Biblia Todo Logo
Bìoball air-loidhne

- Sanasan -

EZRA 8 - DAÜLANGPÜ LAIHING (BSI)


Wüpküp Leipü Ezra mü Leipüthü

1 Hapayü jomei phangdep shangjingthü hatü Artaxerxes ongi vanglem lemshingkü ngei mü Babylonei aongpüthülei bülem hapakei:

2 Phinehas phang kü Gershom; Ithamar phang kü Daniel; David phang kü,

3 Shekaniahlei cheha Hattush; Parosh phang kü Zekhariah hatü büpa mü jom 150 men nyangei shiüteke;

4 Pahath-Moab phang kü Zerahiahlei cheha Eliehoenai hatü büpa mü jom 200 nyu;

5 Zattu phang kü Jahazielei cheha Shekaniah hatü büpa mü jom 300 nyu;

6 Adin phang kü Jonathanei cheha Ebed, hatü büpa mü jom 50 nyu;

7 Elam phang kü Athaliahlei cheha Jeshaiah, hatü büpa mü jom 70 nyu;

8 Shephatiah phang kü Mikhaelei cheha Zebadiah, hatü büpa mü jom 80 nyu;

9 Joab phang kü Jehielei cheha Obadiah, hatü büpa mü jom 218 nyu;

10 Bani phang kü Josiphiahlei cheha Shelomith, hatü büpa mü jom 160 nyu;

11 Bebai phang kü Bebailei cheha Zekhariah hatü büpa mü jom 28 nyu;

12 Azgad phang kü Hakkatanei cheha Johanan, hatü büpa mü jom 110 nyu;

13 Adonikam phang kü Eliphelet, Jeuel hatü Shemaiah hatü jomphong mü jom 60 nyu, (jomphongü pheishi leiteke);

14 Bigvai phang kü Uthai hatü Zakkur hatü jiji mü jom 70 nyuteke.


Phopshemei Chongphohen Levi am

15 Ngei jomphong Ahava yungyenei thaihü, hatü halei baümtap vetü nyih jem nyu. Ngei Levi am hatü nanglakthü kü veishingkü halei Levi am hükao nechongkei.

16 Hanangkü ngei mübüthü Eliezer, Ariel, Shemaiah, Elnathan, Jarib, Elnathan, Nathan, Zekhariah hatü Meshullam, hatü nyingpühingpü shennyak Joiarib hatü Elnathan hathü nyükei,

17 ngei Kasiphia leipü mübü Iddo touei shom. Kahvangei shemei chongphohen shennyak shomphahen nangkü Iddo hatü büpa mü sheühteipü Kasiphia phopshemei chongphobüthü kü mehe ehen ha ngei jom kü eteke.

18 Kahvang phahji homei jomi ham touei Israel ha Levi, Levilei ha Mahli, Mahlilei hühiha Sherebiah longi dou aokpü shennyak mü chehathü jom 18 shomphopeih;

19 shao Hashabiah mü Jeshaiah Merarilei hühihathü mü jomei hapeüthü jom 20 shomteke.

20 Ha mü lenei Levi am kü sheühhen shingvaishi David hatü büpalei lakchongbüthüi hayaoha khaatei tuhpü phopshemei chongphopüthü jom 220 shomteke. Hathülei men peü nyangei nyüpeih.


Shüaeiyungleyei Phoppü

21 Ham, hamei hapeüthü hatü hamei mophimo kemei yah-ei meishi daihen nangkü hamei Kahvang touei maanpü leiyei shüaeiyunglehen ngei Ahava yungyenei nyükteke.

22 Lemei vepathü kübü yanghen shingvaishi ongpa kü veshan, koyei veshan yahshih shei yühen ngei veüteke; mehenangkü ngei ongpa kü, “Büpa kü hinglempüthü kü hamei Kahvangü phahjinyeih, shejao büpa tuhphongpüthü khüei büpai mongshihnyeih” shei ngei etüktü nyupeih.

23 Hanangkü ham hapa tata kü Kahvang kü shüaeiyungleyei phoppeih hatü büpai phoppü kü jangpeih.


Phopshem Shing Thintho

24 Hapheikü ngei ngongpa mübüthü jom anpünyi mü Sherebiah, Hashabiah hatü jomei jeihinaüthü jom an khaatei tuhpeih,

25 hatü ngei jomphong kü ongpa, büpalei sheühbüthü, lakchongbüthü hatü halei nyupü Israel ami Kahvangei shem nangkü moila shuohpü hon hi ngin hatü lebü douthü dokei shuohpeih.

26 Ngei jomphong kü ngin ton 22, ngini lingpü dükhi-üm 100, hayü dok 70, hon dok 3, 400,

27 hon shung 20 hayü dok 8.4, hatü hon mü bhei hükkeipü meipü melangnyiam shung nyi dokei shuohpeih.

28 Ngei jomphong kü, “Amphong hatü hapa douthü kemei Shembüpa kü daütükpüthü hih. Hon hi ngin kemei Shembüpa, ammei bühipa Kahvang kü moila shuohpüthü khih.

29 Ammi hathü Jerusalemei Shembüpalei shemei doktü ngongpa mübüthü, Levi am hatü Israel phangthü kübü shangjingthü kü mangshuoh thahshi lishi yomhahtuh” shei e.

30 Hapheikü ngongpa hatü Levi ami hathü hon hi ngin Jerusalemei Kahvangei shemei doktü koei peijapü yah-ei tuh.


Jerusalemei Leipü

31 Hapheikü Jerusalemei aonghen shingvaishi shongpü len nyih anpünyipabü kü Ahava yung tuhtü dai; hamei Kahvang ham mü nyu, hatü lemyang kü hamei vepathüi ham kü tappü kübü ham yangpeih.

32 Ham Jerusalemei peiyei halei nyih jem nyupeih.

33 Nyih alipabü kü ham Kahvang phopshemei pei, hatü hon hi ngin hatü dükhi-üm kemei doktü Uriahlei cheha Meremoth ngongpa kü shuoh, hatü büpa mü Phinehaslei cheha Eleazar nyu, hatü jiji mü Levi am, Jeshualei cheha Jozabad hatü Binnuilei cheha Noadiah nyuteke.

34 Hathü peüshep ie, hatü dok dokteke, hatü lemphü dokpü nyangei tuhteke.

35 Hahepak kü wüpküp leipü leipüthüi Israel Kahvang kü Israel am peü shingvaishi jakpü moila mohohbaong anpünyi, mi chebaongha büalipüanpüvok, mi cheha pejempüanpünyet, hatü mang moila yum chebaong anpünyi; hathü kemei Shembüpa kü jakpü moila shuohteke.

36 Jomphongi ongpalei ngeükhüam Euphrates heshüphi kü nyupü governorthü hatü lakchongbüthü kü shuoh, hatü jomiyao nanglak hatü Kahvangei shem dousho kü sheühteke.

Phom Naga Bible - DAÜLANGPÜ LAIHING

Copyright © 2005 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan