GALATIA 1 - DAÜLANGPÜ LAIHING (BSI)

Selam Shah

¹ Paul, phongshan hük– hangkui kangpü nevaijü hangkulei wongi shompü nevai, shejao Jisu Khrista hatü büpa dipü kübü yangei leishihpü Pa Kahvang homei,

² ngei mü nyupü jeihinaüthü peüi Galatia leipü attoithü touei:

³ Kahvang, jenei Pa hatü Shembüpa Jisu Khrista leipü phahji hatü chingmei am mü nyute.

⁴ Hapa nemeipü denhivan kübü jen bümei leihühen tata kü jenei Pa Kahvangi mongpükei jenei mang shingvaishi Khristai laophülei yangnyu shuohpeih.

⁵ Den den kü müknyinshekhang büpa lompü vaihütuh. Amen.

Lebü Shahjangmei Neshiü

⁶ Khrista phahjipai am kü nyükpü hük lomi yakphongtü lebü shahjangmei hük lemei lepdaipü kü ngei thamanyeih.

⁷ Hapayü hingmeipü shahjangmei nevai, shejao shennyak hanei homei am jü-ühünyu khih, hatü Khristalei shahjangmei nyongnyongi leitükhen khenyu khih.

⁸ Shejao hami vaijao nevaijü vangsho leipü phongshani vaijao hami am kü venpü shahjangmei mü lenei lebü shahjangmei venphüjema, hathü den den kü thaüvaütüktuh!

⁹ Hami shelei epükei shaangao ngei enyeih: Ammi yahpü shahjangmei nevai-i hanei ami lebü shahjangmei am kü venphüjema hathüyü den den kü thaüvaütüktuh!

¹⁰ Ngei shaangü hangku leipü meiangke shei ehahpü yemnyu hi Kahvang leipü danghen khenya? Nevaijü ngei hangku mongmeihühen khenyu je? Shaang thahshi ngei hangku mongmeihühen khejema, ngeiyü Khristalei chongphobü hük nevai.

Mekei Paul Phongshan Hük Leipa?

¹¹ Jeihinaü hatü nyahinaüthü, ngei am kü venpü shahjangmeiyü hangku kübü vampü nevai shei ngei am kü nyinghünyüke;

¹² mehenangkü hapayü hangku leipü vampü ngei dangpü nevai, nevaijü hanei ami ngei kü nyuhphopü nevai, shejao ngei hapayü Jisu Khrista shakei vampü homei dangpeih.

¹³ Jehoda amei vaipü vanglem kü ngei shelei nyupü yangnyu jung ammi danei nyüke. Ngei Kahvangei attoi kü longi mangshi shüveiyei ha mangtükhen khepeih.

¹⁴ Jehoda vaipü vanglem kü hamei nanglak ngelei yienhihien khongkü ngei nyeinya shehongei nyupeih; mehenangkü hamei büyempaya kü ngei nyeinya nyakeikenei nyupeih.

¹⁵ Shejao mechem ngei bühshekü ngei jelangpü Kahvangi büpalei phahji homei ngei kü nyükpa,

¹⁶ ngei Kung am touei büpa jung baonghen büpai laophülei Ha ngei touei shakei vamei huhühen mongongei deih; hanangkü ngei hangku leipü shahnying neyemtei,

¹⁷ nevaijü ngei shekü phongshan vaidaitü Jerusalemei nyupüthü touei ngei nedai, shejao ngei Arabialei heih, hatü hapheikü ngei Damaskalei leipeih.

¹⁸ Hapheikü bong jem angtü ngei Peter thümnüng Jerusalemei aongpeih, hatü büpa mü nyih anpünga thempeih;

¹⁹ shejao Shembüpalei chenaü Jakob mü lenei ngei lebü phongshanthü üpayao ne-ee.

²⁰ Mehe ngei am touei nyangnya, Kahvang touei ngei shahshem ne-enyih.

²¹ Hapheikü ngei Syria hatü Cilicia moidoithülei daipeih,

²² hatü hahepak thahshi Khrista kü Judealei nyupü attoithüi ngei nenyingi nyuhampeih;

²³ jomi hapa shahjang mon danei nyuhampeih: “Chem büpai mahtüknüng shei kheyei jen kü shelei shüveipü shennyaki shaang vaipü jung baongnyüke.”

²⁴ Hatü ngei nangkü jomi Kahvang müknyinshekhangpeih.