthüyü japtükpü mü ban tüktüklangmeyü meihen vaipü khih shei ngei deihnyüke.

¹³ Jeihinaü hatü nyahinaüthü, amphongü bümei touei nyükpeih; shejao ammei bümei hean yah-ei mang nyingnyoi hüshemhühen tenotei, shejao bampai am hüki hük chongphoteituh.

¹⁴ Mehenangkü shahkungnyü kemei shahkung hük kü shenshi nyüke, “Nüngi laophülei chingyowpa kü laophü kü kei bamtuh.”

¹⁵ Shejoongpa am hüki hük mü khetteiyei lühtükjema, am hüki hük homei dipü mahpü neponghen lituh.

Phai hatü Laangha

¹⁶ Laangha kü nyutuh shei ngei enyeih, hatü phai-i yahhüpü hüteshemhü.

¹⁷ Mehenangkü mehe phai-i yahhü, ha Laangha khüei, hatü mehe Laanghai yahhü, ha phai khüei nyüpeih; mehenangkü ammi napü nedükhühen jiji hüki hük mü khüteinyeih.

¹⁸ Shejao am Laanghai mühüjema, ammü shahkungnyü phangkü neshiü.

¹⁹ Shaang phailei douthü ngaiheyei vamteke: iyjeiphailei, nedaünelang, ten dükpü,

²⁰ lajei khümpü, phongyompü, jiühitteipü, mophicheü, mükhühpü, mongshihpü, dehilao, neshetnephen, hanteipü,

²¹ mükhakpü, chokpümokpü, hahngayungpe hatü hakeipü douthü vamteke. Ngei shelei shuohpükei ngei am kü shahvüng shuohnyeih: Üami henüng keipü douthü düknya, Kahvang ongching mükjüp nedangpih.

Laangha Betjük

²² Shejao Laangha betjükü bampü, mongongpü, chingmei, munenpü, phahjipü, nekaungi shuohpü, hingshangpü,

²³ inyainyempü hatü laophü nying ungei-aeipü. Hapa keipü douthü khüei shahkungnyü neshiü.

²⁴ Üamphong Khrista Jisulei lompü vainya, phai-i lümpü hatü yahhüpü peü shophang kü aptükteke.

²⁵ Jen Laangha kü nyujema, jen Laanghai mühüshah.

²⁶ Jen hüki hük mü dokteiyei, mükhühteipai changmeiyei neleishah.